រាជធានីភ្នំពេញ ៖ បន្ទាប់ពីទទួលរងនូវមតិរិះគន់ស្តីពីវិស័យកីឡានៅកម្ពុជាហាក់មិនទាន់មានភាពល្អប្រសើរនោះ ក្រសួងអប់រំ យុវជន និងកីឡា កាលពីរសៀលថ្ងៃទី១៨ កញ្ញា បានរៀបចំវេទិកាសាធារណៈស្តីអំពីកំណែទម្រង់វិស័យអប់រំកាយ និងកីឡាជាលើកដំបូងដើម្បីស្វែងរកយុទ្ធសាស្ត្រ ធ្វើឱ្យវិស័យកីឡារបស់កម្ពុជាកាន់តែមានភាពរឹងមាំតាមរយៈការសម្តែងនូវមតិចំណាប់អារម្មណ៍ និងមតិដោះស្រាយមួយចំនួនដើម្បីជាគន្លឹះក្នុងការធ្វើឱ្យកាន់តែមានភាពប្រសើរឡើងសម្រាប់ការត្រៀមធ្វើជាម្ចាស់ផ្ទះស៊ីហ្គេមនាឆ្នាំ២០២៣ ខាងមុខ ។
ក្នុងកម្មវិធីវេទិកាសាធារណៈដែលធ្វើឡើងនៅមជ្ឈមណ្ឌលហ្វឹកហាត់កីឡាតេក្វាន់ដូ ដូប៊ូយុ៉ង-ខ្មែរនៃពហុកីឡដ្ឋានជាតិអូឡាំពិកនោះមានការចូលរួមពីលោកបណ្ឌិត ហង់ ជួនណារុ៉ន រដ្ឋមន្ត្រីក្រសួងអប់រំ យុវជន និងកីឡា រួមទាំងមន្ត្រីពាក់ព័ន្ធដែលមកពីបណ្តាសហព័ន្ធកីឡាអូឡាំពិក និងមិនអូឡាំពិកជាច្រើននាក់ទៀត ។ ដោយមិនធ្វើអត្ថាធិប្បាយច្រើន លោកហង់ ជួនណារុ៉ន បានលើកឡើងថា លោកមិនមានអ្វីត្រូវនិយាយច្រើនទេ បុ៉ន្តែចង់ឱ្យមន្ត្រីក្រោមឱវាទលើកឡើងអំពីតម្រូវការផ្ទាល់ដែលមានថវិកាសម្រាប់ទូទាត់ ចៀសវាងលើកយកបញ្ហាដែលមិនទាន់មានថវិកាដែលនាំឱ្យមានបញ្ហាកាន់តែវែងឆ្ងាយ ។ ពេលនេះយើងរួមគ្នាដើម្បីលើកយកមតិជារួមផ្តោតទៅលើការកែលម្អសោភ័ណភាពពហុកីឡដ្ឋានជាតិ រួមទាំងបញ្ហាជាច្រើនទៀត ប្រយោជន៍ដើម្បីដាក់ចូលក្នុងគោលនយោបាយជាតិរបស់ក្រសួងតែម្តង ។
លោកឈួន សុខឡេង អគ្គលេខាធិការសហព័ន្ធកីឡាសីប៉ាក់តាក្រកម្ពុជា បានសម្តែងការមិនពេញចិត្តចំពោះការគ្រប់គ្រងពហុកីឡដ្ឋានជាតិនាពេលកន្លងមក ដោយមិនទាន់ឆ្លើយតបទៅតាមតម្រូវការ និងការគិតគូរពីការស្នើសុំរបស់បណ្តាសហព័ន្ធមួយចំនួនសម្រាប់ទីលានហ្វឹកហាត់នៅឡើយ។ លោកបានលើកឡើងថា ប្រភេទកីឡាសីប៉ាក់តាក្រកម្ពុជា ជាប្រភេទកីឡាមួយដែលតែងតែដណ្តើមបានមេដាយជូនជាតិមិនដែលខានឡើយ ។ ជាក់ស្តែង ដូចជាការប្រកួតដណ្តើមពានរង្វាន់ព្រះមហាក្សត្រថៃកាលពីថ្មីកន្លងទៅនេះ កម្ពុជាទទួលបានមេដាយមាសថែមទៀតផង ។ បុ៉ន្តែរហូតមកដល់ពេលនេះ សហព័ន្ធនៅមិនទាន់មានទីលានសម្រាប់ហ្វឹកហាត់ផ្ទាល់ខ្លួននៅឡើយ ។
លោកបានស្នើឱ្យក្រសួងជួយសាងសង់ទីស្នាក់ការ ក៏ដូចជាទីលានសម្រាប់ហ្វឹកហាត់កីឡាសីប៉ាក់តាក្រដើម្បីឱ្យកីឡាមួយនេះកាន់តែរីកចម្រើនទៅមុខទៀត ខណៈដែលសមត្ថភាពកីឡាករ-កីឡាការិនីកំពុងមានសន្ទុះ និងសក្តានុពលក្នុងការប្រកួតទាំងលើឆាកជាតិ និងនៅលើឆាកអន្តរជាតិនោះ ។ មិនត្រឹមតែបុ៉ណ្ណោះ ក្រោយការលើកឡើងរបស់មន្ត្រីក្រសួងអប់រំ ដែលចង់យកចំណែកបរិវេណមួយចំនួននៃពហុកីឡដ្ឋានទៅធ្វើជាអាហារដ្ឋាននោះ លោកឈុន ឡេង បានជំទាស់ដាច់ខាត ដោយលោកអះអាងថា កីឡដ្ឋាននៅប្រទេសលើពិភពលោកមិនបានធ្វើដូចជាអ្វីដែលយើងកំពុងនិយាយនោះទេ ព្រោះវានឹងធ្វើឱ្យប៉ះពាល់ដល់សោភ័ណភាពស្អាត បញ្ហាអនាម័យ និងសុខភាពកីឡាករថែមទៀតផង ។
ក្រៅពីបញ្ហាខាងលើនេះ នៅមានបញ្ហាជាច្រើនទៀតដែលសូមឱ្យវេទិកាសាធារណៈដោះស្រាយដូចជា ការជំរុញឱ្យមានការសាងសង់ទីលានកីឡាបាល់ទាត់នៅតាមបណ្តាខេត្ត និងសម្របសម្រួលឱ្យមានថវិកាស្មើៗគ្នារវាងកីឡាករកាយសម្ព័ន្ធ និងកីឡាករប្រយុទ្ធ ព្រមទាំងការប្រើប្រាស់ពាក្យពេចន៍ក្នុងវិស័យកីឡា ដើម្បីកុំឱ្យមានការភាន់ច្រលំ ។ បន្ទាប់ពីបញ្ហា និងសំណើមួយចំនួនត្រូវបានលើកឡើង លោករដ្ឋមន្ត្រី ហង់ ជួនណារុ៉ន បានកត់ត្រាទុក និងមានប្រសាសន៍ថា ក្រសួងអប់រំ យុវជន និងកីឡា នឹងរៀបចំជាសិក្ខាសាលាមួយក្នុងពេលឆាប់ៗនេះដើម្បីឱ្យកំណែទម្រង់នេះកាន់តែទទួលបានលទ្ធផលល្អប្រសើរ ៕
ចែករំលែកព័តមាននេះ