រាជធានីភ្នំពេញ ៖ អ្នករស់នៅក្នុងសហគមន៍បឹងកក់ប្រមាណជាង៤០នាក់ បានប្រមូលផ្តុំគ្នានៅមុខសាលារាជធានីភ្នំពេញ នាព្រឹកថ្ងៃទី២៩ កញ្ញា ស្រែកទាមទារឱ្យសាលារាជធានីភ្នំពេញបូមទឹកនិងបូមខ្សាច់តាមលូ ដែលកំពុងលិចផ្ទះ និងផ្លូវនៅក្នុងសហគមន៍បឹងកក់ បន្ទាប់ពីមានភ្លៀងធ្លាក់មួយមេយ៉ាងធំ កាលពីព្រឹកថ្ងៃអាទិត្យ ដោយយកអង្ករសើមទឹកលិចជាច្រើនបាវមកចាក់លើផ្លូវចូល ចង់បញ្ជាក់ថា ពិតជាទឹកហូរចូលផ្ទះមែន ។
ពួកគេភាគច្រើនជានារីស្រែកប្រកាសចោទថា ដោយសារតែអាជ្ញាធរបានបូមខ្សាច់បិទប្រព័ន្ធលូក្នុងសហគមន៍បឹងកក់ ទើបបណ្តាលឱ្យលិចលង់ផ្ទះនៅភូមិ៣ ភូមិ១ ភូមិ២០ ភូមិ២៤ ភូមិ២៣ ភូមិ២២ និងភូមិ៦ ព្រមទាំងសម្ភារប្រើប្រាស់នៅក្នុងផ្ទះសើមអស់ ។ ពួកគេបញ្ជាក់ថា បើសិនអាជ្ញាធរមិនប្រើប្រាស់ម៉ាស៊ីនបូមទឹកឱ្យបានទាន់ពេលទេ ពួកគាត់នឹងអត់អីបរិភោគ និងគ្មានកន្លែងស្នាក់នៅនោះទេ ។
ពលរដ្ឋក្នុងសហគមន៍នេះ បានចោទថា នេះជាលទ្ធផលនៃការមិនយកចិត្តទុកដាក់ពីអាជ្ញាធរមូលដ្ឋាន ទើបប្រជាសហគមន៍ដែលរងគ្រោះលិចលង់ផ្ទះបែបនេះ ។ ជាការបង្ហាញនូវកំហឹងពុះកញ្ជ្រោលផង បាននាំគ្នាដឹកបាវអង្ករដែលលិចទឹកយកមកឱ្យមន្ត្រីសាលាក្រុងមើល កុំឱ្យថាពួកគេមួលបង្កាច់ ហើយពេលនេះផ្ទះទាំងអស់កំពុងលិចទឹកត្រាំនៅទ្បើយ ។ មន្ត្រីសាលាខណ្ឌដូនពេញបានឱ្យដឹងថា តាំងពីព្រលឹមស្រាងៗថ្ងៃទី២៩ កញ្ញា អាជ្ញាធរខណ្ឌដូនពេញដឹកនាំដោយលោក គួច ចំរើន អភិបាលខណ្ឌ បានរួមសហការជាមួយលោក សាំ ពិសិដ្ឋ នាយកមន្ទីរសាធារណការរាជធានីភ្នំពេញ និងមន្ទីរធនធានទឹក បាននាំគ្រឿងចក្រចុះទៅស្តារប្រព័ន្ធលូ ដើម្បីរំដោះទឹកចេញពីតំបន់សហគមន៍បឹងកក់ហើយ ។ អភិបាលខណ្ឌដូនពេញ លោក គួច ចំរើន និងក្រុមការងារបានបញ្ជូនអេស្កាវ៉ាទ័រ ស្តារនិងកាយប្រព័ន្ធលូ និងស្តារសំរាមទៅតាមផ្លូវR5 និងផ្លូវR6 ដើម្បីរំដោះទឹកហូរចាក់ចូលទៅក្នុងទន្លេក្រោយពីទទួលរងការជន់លិច ព្រោះតែភ្លៀងធ្លាក់យ៉ាងគំហុកនោះ ។
ខណៈពេលសហគមន៍បឹងកក់ធ្វើការតវ៉ានៅមុខសាលារាជធានីភ្នំពេញនេះ មន្ត្រីសាលារាជធានីភ្នំពេញ បានចេញមកប្រាប់ឱ្យប្រជាពលរដ្ឋត្រទ្បប់ទៅផ្ទះវិញ ដោយបញ្ជាក់ថា សាលារាជធានីបាននិងកំពុងប្រើប្រាស់គ្រឿងចក្រជាច្រើនគ្រឿងទៅកាយទំនប់បង្ហូរទឹកចេញពីសហគមន៍បឹងកក់ហើយ ក៏ប៉ុន្តែការស្នើនោះ ត្រូវបានពួកគេមិនជឿជាក់ទេ គឺនៅស្រែកបន្តទាមទារឱ្យប្រើម៉ាស៊ីនបូមទើបឆាប់អស់ទឹក បើគ្រាន់តែកាយច្បាស់ជាអត់ហូរទេ ។ លោក គួច ចំរើន អភិបាលខណ្ឌដូនពេញ បានមានប្រសាសន៍ថា ក្រុមការងាររបស់លោកបានបើកប្រតិបត្តិការចុះកាយមុខទឹកនៅតំបន់បឹងកក់ តាំងពីព្រលឹមស្រាងៗ ហើយប្រតិបត្តិការខាងលើនេះ មិនមែនប្រើរយៈពេលខ្លីនោះទ្បើយ ។ ក្រុមការងារកំពុងខិតខំប្រឹងប្រែងរំដោះទឹកចេញពីកន្លែងដែលមានការជន់លិចឱ្យខាងតែបាន ។
គួរកត់សម្គាល់ថា ក្រោយពីភ្លៀងបានធ្លាក់ធ្វើឱ្យផ្លូវនិងតំបន់ជាច្រើននៅក្នុងខណ្ឌដូនពេញ ត្រូវទឹកលិចមិនអាចធ្វើដំណើរទៅរួច ទើបអាជ្ញាធរនិងកម្លាំងប្រជាការពារខណ្ឌ បាននាំគ្នាចុះកាយសំរាមតាមមាត់លូកុំឱ្យរាំងស្ទះខ្សែទឹកដែលហូរចាក់ចូលទន្លេ ។ ក្រុមអ្នកតវ៉ាដែលមកពីសហគមន៍បឹងកក់ បាននាំគ្នារំសាយពីមុខសាលារាជធានីភ្នំពេញ ទៅលំនៅឋានវិញនៅវេលាម៉ោង១១នាព្រឹកថ្ងៃដដែល ក្រោយពីបានឃើញសកម្មភាពរបស់អាជ្ញាធរជំនាញ ដែលដឹកនាំដោយលោក គួច ចំរើន អភិបាលខណ្ឌ និងលោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនកំពុងតែខិតខំបញ្ជាគ្រឿងចក្របូមទឹកចេញពីតំបន់បឹងកក់ ដើម្បីធានាសុវត្ថិភាពនិងកាត់បន្ថយកំហឹងទាំងទ្បាយក្នុងតំបន់បឹងកក់ ។
គួររំលឹកថា កាលពីព្រឹកថ្ងៃទី២៨ កញ្ញា តំបន់ជាច្រើននៅកណ្តាលរាជធានីភ្នំពេញ ជាពិសេសនៅម្តុំផ្សារកណ្តាល ផ្សារចាស់ ក្រោយព្រះបរមរាជរាំង (រមណីយដ្ឋានវត្តភ្នំនិងតំបន់បឹងកក់ ត្រូវបានទឹកជន់លិចស្ទើរមិនអាចធ្វើដំណើរបានក្រោយពីភ្លៀងបានបង្អុរយ៉ាងគំហុក និងធ្វើឱ្យលំនៅឋានទាំងទ្បាយត្រូវទឹកហូរចូលទម្រាំតែស្រកចុះទៅវិញ រហូតដល់យប់ទើបស្រកអស់ ដោយសារទឹកហូរអត់ទាន់ ៕
ចែករំលែកព័តមាននេះ