សម្ពោធអាងចំរោះទឹកការពារបរិស្ថានទឹកសមុទ្រអំណោយក្រុមហ៊ុនសុខាអូតែល
ដោយ ៖ អប្សរា
ថ្ងៃព្រហស្បត្ត៏ ទី១២ ខែសីហា ឆ្នាំ២០១០ ម៉ោង ១៧:២៦
តាសោម
សម្ពោធអាងចំរោះទឹកការពារបរិស្ថានទឹកសមុទ្រ
ខេត្តព្រះសីហនុ ៖ សមិទ្ធផលជាច្រើនបាននិងកំពុងរីកដុះដាលនៅគ្រប់ទីកន្លែងគួរឱ្យចាប់អារម្មណ៍នៅលើទឹកដីទេសចរណ៍មាត់សមុទ្រនៃខេត្តព្រះសីហនុ ។ អាងចំរោះទឹកស្អាតដែលមានទីតាំងស្ថិតនៅតាមបណ្តោយវិថី២ធ្នូ ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ ជាសមិទ្ធផលមួយក្នុងចំណោមសមិទ្ធផលជាច្រើន ត្រូវបានធ្វើពិធីសម្ពោធដាក់ឱ្យប្រើប្រាស់នៅព្រឹកថ្ងៃទី១១ សីហា ក្រោមការអញ្ជើញចូលរួមពីលោកអភិបាលខេត្ត ស្បោង សារ៉ាត់ និងអ្នកឧកញ៉ា សុខ គង់ ប្រធានក្រុមហ៊ុនសូគីម៉ិច និងក្រុមហ៊ុនសុខាអូតែល ព្រមទាំងមន្ត្រីរាជការ និងប្រជាពលរដ្ឋជាច្រើនរូបទៀត ។ នៅក្នុងឱកាសនោះលោក ណុប ឈាង ប្រធានមន្ទីរគមនាគមន៍ខេត្តព្រះសីហនុ បានធ្វើបទបង្ហាញយ៉ាងក្បោះក្បាយពាក់ពន្ធ័ទៅនឹងអាងចំរោះទឹកស្អាតដែលទើបសាងសង់ថ្មីនេះ ។ លោក ហ៊ី ហេង អគ្គនាយករងក្រុមហ៊ុនសុខាអូតែល បានថ្លែងឱ្យដឹងថា ដោយមានការពិនិត្យឃើញក្នុងរយៈពេលកន្លងមក ជាពិសេស នារដូវភ្លៀងមានកាកសំណល់រាវជាច្រើនលាយឡំជាមួយភក់ និងសំរាមបានហូរមកពីតំបន់ជាច្រើននៅក្នុងទីរួមខេត្ត ចាក់ចូលទៅក្នុងអូរ ហើយហូរចូលទៅក្នុងសមុទ្រ ។
ប្រការទាំងនេះបានធ្វើឱ្យមានការប៉ះពាល់យ៉ាងធ្ងន់ធ្ងរដល់បរិស្ថានធម្មជាតិ សោភ័ណភាព ការស្នាក់នៅ ការកំសានុ្តរបស់ភ្ញៀវទេសចរ និងមុខមាត់របស់ខេត្តព្រះសីហនុទើបក្រុមហ៊ុនសុខាអូតែល បានរៀបចំអភិវឌ្ឍន៍ការបង្ហូរទឹកកាកសំណល់ពីទីរួមខេត្ត ដោយបានសាងសង់ជាអាងចំរោះទឹក កាកសំណល់មួយកន្លែងដើម្បីកាត់បន្ថយក្លិនស្អុយសំរាម និងការបំពុលបរិស្ថានទៅក្នុងសមុទ្រ ។ លោកបន្តទៀតថា នេះជាលើកទី២ហើយនៅលើទឹកដីខេត្តព្រះសីហនុ បន្ទាប់ពីក្រុមហ៊ុនសុខាអូតែល បានជួយជួសជុលផ្លូវក្រាលកៅស៊ូនិងដាក់បង្គោលភ្លើងតាមវិថី២ធ្នូ អស់ទឹកប្រាក់ប្រមាណ៣០០.០០០ដុល្លារ ហើយនៅថ្ងៃនេះ ក្រុមហ៊ុនសូគីម៉ិច និងសុខាអូតែល បានធ្វើការប្រគល់សមិទ្ធផលថ្មីមួយទៀតជូនសាលាខេត្តព្រះសីហនុ ដែលមានទឹកប្រាក់ស្មើ២៩១.៩១១ដុល្លារ (ម្ភៃប្រាំបួនម៉ឺនមួយពាន់ប្រាំបួនរយដប់មួយដុល្លារ) ពាក់ពន្ធ័ទៅនឹងការសាងសង់អាងចំរោះទឹកស្អាតនេះលោកបានបញ្ជាក់ឱ្យដឹងថា អាងចំរោះទឹកស្អាតមួយនេះបានចាប់កសាងនៅថ្ងៃទី១ ខែមករា ឆ្នាំ២០១០ ហើយបញ្ចប់នៅថ្ងៃទី៣០ មិថុនា ឆ្នាំ២០១០ ។លោកស្បោង សារ៉ាត់ អភិបាលខេត្តព្រះសីហនុ បានធ្វើសេចក្តីថ្លែងអំណរគុណយ៉ាងជ្រាលជ្រៅចំពោះអ្នកឧកញ៉ាសុខ គង់ ដែលបានចូលរួមចំណែកយ៉ាងសស្រាក់សស្រាំក្នុងការកសាងនិងអភិវឌ្ឍន៍ប្រទេសជាតិជាច្រើនកន្លងមក ជាក់ស្តែង ដូចជាសមិទ្ធផលនៅថ្ងៃនេះជាដើម ។ ឆ្លៀតក្នុងឱកាសនោះដែរអ្នកឧកញ៉ា សុខ គង់ បានធ្វើការចែកអំណោយដល់ប្រជាពលរដ្ឋចំនួន២០០នាក់មកពី៣សង្កាត់ ដែលក្នុងម្នាក់ៗទទួលបានសារុងចំនួន១ផងដែរ ៕
