យោងតាមកាសែតមួយរបស់កងទ័ពចិនថា ប្រព័ន្ធម៉ាស៊ីនត្រជាក់ថ្មីផលិតដោយផ្នែកស្រាវជ្រាវរបស់កងទ័ពចិន នឹងអាចជួយធ្វើឱ្យមានភាពត្រជាក់ក្នុងរថក្រោះប្រយុទ្ធសម្រាប់កងទាហាន ។ បណ្តារថក្រោះប្រយុទ្ធរបស់កងទ័ពចិនចាប់តាំងពីយូរមកហើយបំពាក់ប្រព័ន្ធម៉ាស៊ីនត្រជាក់សម្រាប់តែបណ្តាឧបករណ៍អេឡិចត្រូនិកក្នុងរថក្រោះ តែប្រព័ន្ធនោះពុំមែនសម្រាប់កងទាហានឡើយ ។
យោងតាមអត្ថបទរបស់កាសែតយោធាចិននោះថា ប្រព័ន្ធម៉ាស៊ីនត្រជាក់ថ្មីផលិតដោយផ្នែកស្រាវជ្រាវរបស់កងទ័ពអាចផ្តល់ខ្យល់ត្រជាក់ដល់គ្រប់កន្លែងក្នុងរថក្រោះតាមរយៈប្រហោងបញេញ៨ នៅខាងក្នុងរថក្រោះ ។ ប្រព័ន្ធនោះអាចបញ្ចុះកម្តៅខាងក្នុងរថក្រោះបាន៥អង្សាសេ ទាបជាងកម្តៅខាងក្រៅ ។
លោក HUANG GUANSHENG វិស្វករជាន់ខ្ពស់របស់ផ្នែកស្រាវជ្រាវកងទ័ពគូសបញ្ជាក់ថា សីតុណ្ហភាពខាងក្នុងរថក្រោះអាចមានដល់ទៅ៥០អង្សាសេកាលពីមុន ព្រោះបណ្តាឧបករណ៍អេឡិចត្រូនិកបញ្ចេញកម្តៅច្រើន ។ ក្នុងស្ថានភាពបែបនេះកងទាហានហេវហត់អស់កម្លាំង ហើយអាចបាត់បង់ការប្រុងប្រយ័ត្ន រហូតដល់ខ្យល់គ ឬក្អួត ។ ម្យ៉ាងទៀតបណ្តាឧបករណ៍ទំនើបនានាក្នុងរថក្រោះអាចខូចទៀតផង ព្រោះតែកម្តៅខ្ពស់ដោយគ្មានប្រព័ន្ធម៉ាស៊ីនត្រជាក់ ៕
ចែករំលែកព័តមាននេះ