ប្រធានាធិបតីអាមេរិក លោក បារ៉ាក់ អូបាម៉ា កាលពីថ្ងៃទី២៨ កញ្ញា ទទួលស្គាល់ថា សហរដ្ឋអាមេរិកបានមើលស្រាលចំពោះកម្លាំងរបស់អង្គការរដ្ឋអ៊ិស្លាមនៅស៊ីរី ហើយមើលរំលងកម្លាំងរបស់អង្គការនេះ ដែលអាចលើកមកកម្ទេចកងទ័ពអីុរ៉ាក់ ព្រោះគិតថា ស្ថិតតែក្នុងប្រទេសជិតខាងមួយ ។
ក្នុងបទសម្ភាសន៍មួយជាមួយកម្មវិធីទូរទស្សន៍ CBS NEWS លោក អូបាម៉ា ថ្លែងថា ស៊ីរីក្លាយជា GROUND ZERO សម្រាប់ពួកជីហាដលើពិភពលោកទាំងមូល ។ លោកបន្តថា នាយកផ្នែកសើុបការណ៍ជាតិរបស់យើង លោក JIM CLAPPER ទទួលស្គាល់ថា យើងមានការមើលស្រាលចំពោះអ្វីដែលកើតមាននៅស៊ីរី ។
ពេលសួរចង់ដឹងថា តើក្រុងវ៉ាស៊ីនតោន ជឿជាក់ខ្លាំងពេកលើសមត្ថភាព ឬឆន្ទៈប្រយុទ្ធរបស់កងទ័ពអីុរ៉ាក់ ដែលអាមេរិកជួយរៀបចំរហូតមកដល់ខែធ្នូឆ្នាំ២០១១ ហើយកងទ័ពអាមេរិកចំណាយយ៉ាងច្រើន ក្នុងការប្រយុទ្ធប្រឆាំងពួកជីហាដឬយ៉ាងណា ប្រធានាធិបតីអាមេរិកឆ្លើយថា ប្រាកដជាអញ្ចឹងមែនហើយ ។
ពេលជួបសន្ទនាតាមទូរស័ព្ទជាមួយបណ្តាអ្នកកាសែតអាមេរិក កាលពីថ្ងៃទី១៧ កញ្ញា កន្លងមកនេះ លោក CLAPPER បានទទួលស្គាល់រួចហើយថា លោកពុំអាចព្យាករណ៍ពីព្រឹត្តិការណ៍ទាំង២នោះ ។ លោកនិយាយថា អ្វីដែលយើងមើលពុំឃើញនោះ គឺការប្តេជ្ញាប្រយុទ្ធរបស់ក្រុមរដ្ឋអ៊ិស្លាម ។ នោះគឺជាបញ្ហា ព្រោះតែយើងមើលស្រាលលើអង្គការនេះ ហើយជឿជាក់ខ្លាំងពេក លើសមត្ថភាពប្រយុទ្ធរបស់កងទ័ពអីុរ៉ាក់ ។ ខ្ញុំពុំគិតដល់សោះ ពីការបាក់ទ័ពរបស់កងកម្លាំងសន្តិសុខអីុរ៉ាក់នៅភាគខាងជើងប្រទេស៕
ចែករំលែកព័តមាននេះ