រាជធានីភ្នំពេញ ៖ កម្មវិធីប្រកួតជ្រើសរើសកញ្ញាឯកទេសចរណ៍អន្តរជាតិត្រូវបានទទួលស្គាល់ទូទាំងពិភពលោក ដោយមានការចូលរួមពីបណ្ដាប្រទេសជាង៦០ និងធ្វើឡើងជារៀងរាល់ឆ្នាំ ។ សម្រាប់កម្ពុជា ការប្រកួតកញ្ញាឯកទេសចរណ៍អន្តរជាតិ ធ្វើឡើងជាលើកទី២ហើយក្នុងឆ្នាំនេះ រៀបចំដោយក្រុមហ៊ុន Aplus Asia Network និងមានកិច្ចសហការពីក្រសួងវប្បធម៌ និងវិចិត្រសិល្បៈ។
ក្នុងឆ្នាំនេះអ្នករៀបចំកម្មវិធីបានប្រកាសឱ្យបេក្ខនារីទូទាំងប្រទេស ដែលមានចំណាប់អារម្មណ៍ក្នុងការប្រកួតកញ្ញាឯកទេសចរណ៍អន្តរជាតិ ដាក់ពាក្យប្រកួតអោយបានច្រើនដើម្បីលើកស្ទួយវិស័យទេសចរណ៍ និងបង្ហាញវប្បធម៌ដ៏ល្អរបស់កម្ពុជា ដល់ពិភពលោក ។
លោក Eric Lim អ្នកគ្រប់គ្រងប្រចាំតំបន់នៃក្រុមហ៊ុន Aplus Asia Network មានប្រសាសន៍នៅក្នុងសន្និសីទសារព័ត៌មាន នៅសណ្ឋាគារណាហ្គាវើល កាលពីព្រឹកថ្ងៃទី ១៨ កញ្ញា ២០១៤ ថា ការប្រកួតបវរកញ្ញាឯក កម្ពុជា ក្នុងគោលបំណងដើម្បីអោយកម្ពុជាមានការទាក់ទងកាន់តែជិតស្និទ្ធឡើង ជាមួយបណ្ដាប្រទេសនានានៅលើសាកលលោកដែលបានបញ្ជូនកញ្ញាឯកប្រចាំប្រទេសរបស់ខ្លួនចូលរួមប្រកួតជាលក្ខណៈអន្តរជាតិ ។ កម្មវិធីនេះធ្វើឱ្យវិស័យទេសចរណ៍កាន់តែល្អប្រសើរឡើងថែមទៀត និងថែមទាំងបានចងភ្ជាប់មិត្តភាពរវាងគ្នា កាន់តែប្រសើរឡើង ។
លោក Eric Lim ថ្លែងថា តាមរយៈជោគជ័យរបស់ក្រុមហ៊ុន និងដោយមានការគាំទ្រពីក្រសួងវប្បធម៌ និងវិចិត្រសិល្បៈ នាឆ្នាំកន្លងមកនេះ សម្រាប់ឆ្នាំនេះសូមប្រកាសបើកជាផ្លូវការនូវការដាក់ពាក្យចូលរួមប្រកួតកញ្ញាឯកទេសចរណ៍តំណាងប្រទេសកម្ពុជានៅថ្ងៃទី ៥ និងថ្ងៃទី១៩ ខែតុលា ២០១៤ នៅសណ្ឋាគារ ណាហ្គាវើ ។ លក្ខខណ្ឌចំពោះបេក្ខនារីដាក់ពាក្យចូលរួមប្រកួត ត្រូវនៅលីវ មានអាយុចាប់ពី១៨ឆ្នាំ ដល់២៥ ឆ្នាំ មានកំពស់ចាប់ពី១,៦៣ម៉ែត្រឡើងទៅ មានទំងន់មិនលើសពី ៥៥គីឡូក្រាម មានអត្តចរិត និងអាកប្បកិរិយា សុភាពរាបសា ។ វគ្គផ្ដាច់ព្រត្រ័នឹងប្រព្រឹត្តទៅនៅថ្ងៃទី ១៥ ខែវិច្ឋិកា ២០១៤ នៅសណ្ឋាគារ ណាហ្គាវើល បន្ទប់ Grand Ballroom ។
នៅវគ្គផ្ដាច់ព្រ័ត្រ ក្រុមបេក្ខនារីចុងក្រោយត្រូវប្រកួតយកជ័យលាភីដែលផ្ដល់ពិន្ទុយ៉ាងសុក្រឹតទៅតាមផ្នែក នីមួយៗ ដូចជា ភាពស្រស់ស្អាត ប្រជាប្រិយ ទេពកោសល្យ ការតុបតែងបែបប្រពៃណី ការសំដែង និងភាពទាក់ទាញជាដើម ។ សម្រាប់បេក្ខនារី៨នាក់ចុងក្រោយ នឹងបានទទួលរង្វាន់ជាទឹកប្រាក់ និងអាហារូបករណ៍ដើម្បីបន្តការសិក្សា ។ បេក្ខនារី ជ័យលាភីលេខ១ នឹងទទួលបានរង្វាន់បន្ថែមទៅលើការចំណាយទូទៅសម្រាប់ចូលរួមប្រកួតកញ្ញាឯកទេសចរណ៍អន្តរជាតិលើកទី១៨ នៅប្រទេសម៉ាឡេស៊ី នាថ្ងៃទី ៣១ ធ្នូ ២០១៤ ជាមួយសំបុត្រយន្តហោះធ្វើដំណើរទៅមក និងការស្នាក់នៅសណ្ឋាគារលំដាប់ផ្កាយប្រាំ សរុបទឹកប្រាក់មិនក្រោម១៥.០០០ដុល្លារ ៕
ចែករំលែកព័តមាននេះ