ខេត្តបន្ទាយមានជ័យ ៖ អ្នកបើករថយន្តចេញចូលទៅប្រកបរបររកស៊ីលើទឹកដីថៃជាច្រើននាក់បានលើកគ្នាមកតវ៉ានៅមាត់ច្រកទ្វារអន្តរជាតិប៉ោយប៉ែត កាលពីព្រឹកថ្ងៃទី១៨ កញ្ញា ដើម្បីទាមទារលក្ខខណ្ឌមួយចំនួនឲ្យអាជ្ញាធររកដំណោះស្រាយជាមួយភាគីថៃអនុញ្ញាតឲ្យពួកគេចេញចូលទៅដីថៃដល់ស្រុកអារញ្ញ និងសុំស្ទិកឃ័រ(អាទិភាពចេញចូលដីថៃ)ដែលភាគីថៃដកពីតាមរថយន្តមួយចំនួនមកវិញ ។
ការតវ៉ានេះបានធ្វើឡើងតាំងពីម៉ោងជិត១១ព្រឹកថ្ងៃទី១៨ កញ្ញា ដែលពួកគេបានប្រមូលផ្ដុំគ្នានៅក្នុងបរិវេណវត្តបាលិលេយ្យ ភូមិក្បាលស្ពាន២ សង្កាត់ប៉ោយប៉ែត បន្ទាប់មកក៏បន្តដំណើរទៅមាត់ច្រកទ្វារព្រំដែន រួចនាំគ្នាយករថយន្តដាក់ពាំងពេញផ្លូវតែម្ដង ។ ក្នុងពេលតវ៉ានោះគេឃើញមន្ត្រីទីស្នាក់ការច្រកទ្វារ និងសមត្ថកិច្ចពាក់ព័ន្ធបានព្យាយាមធ្វើការសម្របសម្រួលជាមួយក្រុមអ្នកតវ៉ាឲ្យនាំគ្នាយករថយន្តចេញពីច្រកទ្វារអន្តរជាតិប៉ោយប៉ែតបញ្ចៀសការកកស្ទះដល់រថយន្តដឹកទំនិញនិងការធ្វើដំណើររបស់ភ្ញៀវទេសចរបរទេសឆ្លងកាត់ ហើយរកដំណោះស្រាយតាមកិច្ចប្រជុំវិញ ។ ប៉ុន្តែមិនបានលទ្ធផលទេ ដោយក្រុមអ្នកតវ៉ាលើកឡើងថា ទំនិញថៃចូលមកកម្ពុជាក្នុងមួយឆ្នាំៗរាប់រយពាន់តោន គិតជាប្រាក់រាប់ពាន់លានដុល្លារ និងដោយសេរី ហេតុអី្វខាងខ្មែរគ្រាន់តែចូលរថយន្តទៅដីថៃត្រឹមស្រុកអារញ្ញមិនបាន ? មិនតែប៉ុណ្ណោះសមត្ថកិច្ចជំនាញថៃឆែកឆេរមិនអស់ចិត្ត មានទាំងទាហានឆែកឆេរបន្ថែមទៀត ។
ពួកគេលើកឡើងថា កាលពីមុនការចេញចូលទៅដីថៃមានលក្ខណៈធម្មតានិងរាល់ថ្ងៃ ហើយទៅដល់ស្រុកអារញ្ញអាចទិញដូរទំនិញបានតែក្រោយពីរបបគ្រប់គ្រងដោយក្រុមយោធាអ្នកមានយានយន្តពិបាកជាខ្លាំងក្នុងការចូលទៅដីថៃត្រូវពួកគេតម្រូវឲ្យចូលទៅមួយសប្ដាហ៍បានតែម្ដង ហើយបានត្រឹមតែផ្សាររុងក្លឿតែប៉ុណ្ណោះ ។ ម្យ៉ាងរថយន្តមួយចំនួនត្រូវគេដកស្ទីកឃ័រទៀត ទើបលើកគ្នាសុំឲ្យអាជ្ញាធរដោះស្រាយជាមួយភាគីថៃសម្រួលយ៉ាងណាឲ្យពួកគេចេញចូលឲ្យបានរាល់ថ្ងៃនិងទៅដល់ស្រុកអារញ្ញដូចកាលពីមុន ព្រមទាំងទាមទារយករាល់ស្ទីកឃ័រដកហូតនោះមកវិញ ។
ទោះជាយ៉ាងណា ការតវ៉ានេះត្រូវបានរំសាយទៅវិញនៅម៉ោងជិត១២ថ្ងៃត្រង់ថ្ងៃដដែលដោយទៅជួបជុំដោះស្រាយគ្នានៅសាលាក្រុងប៉ោយប៉ែតតាមការស្នើរសុំរបស់អាជ្ញាធរ និងសមត្ថកិច្ចពាក់ព័ន្ធនៅក្នុងក្រុងនិងច្រកទ្វារអន្តរជាតិប៉ោយប៉ែតវិញ ។ នៅក្នុងជំនួបប្រជុំជាមួយអាជ្ញាធរក្រុង ក្រុមអ្នកតវ៉ាបានស្នើសុំឲ្យអាជ្ញាធរជួយ៤ចំណុចគឺ ៖ ១- សុំឲ្យរថយន្តខ្មែរចូលដល់ស្រុកអារញ្ញខេត្តស្រះកែវ ។ ២- សុំកុំឲ្យទីតាំងដែលទទួលពលករបញ្ជូនត្រឡប់ពីថៃមានអ្នកលក់សំបុត្ររថយន្តក្រុងនៅទីនោះដើម្បីទុកឱកាសឲ្យអ្នករត់ម៉ូតូឌុបបានរកស៊ីដឹកម៉ូយផង ។ ៣- សុំកុំឲ្យមានស្ថាប័នគយដាក់ទីតាំងច្រើនកន្លែងពេកដែលចាប់ពីក្រុងប៉ោយប៉ែតទៅទីរួមខេត្តបន្ទាយមានជ័យ
៤- សុំឲ្យអាជ្ញាធរជួយដោះស្រាយបើកផ្លូវមួយខ្សែឡើងវិញនៅក្នុងក្រុមទី៩ ភូមិសាមគ្គីមានជ័យ ដែលមានប្រជាពលរដ្ឋ១០២គ្រួសារប្ដឹងមន្ត្រី២នាក់នៅប៉ោយប៉ែតបិទផ្លូវយកដីមួយកន្លែងនេះ ។
ទោះជាយ៉ាងណា ក្នុងអង្គប្រជុំអាជ្ញាធរក្រុងបានលើកឡើងថា រាល់បញ្ហាទាំងអស់ខាងលើនឹងលើកយកមកធ្វើការដោះស្រាយរាល់ករណីដែលអាចធ្វើទៅបាន និងករណីណាដែលហួសដែនសមត្ថកិច្ច លោកនឹងរាយការណ៍ជូនថ្នាក់លើដើម្បីធ្វើការដោះស្រាយជាបន្តទៀត ។ ក្រុមអ្នកតវ៉ាបានព្រមានថា បើក្នុងពេលឆាប់ៗនេះអាជ្ញាធរមិនមានដំណោះស្រាយតាមការទាមទារទេ ពួកគេនឹងលើកគ្នាធ្វើការតវ៉ាបន្តទៀត ៕
ចែករំលែកព័តមាននេះ