ខេត្តបាត់ដំបង ៖ ជនមិនស្គាល់មុន២នាក់ ដែលគេអះអាងថាមានកាំភ្លើងខ្លីមួយដើមផង បានកាត់សោផ្ទះមន្ត្រីនគរបាលចូលនិវត្តន៍ម្នាក់ ហើយចូលលួចទ្រព្យសម្បត្តិ និងគ្រឿងអលង្ការអស់គ្មានសល់ កាលពីវេលាម៉ោង៨និង៣០នាទីព្រឹក ថ្ងៃទី១៨ កញ្ញា ស្ថិតក្នុងភូមិពពាលខែ ឃុំអូរតាគី ស្រុកថ្មគោល ហើយបានចាប់ស្ត្រីម្ចាស់ផ្ទះ ចងដៃជើង នៅគ្រាដែលគាត់ត្រឡប់មកពីផ្សារវិញចូលទៅទាន់ ពេលពួកចោរកំពុងធ្វើសកម្មភាព ។
មន្ត្រីនគរបាលមូលដ្ឋានបានប្រាប់ថា ហេតុការណ៍នេះកើតឡើង ខណៈម្ចាស់ផ្ទះ២នាក់ប្ដីប្រពន្ធជិះរថយន្តទៅផ្សារអស់ ក្រុមចោរក៏កាត់ផ្ដាច់សោទ្វារក្រោយ រួចចូលទៅគាស់ទូក្នុងផ្ទះរើកកាយលួចយកគ្រឿងអលង្ការ និងប្រាក់អស់ជាច្រើន ។ លុះស្ត្រីម្ចាស់ផ្ទះមកទាន់ ពួកចោរក៏ចាប់ចងដៃចងជើង និងវាយយកទូរស័ព្ទដៃទៀត រួចរត់ចេញពីផ្ទះគេចខ្លួនតាមផ្លូវក្រោយបាត់ស្រមោល មុនពេលមានការភ្ញាក់ផ្អើលឡើង ។ មន្ត្រីដដែលបញ្ជាក់ថា ម្ចាស់ផ្ទះឈ្មោះគី គិត អាយុ៦១ឆ្នាំ ជាមន្ត្រីនគរបាលចូលនិវត្តន៍ រីឯភរិយាគាត់ដែលត្រូវជនដៃដល់ចាប់ចងដៃជើង ឈ្មោះ លឿង ឃិញ អាយុ៦០ឆ្នាំ ។
លោក គី គិត បាននិយាយក្រោយពេលកើតហេតុថា នៅក្នុងផ្ទះមានតែរូបលោកនិងភរិយាប៉ុណ្ណោះ ដែលស្នាក់នៅ ហើយនៅព្រឹកកើតហេតុនេះ លោកនិងភរិយាបានបិទទ្វារចាក់សោផ្ទះ រួចនាំគ្នាជិះរថយន្តទៅផ្សារ លុះត្រឡប់មកវិញ ក៏ពើបប្រទះនឹងរឿងនេះតែម្ដង។ លោកបញ្ជាក់ថា ពេលមកដល់ផ្ទះ លោកបានឱ្យប្រពន្ធចូលផ្ទះម្នាក់ឯង រីឯលោកបានបើករថយន្តទៅលាងនៅក្បែរនោះ ។ ប៉ុន្តែបន្តិចក្រោយមក ស្រាប់តែប្រពន្ធគាត់រត់មកប្រាប់ថា មានមនុស្សកាត់សោទ្វាចូលផ្ទះ លួចយកទ្រព្យសម្បត្តិអស់គ្មានសល់ ថែមទាំងចាប់គាត់ចងទៀត ឮដូច្នេះរូបលោកក៏រត់ទៅមើល ឃើញមានរឿងបែបនេះមែន ក៏រាយការណ៍ប្រាប់សមត្ថកិច្ចភា្លមៗដែរ តែក្រុមចោរបានរត់គេចខ្លួនអស់ទៅហើយ ។
រីឯអ្នកស្រី លឿង ឃិញ ដែលបានរងគ្រោះផ្ទាល់ក្នុងហេតុការណ៍នេះ បានបំភ្លឺថា ពេលគាត់ចុះពីរថយន្តដើរមកដល់ផ្ទះ ស្រាប់តែឃើញសោទ្វារនៅចំហៀងខាងក្រោយដាច់បាត់ ធ្វើឱ្យគាត់មានការសង្ស័យ ក៏ដើរលបៗចូលទៅក្នុងផ្ទះ តែត្រូវជនមិនស្គាល់មុខ២នាក់ស្ទុះមកចាប់គាត់ភ្ជង់នឹងកាំភ្លើងខ្លី ហើយអូសចូលក្នុងផ្ទះ។ អ្នកស្រីបន្តថា គ្រានោះពួកចោរបានយកខ្សែអង្រឹងចាប់គាត់ចងដៃចងជើងធាក់គាត់ផ្តួលទៅលើឥដ្ឋការ៉ូ ហើយលូកយកទូរស័ព្ទគាត់អស់២គ្រឿងពីក្នុងហោប៉ៅខោ រួចរត់ចេញក្រៅគេចខ្លួនបាត់ តែមិនដឹងថាពួកគេចេញតាមច្រកណាទេ ។ អ្នកស្រី លឿង ឃិញ បាននិយាយថា ក្រោយពីជនមិនស្គាល់មុខចេញផុត អ្នកស្រីបានព្យាយាមរើពីចំណងប្រហែល៥នាទីទើបរួច ហើយក៏រត់ទៅហៅប្ដីគាត់នៅកន្លែងលាងរថយន្តភ្លាមដែរ ។ គាត់បញ្ជាក់ថា ក្រុមចោរបានចូលទៅគាស់ទូរើកកាយលួចយកគ្រឿងអលង្ការដូចជា ខ្សែដៃមាស១ខ្សែទម្ងន់២តម្លឹង ខ្សែ.កមាស១ខ្សែទម្ងន់១តម្លឹង ចិញ្ចៀនពេជ្រ១វង់ ក្រវិលប្លាទីន១គូ ប្រាក់ថៃ១៥.០០០បាត ប្រាក់ដុល្លាចំនួន៨០ដុល្លា និងទូរស័ព្ទដៃ២គ្រឿង ។
ជុំវិញសកម្មភាពជនមិនស្គាល់មុខកាត់សោទ្វារចូលលួចទ្រព្យសម្បត្តិក្នុងផ្ទះមន្ត្រីនគរបាលចូលនិវត្តន៍ទាំងព្រឹកនេះ ហាក់មិនមានការភ្ញាក់ផ្អើលដល់អ្នកជិតខាងទេ ទំនងដោយសារផ្ទះនេះស្ថិតក្នុងដីឡូត៍ឆ្ងាយពីផ្ទះអ្នកជិតខាងបន្តិច។ រីឯតម្រុយក៏គ្មានសាក្សីណាម្នាក់អះអាងថា បានប្រទះឃើញមនុស្សប្លែកមុខចូលផ្ទះនេះដែរ ក្រៅពីស្ត្រីម្ចាស់ផ្ទះ ដែលប្រាប់សមត្ថកិច្ចថា ជនសង្ស័យទាំង២នាក់នោះ មានវ័យប្រហែល៣០ឆ្នាំ ស្លៀកពាក់ស៊ីវិលប្រដាប់ដោយកាំភ្លើងខ្លីមួយដើម ដែលបានភ្ជង់គាត់ តែមិនស្គាល់មុខពួកគេនោះទេ ។ លោក ជេត វណ្ណនី ស្នងការរងខេត្ត ដែលចុះអន្តរាគមន៍ក្នុងករណីនេះ បានមានប្រសាសន៍ថា ពិតជាមានជនមិនស្គាល់មុខគាស់ទម្លុះទម្លាយទ្វារចូលលួចទ្រព្យសម្បត្តិក្នុងផ្ទះខាងលើនេះមែន ។ លោកថា តាមការអះអាងពីម្ចាស់ផ្ទះគឺជនសង្ស័យបានកាត់សោទ្វារផ្ទះចូលទៅសម្ងំគាស់ទូយកគ្រឿងអលង្កា ពេលម្ចាស់ផ្ទះ២នាក់ប្ដីប្រពន្ធចេញទៅផ្សារអស់ ។
លោកស្នងការរងបានថ្លែងទៀតថា ជនដៃដល់ទំនងជាតាមឃ្លាំមើលសកម្មភាពចេញចូលរបស់ម្ចាស់ផ្ទះច្រើនថ្ងៃហើយ ទើបអាចចូលផ្ទះនេះបានទាំងព្រឹក និងចន្លោះពេលម្ចាស់ផ្ទះចេញទៅផ្សារ ។ លោកថា ពេលនេះកម្លាំងជំនាញកំពុងស្រាវជ្រាវ និងតាមឃ្លាំមើលមុខសញ្ញាមួយចំនួន ដែលធ្លាប់មានប្រវត្តិមិនល្អកន្លងមកនៅក្នុងមូលដ្ឋាន និងមុខសញ្ញាដទៃទៀត ៕
ចែករំលែកព័តមាននេះ