រាជធានីភ្នំពេញ ៖ នារីពីរនាក់ជិះម៉ូតូមួយគ្រឿងតាមផ្លូវត្រូវជនសង្ស័យធ្វើសកម្មភាពឆក់យកទូរស័ព្ទដៃម៉ាក iPhone 5 មួយគ្រឿងបណ្តាលឱ្យដួលម៉ូតូរលាត់ដៃជើងទាំងពីរនាក់ ហើយជនសង្ស័យដណ្តើមបានទូរស័ព្ទពីជនរងគ្រោះរួចជិះគេចខ្លួនដោយសុវត្តិភាព ។ ហេតុការណ៍នេះកើតឡើងកាលពីវេលាម៉ោង ១១ និង១០នាទីយប់ថ្ងៃទី ២៦ កញ្ញា ២០១៤ នៅចំណុចមុខវត្តលង្កាតាមផ្លូវព្រះសីហនុ ស្ថិតក្នុងសង្កាត់បឹងកេងកង១ ខណ្ឌចំការមន ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុនារីរងគ្រោះពីរនាក់បានជិះម៉ូតូស្គុបពី មួយគ្រឿង តាមផ្លូវព្រះសីហនុ ក្នុងទិសដៅពីលិចទៅ កើតខណៈមកដល់ចំណុចកើតហេតុនារីរងគ្រោះបានលើកយកទូរស័ព្ទម៉ាក iPhone 5 មកនិយាយពេលនោះក៏មានជនសង្ស័យជិះម៉ូតូស៊ូយស៊ូគីនិច មកឆក់ទូរស័ព្ទពីនារីរងគ្រោះបណ្តាលឱ្យនារីរងគ្រោះដួលម៉ូតូរលាត់ដៃជើង ហើយទូរស័ព្ទបានខ្ទាតចេញពីដៃនារីរងគ្រោះ ស្របពេលនោះក៏មានជនសង្ស័យម្នាក់ទៀតជិះម៉ូតូហុងដាឌ្រីម សេ១២៥ មកដណ្តើមយកបានទូរស័ព្ទរបស់នារីរងគ្រោះរួចជិះគេចខ្លួនដោយសុវត្តិភាព ។
គួរបញ្ជាក់ថាមូលដ្ឋានកើតហេតុខាងលើនេះគឺតែងតែកើតមានករណីឆក់ជាញឹកញាប់ហើយក្រោយពេលកើតហេតុគឺពុំឃើញមានសមត្ថកិច្ចចុះទៅពិនិត្យនោះទេគឺឃើញតែជនបរទេសអង្គុយរិតប្រេងឱ្យនារីរងគ្រោះទាំងពីរនាក់ ។
ចែករំលែកព័តមាននេះ