AFP ៖ រដ្ឋាភិបាលកូរ៉េខាងត្បូងមានគម្រោងប្រមូលពន្ធលើអង្ករ ដែលនាំចូលខ្ពស់ដល់៥១៣% ដើម្បីបន្ធូរបន្ថយកំហឹងរបស់កសិករ បន្ទាប់ពីនយោបាយកំណត់បរិមាណការនាំចូលអង្ករពីបរទេស ត្រូវលុបចោលនៅឆ្នាំក្រោយ ។ រដ្ឋាភិបាលក្រុងសេអ៊ូល បានកំណត់កូតានាំចូលអង្ករពីបរទេសអស់រយៈពេលជាង២ទសវត្សមកហើយ ក្រោមលក្ខខណ្ឌនៃកិច្ចសហប្រតិបត្តិការរួមជាមួយអង្គការពាណិជ្ជកម្មពិភពលោក (WTO) ប៉ុន្តែកិច្ចព្រមព្រៀងខាងលើ នឹងអស់សុពលភាពនៅចុងឆ្នាំ២០១៤ ធ្វើឱ្យរដ្ឋាភិបាលបានប្រកាសកាលពីខែកក្កដា កន្លងមកថា នឹងបើកទីផ្សារអង្ករជាថ្មី រួមទាំងបានសន្យាដល់កសិករកូរ៉េខាងត្បូងថា នឹងប្រមូលពន្ធអង្ករដែលនាំចូលក្នុងកម្រិតខ្ពស់តាមលទ្ធភាព ។
លោក Lee Dong Phil រដ្ឋមន្ត្រីក្រសួងកសិកម្មកូរ៉េខាងត្បូង បានថ្លែងនៅចំពោះមុខគណៈកម្មការកសិកម្ម នៅក្នុងសភា កាលពីថ្ងៃទី១៨ កញ្ញា កន្លងមកថា «យើងនឹងដាក់សំណើប្រមូលពន្ធអង្ករនាំចូលដល់៥១៣% ដល់អង្គការពាណិជ្ជកម្មពិភពលោក ដើម្បីការពារទីផ្សារអង្ករនៅក្នុងប្រទេស» ។ អត្រាពន្ធនេះ ត្រូវឆ្លងកាត់ការត្រួតពិនិត្យនិងបញ្ជាក់ពីអង្គការ WTO ជាមុន ដោយត្រូវចំណាយពេលរង់ចាំយូរជាច្រើនខែទៀត ។
ការនាំចូលអង្ករពីបរទេស គឺជាបញ្ហាលម្អិតផ្នែកនយោបាយនៅកូរ៉េខាងត្បូង ព្រោះកសិករនៅទីជនបទមានក្តីបារម្ភថា ទិន្នផលរបស់ពួកគេនឹងធ្វើការប្រកួតប្រជែងទីផ្សារអង្ករពីបរទេស ដែលមានតម្លៃថោកមិនបាន ។ នៅក្នុងកិច្ចព្រមព្រៀងរវាងកូរ៉េខាងត្បូងនិងអង្គការពាណិជ្ជកម្មពិភពលោក ក្នុងពេលបច្ចុប្បន្នបានកំណត់បរិមាណនាំចូលអង្ករក្នុងកម្រិតទាប ដោយនៅក្នុងឆ្នាំនេះមានប្រហែល៤១០.០០០តោន ឬ១០%នៃតម្រូវការអង្ករនៅក្នុងប្រទេស ៕
ចែករំលែកព័តមាននេះ