ខេត្តប៉ៃលិន ៖ គេសង្កេតឃើញប្រជាពលរដ្ឋជាច្រើនគ្រួសារ រស់នៅក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន បានរអ៊ូរទាំ និង រិះគន់ទៅលើថៅកែផ្គត់ផ្គង់ទឹកប្រើប្រាស់ ដែលមានឈ្មោះ លីវ ជុងចំណាន ភេទប្រុស អាយុជាង៥០ឆ្នាំ ថាយកថ្លៃខ្ពស់ហួសពីសមត្ថភាព
ខេត្តប៉ៃលិន ៖ គេសង្កេតឃើញប្រជាពលរដ្ឋជាច្រើនគ្រួសារ រស់នៅក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន បានរអ៊ូរទាំ និង រិះគន់ទៅលើថៅកែផ្គត់ផ្គង់ទឹកប្រើប្រាស់ ដែលមានឈ្មោះ លីវ ជុងចំណាន ភេទប្រុស អាយុជាង៥០ឆ្នាំ ថាយកថ្លៃខ្ពស់ហួសពីសមត្ថភាព ដែលពួកគាត់អាចទទួលយកបាន គឺក្នុង១ម៉ែត្រគូប គេយកថ្លៃរហូតដល់៣០០០រៀល (ទឹកអូរ) ថ្លៃជាងក្រុមហ៊ុនផ្គត់ផ្គង់ទឹក(ស្អាត) នៅក្នុងខេត្ត ។
ទឹកប្រើប្រាស់នេះ មិនមានជាលក្ខណៈស្តង់ដានោះទេ គឺបូមចេញពីក្នុងអូរ ដាក់លក់ចែកចាយឱ្យពួកគាត់ប្រើប្រាស់ ជួនកាលទឹកនេះល្អក់កករ ប្រើប្រាស់ស្ទើរតែមិនកើត តែដោយពួកគាត់គ្មានជម្រើស ក៏បន្តប្រើប្រាស់ទឹកនេះទាំងត្រដាបត្រដួស ជាពិសេសភ័យព្រួយ អំពីបញ្ហាសុខភាពយ៉ាងខ្លាំង ព្រោះម្ចាស់ទឹកអត់បានដាក់ថ្នាំសម្លាប់មេរោគ ។
ប្រភពព័ត៌មានពីប្រជាពលរដ្ឋជាច្រើនគ្រួសាររស់នៅភូមិសង្កាត់ខាងលើ បានរៀបរាប់ឱ្យអ្នកយកព័ត៌មានកោះសន្តិភាពដឹងថា ម្ចាស់ផ្គត់ផ្គង់ទឹកប្រើប្រាស់ប៉ាងរលឹមនេះ ចាប់ផ្តើមដំណើរការ អស់រយៈពេលប្រហែល៣ទៅ៤ឆ្នាំកន្លងមកហើយ ដោយប៉ុន្មានខែមុនដំបូងគេយកថ្លៃសេវាប្រើប្រាស់ទឹកតែក្នុង១ម៉ែត្រគូប ចំនួន២៥០០រៀលប៉ុណ្ណោះ លុះក្រោយមក ស្រាប់តែម្ចាស់ទឹកនេះប្រាប់ថា ខាតច្រើនពេកសុំតម្លើងថ្លៃក្នុង១ម៉ែត្រគូប ចំនួន៣០០០រៀលវិញ ហើយមានតម្លៃថេរតាំងពីពេលនោះមកម្លេះ ។ ប្រភពបានបន្តទៀត បើអ្នកប្រើប្រាស់គ្មានលទ្ធភាពបង់ថ្លៃសេវាទឹកនោះ រហូតដល់ហួសថ្ងៃកំណត់ ខាងម្ចាស់ផ្គត់ផ្គង់ គេនឹងផ្តាច់ឈប់ឱ្យប្រើប្រាស់ បណ្តោះអាសន្នភ្លាម ហើយនៅពេលភ្ជាប់បណ្តាញវិញ គេត្រូវផាកពិន័យចំនួន២០០០០រៀល ហើយថែមទាំងនិយាយគម្រោះគម្រើយ ថា បើគ្មានលទ្ធភាពប្រើប្រាស់ទឹកនេះទេ ចូរផ្តាច់ទៅចុះ ហើយទៅរកទឹកឯណាប្រើប្រាស់បានក៏ទៅចុះ ។
ប្រជាពលរដ្ឋបានបញ្ជាក់ទៀតថា ពួកគាត់ពិតជាមានការឈឺចុកចាប់ខ្លាំងណាស់ ហើយនេះដោយសារតែម្ចាស់ផ្គត់ផ្គង់ទឹកប្រើប្រាស់ប៉ាងរលឹម គេបានរត់ការផ្តាច់មុខម្នាក់ឯង ដោយប្រហែលជាត្រូវរូវគ្នា ជាមួយនឹងមន្ទីរជំនាញពាក់ព័ន្ធ នៅក្នុងខេត្តទេដឹង ទើបបានជាគេបណ្តោយឱ្យម្ចាស់ ផ្គត់ផ្គង់ទឹកប្រើប្រាស់ដែលបូមចេញពីក្នុងអូរបែនេះ បង្កភាពព្យុះភ្លៀងស្រេចតែចិត្តនឹកឃើញ ។
ប្រជាពលរដ្ឋមានសំណូមពរដល់ថ្នាក់ដឹកនាំក្នុងខេត្តប៉ៃលិន ឱ្យជួយចុះទៅពិនិត្យទីតាំង ផ្គត់ផ្គង់ទឹកប្រើប្រាស់ប៉ាងរលឹម មួយកន្លែងនេះផង និងជួយជំរុញដល់ម្ចាស់ផ្គត់ផ្គង់ទឹកប្រើប្រាស់នេះ ឱ្យរៀបចំទឹក ឱ្យទៅជាប្រព័ន្ធទឹកស្អាត តាមលក្ខណៈស្តង់ដា និង ជំរុញឱ្យបញ្ចុះតម្លៃសេវាប្រើប្រាស់ឱ្យបានសមរម្យ ដូចនៅក្នុងទីក្រុងប៉ៃលិនផងដែរ ។
ប្រភពព័ត៌មានពីម្ចាស់ផ្គត់ផ្គង់ទឹកប្រើប្រាស់ប៉ាងរលឹម ឈ្មោះ លីវ ជុងចំណាន បានប្រាប់អ្ន កសារព័ត៌មានឱ្យដឹងថា ការផ្គត់ផ្គង់ទឹកប្រើប្រាស់របស់គាត់ មានច្បាប់ត្រឹមត្រូវ ដោយចេញមកពីមន្ទីរឧស្សាហកម្ម និង សិប្បកម្មខេត្តប៉ៃលិន បើទោះទឹកគាត់បូមចេញពីស្រះឬអូរក៏ពិតមែន តែគាត់ធ្វើកន្លែងស្តប់ទឹក (ស៊ីតែន) មុននឹងបង្ហូរទៅតាមផ្ទះប្រជាពលរដ្ឋនីមួយៗនៅក្នុងភូមិ គឺទឹកនេះមិនមានការល្អក់កករដូចសម្តីប្រជាពពលរដ្ឋបានចោទប្រកាន់នោះទេ ។ ចំណែកតម្លៃវិញគាត់យកថ្លៃសេវាប្រើប្រាស់ចំនួន៣០០០រៀលក្នុង១ម៉ែត្រគូប មិនចំណេញប៉ុន្មាននោះទេ ព្រោះនៅតំបន់នេះជាកន្លែងផ្ទះជួល ខ្លះគេជួលបាន១ខែ ទៅ២ខែ គេមិនបានបង់ប្រាក់ ថ្លៃទឹកឱ្យគាត់ រួចចេញទៅបាត់ ខ្លះទៀតមិនបង់ឱ្យគាត់រហូតដល់គាត់ផ្តាច់បណ្តាញទឹកតែម្តង ។
ចំណែក លោក អ៊ុក តូច ប្រធានមន្ទីរឧស្សាហកម្ម និង សិប្បកម្មខេត្តប៉ៃលិន បានប្រាប់ឱ្យ ដឹងតាមទូរស័ព្ទកាលពីព្រឹកថ្ងៃទី១៩ កញ្ញា នេះថា ម្ចាស់ទឹកប្រើប្រាស់ គេកំពុងតែរត់ច្បាប់ ដោយកន្លងមកគេមានច្បាប់បណ្តោះអាសន្ន ចេញពីមន្ទីររបស់លោក ។ លោកទទួលស្គាល់ថា កន្លងមកលោកមិនធ្លាប់ទៅត្រួតពិនិត្យលើគុណភាពទឹក ដែលម្ចាស់ទីតាំងខាងលើនេះផ្គត់ផ្គង់ជូនប្រជាពល រដ្ឋនោះទេ ។ ប៉ុន្តែរហូតមកដល់ពេលនេះ ខាងម្ចាស់ផ្គត់ផ្គង់ទឹកប្រើប្រាស់នេះ កំពុងតែរត់ច្បាប់ទៅដល់ក្រសួងហើយ នៅពេលភ្ជុំបិណ្ឌរួចនឹងដឹងជាយ៉ាងណាជាក់ជាមិនខានឡើយ ៕
ចែករំលែកព័តមាននេះ