រាជធានីភ្នំពេញ ៖ ព្រឹត្តិការប្រកួតកីឡាវ៉ូវីណាមជ្រើសរើសជើងឯកថ្នាក់ជាតិដែលរៀបចំដោយក្រសួងអប់រំ យុវជន និងកីឡារយៈពេល២ថ្ងៃដែល ចាប់ពីថ្ងៃទី១៨-១៩ កញ្ញា ឆ្នំា២០១៤ស្ថិតក្នុងវិមាននៃពហុកីឡាដ្ឋានជាតិនោះបាន បញ្ចប់ដោយ ទទួលបានលទ្ធផលយ៉ាងគាប់ប្រសើរ ។
អញ្ចើញចូលរួមជាគណៈអធិបតីផ្តល់រង្វាន់ដល់ជ័យលាភីនាឱកាសនោះពីសំណាក់លោក ប៊ូ ជុំសេរី អនុរដ្ឋលេខាធិការក្រសួងអប់រំយុវជននិងកីឡា ព្រមទំាងមន្ត្រីពាក់ព័ន្ធជាច្រើននាក់។ អ្វីដែលគួរកត់សម្គាល់សម្រាប់ការប្រកួតនេះ ក្លឹបចំនួន២ដណ្តើមបានមេដាយច្រើនជាងគេ គឺក្រុមកីឡាករ-កីឡាការិនីក្នុងក្លឹបក្រសួងមហាផ្ទៃ កំពុងតែមានសន្ទុះ និងការរីកចម្រើនខ្លាំងខ្លាផងដែរលើប្រភេទកីឡាវ៉ូវីណាមនេះ ដោយការប្រកួតជើងឯកថ្នាក់ជាតិឆ្នាំ២០១៤នេះ កីឡាករ-កីឡាការិនីវ៉ូវីណាម ក្រសួងមហាផ្ទៃ រកបានមេដាយសរុប ១១គ្រឿងឯណោះ រួមមានមេដាយមាស៥, ប្រាក់៤ និងសំរិទ្ធ២ ខណៈកីឡាករ-កីឡាការិនីមកពីក្លឹបក្រុមហ៊ុនរ័ត្ន សុខន ដណ្ដើមបានមេដាយសរុប ១៨គ្រឿង មានមេដាយមាស៧, ប្រាក់៦ និងសំរិទ្ធ៥ ។
គួរបញ្ជាក់ថា ព្រឹត្តិការណ៍ថ្នាក់ជាតិប្រចាំឆ្នាំនេះ គឺមាន ៥ក្លឹបចូលរួមប្រកួត ក្នុងនោះមានក្លឹបក្រសួងមហាផ្ទៃ, ក្លឹបក្រុមហ៊ុនរ័ត្ន សុខន, ក្លឹបវិទ្យាល័យវត្តកោះ, អង្គការសង្គ្រោះកុមារកម្ពុជា និងក្លឹបវិទ្យាល័យជាស៊ីមសាមគ្គី ដោយមានកីឡាករ-កីឡាការិនីសរុបចំនួន ៩៤នាក់(ស្រី ១៧នាក់ចូលរួម) ។
ចែករំលែកព័តមាននេះ