នាយករដ្ឋមន្ត្រីអេកូស ឬស្កុតឡែន លោក ALEX SALMOND មេខ្លោងរបស់ពួកឯករាជ្យនិយម កាលពីថ្ងៃទី១៩ កញ្ញា បានទទួលស្គាល់បរាជ័យរបស់ក្រុមលោកក្នុងការបោះប្រជាមតិកាលពីថ្ងៃទី១៨ កញ្ញា ខណៈដែលលទ្ធផលស្ថាពរបង្ហាញអ្នកបដិសេធឯករាជ្យភាពជាអ្នកឈ្នះក្នុងសំឡេងដល់ទៅ៥៥,៤២%ទល់នឹង៤៤,៥៨% ។
លទ្ធផលបោះប្រជាមតិនៅតាមទីក្រុងធំៗរបស់អេកូស ដូចជា ទីក្រុងEDIMBOURG និងទីក្រុង GLASGOW ប្រកាសនាពេលមុននេះ ពុំផ្លាស់ប្ដូរនិន្នាការពីដំបូងឡើយ ដោយអ្នកគាំទ្រឯករាជ្យភាពមានសំឡេងនាំមុខតែក្នុងទីក្រុង៤ក្នុងចំណោមទីក្រុងទាំង៣២របស់ស្កុតឡែនប៉ុណ្ណោះ ។ ដូច្នេះតំបន់អេកូសនឹងបន្តស្ថិតនៅក្នុងផ្ទៃចក្រភពអង់គ្លេស ។ នាយករដ្ឋមន្ត្រីអង់គ្លេសលោកដាវីដ កាមីរ៉ូន បានធូរស្រាលក្នុងចិត្តចំពោះលទ្ធផលនៃការបោះប្រជាមតិនេះដោយលោកមានប្រសាសន៍ថា បញ្ហាត្រូវបានដោះស្រាយដោយមនុស្សមួយជំនាន់ ។
លោកបន្តថា ដល់ពេលដែលចក្រភពអង់គ្លេសរួបរួមគ្នាហើយនាំគ្នាដើរទៅមុខ ។ ក្នុងសង្កថាមួយនៅទីក្រុងឡុងដ៍ មេដឹកនាំអភិរក្សនិយមរូបនេះថ្លែងជាពិសេសថា ជ័យជម្នះរបស់អ្នកបដិសេធឯករាជ្យក្នុងការបោះប្រជាមតិបើកផ្លូវទៅរកការកែទម្រង់រដ្ឋធម្មនុញ្ញ ដោយសីុជម្រៅមួយនៅចក្រភពអង់គ្លេស ។ លោកសន្យាប្រគល់ដោយឆាប់រហ័សនូវអំណាចកាន់តែទូលាយដល់អេកូស និងតំបន់ឯទៀតៗរបស់ប្រទេសដូចជាអៀរឡង់ខាងជើងជាដើម ៕
ចែករំលែកព័តមាននេះ