ខេត្តកំពង់ស្ពឺ ៖ កម្មការិនីម្នាក់ដែលបានបាត់ខ្លួនអស់ជាច្រើនថ្ងៃ ស្រាប់តែត្រូវអ្នករកកាប់អុសប្រទះឃើញសពមានសភាពហើមស្អុយទៅហើយបង្កឱ្យមានការភ្ញាក់ផ្អើលដល់ប្រជាពលរដ្ឋទៅចោមរោមមើល និងសមត្ថកិច្ចចុះទៅពិនិត្យភ្លាមៗផងដែរ ។ ការភ្ញាក់ផ្អើលពីការប្រទះឃើញសពនេះ កើតឡើងកាលពីវេលាម៉ោង៤និង៣០នាទីល្ងាចថ្ងៃទី២៨ កញ្ញា ។ លុះដល់ព្រឹកថ្ងៃទី២៩ កញ្ញា ទើបសមត្ថកិច្ចទៅពិនិត្យនៅចំណុចទួលដា ស្ថិតក្នុងភូមិច្រស ឃុំអូរ ស្រុកភ្នំស្រួច ។ ជនរងគ្រោះឈ្មោះសែន ស្រីអីុម ហៅឆយី អាយុ២២ឆ្នាំ មានទីលំនៅក្នុងភូមិរលាំងចក ឃុំរលាំងគ្រើល ស្រុកសំរោងទង ។
តាមការរៀបរាប់របស់លោក ខឹម ខេង អាយុ៥៥ឆ្នាំ ដែលត្រូវជាឪពុកនារីរងគ្រោះបានឱ្យដឹងថា គាត់មានកូនស្រីតែម្នាក់នេះទេ ។ កូនស្រីនេះបានចេញពីផ្ទះកាលពីថ្ងៃទី២៥ កញ្ញា ជាមួយនឹងម៉ូតូមួយគ្រឿងម៉ាកហុងដា សេ១២៥ ស៊េរី២០១២ ពណ៌ខ្មៅ ហើយតាំងពីថ្ងៃនោះមកក៏បាត់ដំណឹងសូន្យឈឹងតែម្ដង ។ លុះនៅថ្ងៃទី២៩ កញ្ញា រូបគាត់បានទទួលព័ត៌មានពីសមត្ថកិច្ចថា ប្រទះឃើញសពកូនស្រីគាត់មានសភាពហើមស្អុយទៅហើយនៅក្នុងព្រៃគាត់និងប្រពន្ធមានក្ដីរន្ធត់និងតក់ស្លុតយ៉ាងខ្លាំង ។ ពេលមកដល់កន្លែងកើតហេតុធ្វើឱ្យគាត់និយាយអ្វីលែងចេញទាំងអស់ ព្រោះដ្បិតកូនស្រីជាទីស្រឡាញ់់ស្លាប់ចោលគាត់បាត់ទៅហើយ ។
នគរបាលបច្ចេកទេសដែលបានធ្វើកោសល្យវិច័យបញ្ជាក់ថា សពត្រូវគេសម្លាប់ដោយយកខ្សែលួសរឹតកចងភ្ជាប់នឹងដើមឈើ ។ មុនពេលបាត់ខ្លួន នារីរងគ្រោះជិះម៉ូតូសេ១២៥ ពណ៌ខ្មៅ តែពេលនេះសមត្ថកិច្ចរកមើលនៅកន្លែងកើតហេតុមិនឃើញម៉ូតូទេ ដែលអាចសន្និដ្ឋានបានថា ចោរបានធ្វើសម្មភាពសម្លាប់នាងប្លន់យកម៉ូតូទៅជាមួយ ។ ក្រោយពីពិនិត្យចប់ សពត្រូវបានប្រគល់ឱ្យក្រុមគ្រួសារទទួលយកទៅធ្វើបុណ្យតាមប្រពៃណី ។
សមត្ថកិច្ចស្រុកភ្នំស្រួចបញ្ជាក់ថា នារីរងគ្រោះធ្វើការនៅរោងចក្រសីុម៉ាណូ ហើយអ្នកធ្វើសកម្មភាពសម្លាប់អាចជាមនុស្សស្គាល់គ្នាក៏ថាបាន ។ ទោះបីជាយ៉ាងណា សមត្ថកិច្ចមិនព្រងើយកន្ដើយនោះទេ ក្នុងការស្រាវជ្រាវស្វែងរកចាប់ខ្លួនជនល្មើសយកមកផ្ដន្ទាទោសឱ្យខាងតែបាន ៕
ចែករំលែកព័តមាននេះ