ជាដំណឹងអាក្រក់ថ្មីមួយទៀតសម្រាប់គណបក្សអភិរក្សនិយមអង់គ្លេស ។ រដ្ឋមន្ត្រីសង្គមសុីវិលលោក Brooks Newmark ត្រូវបង្ខំចិត្តសុំលាលែងពីតំណែងកាលពីថ្ងៃទី២៧ កញ្ញា កន្លងមក ។មូលហេតុនៃការសុំលាលែងនេះ ព្រោះតែលោកបានបញ្ជូនរូបថតសុិចស៊ីបែបអាសអាភាសឱ្យដល់ស្ត្រីអ្នកកាសែតម្នាក់ ។
លោក Brooks Newmark ថ្លែងថា ខ្ញុំសម្រេចចិត្តសុំលាចេញពីតំណែងរដ្ឋមន្ត្រីសង្គមសុីវិល ព្រោះតែការចេញផ្សាយអត្ថបទមួយកាលពីថ្ងៃទី២៨ កញ្ញា ដោយកាសែត Sunday Mirror ។ កាសែតនោះអះអាងថា លោក Brooks Newmark អាយុ៥៦ឆ្នាំ បានបញ្ជូនរូបថតមួយចំនួនមានលក្ខណៈអាសអាភាសតាមរយៈអ្នកកាសែតឯករាជ្យម្នាក់ផ្ញើទៅឱ្យស្ត្រីអ្នកកាសែតម្នាក់ ដែលមានសមានចិត្តចំពោះនយោបាយ ។
ក្នុងកិច្ចសន្ទនាឯកជនមួយតាមបណ្តាញសង្គម លោក Brooks Newmark បានបញ្ជូនជាពិសេសនូវរូបថតមួយសន្លឹកដែលបង្ហាញរូបអាក្រាតរបស់លោក ។ នេះជារឿងអាស្រូវទី២ រយៈពេលតែប៉ុន្មានម៉ោងរបស់មនុស្សសំខាន់នៃគណបក្សអភិរក្សនិយម បន្ទាប់ពីការដើរចេញរបស់សមាជិកសភាខ្លួនម្នាក់ ទៅចូលក្នុងគណបក្ស UKIP ។ នាយករដ្ឋមន្ត្រីអង់គ្លេស លោក ដាវីដ កាមឺរ៉ូន បានយល់ស្របតាមការសុំលាលែងរបស់លោក Brooks Newmark ៕
ចែករំលែកព័តមាននេះ