រាជធានីភ្នំពេញ ៖ ពិធីការិនី១រូបដែលរវល់តែនិយាយទូរស័ព្ទ ខណៈពេលកាន់ចង្កូតរថយន្តបានជ្រុលទៅបុកម៉ូតូមួយគ្រឿងពីក្រោយបណ្តាលឲ្យដួលរងរបួសមិនសូវធ្ងន់ធ្ងរប៉ុន្មានទេ ប៉ុន្តែដោយសារអ្នករងរបួសធ្លាប់មានប្រវត្តិគ្រោះថ្នាក់កន្លងមក ធ្វើឱ្យជំងឺចាស់រើឡើងក៏ដួលប្រកាច់បែកពពុះមាត់ ។ ហេតុការណ៍នេះកើតឡើងកាលពីវេលាម៉ោង១០និង៥០នាទីយប់ថ្ងៃទី១៧ កញ្ញា លើកំណាត់ផ្លូវជាតិលេខ៤ មុខវត្តជម្ពូវ័ន ភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានបានឲ្យដឹងថា រថយន្តពិធីការិនីម៉ាកអេស្កាឡែតមីនី ពណ៌ស បើកបរដោយលោកស្រីសុខ សោម៉ាវត្តី ជាពិធីការិនីទូរទស្សន៍បាយ័ន រួមដំណើរជាមួយប្អូនស្រីម្នាក់ក្នុងទិសដៅពីកើតទៅលិចស្របគ្នាជាមួយម៉ូតូស្មាសវី ពណ៌ខ្មៅ ពាក់ស្លាកលេខភ្នំពេញ1BL-6785 ដែលជិះគ្នា២នាក់ ទើបត្រឡប់មកពីទិញប្រេងម៉ាស៊ីន ។ ខណៈមកដល់ចំណុចខាងលើពិធីការិនីជាអ្នកបើកបររវល់តែនិយាយទូរស័ព្ទបានបើករថយន្តជ្រុលចង្កូតទៅបុកពីក្រោយម៉ូតូបណ្ដាលឱ្យដួល បោកទៅខាងឆ្វេងរថយន្តធ្វើឲ្យអ្នកបើកម៉ូតូដួលទ្រោបលើកញ្ចក់ម៉ូតូ ចំណែកអ្នករួមដំណើរជាមួយរងរបួសល្មមដែរ ។
ក្រោយពេលកើតហេតុអ្នកជិះម៉ូតូទាំង២នាក់អាចក្រោកដើរបាន ព្រោះស្ថានភាពរបួសនោះមិនជាធ្ងន់ធ្ងរប៉ុន្មានទេ ហើយប្អូនស្រីរបស់ពិធីការិនីក៏ចុះពីរថយន្តយកប្រាក់១០ដុល្លារទៅឲ្យជនរងគ្រោះតែគេមិនព្រមយកទេ ត្រូវបាននារីជាប្អូនស្រីនោះនិយាយថា បុករលាត់ដៃរលាត់ជើងតិចតួចសោះមិនព្រមយក១០ដុល្លារទេ បែរជាធ្វើពុតជាឈឺធ្ងន់ទៅវិញ ។ អ្នកបើកម៉ូតូដែលរងរបួសរលាត់ដៃជើងឈ្មោះ ធីម ប៊ុនថេន ភេទប្រុស អាយុ២៨ឆ្នាំ មានលំនៅភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ បានទូរស័ព្ទហៅឪពុកមាមកជួយអន្តរាគមន៍ ។ រីឯពិធីការិនីបានទូរស័ព្ទហៅស្វាមីគឺលោក ទូច ដាណារ៉ា ដែលជាកូនប្រុសលោកឧត្តមសេនីយ៍អតីតស្នងការនគរបាលរាជធានីផងដែរ ហើយមិនយូរប៉ុន្មានលោក ទូច ដាណារ៉ា ជាប្ដីបានបើករថយន្ត កាមរីហាយប្រ៊ីដ ពណ៌ស ពាក់ស្លាកលេខនគរបាល២.១២៤៩ មួយគ្រឿងមកដល់ឱ្យដឹកភរិយាចេញទៅបាត់ដោយលោកជាអ្នកចេញមុខដោះស្រាយ ។
ខណៈពេលកំពុងតែដោះស្រាយគ្នាស្រាប់តែអ្នកបើកម៉ូតូ ដួលបែកពពុះមាត់ហើយប្រកាច់វៀចមាត់បញ្ឈរភ្នែកស្លឺតែម្តង ទើបសមត្ថកិច្ចឱ្យរថយន្តសាមុយបញ្ជូនទៅព្យាបាលនៅមន្ទីរពេទ្យកាល់ម៉ែត ។ បើតាមសម្តីរបស់ឪពុកមាជនរងគ្រោះបានឲ្យដឹងថា កាលពី៣ឆ្នាំមុនជនរងគ្រោះធ្លាប់ជិះម៉ូតូបុកក្របីចងនៅតាមចិញ្ចើមផ្លូវដួលបែកក្បាលសន្លប់ ប៉ុន្តែចាប់តាំងពីព្យាបាលជាសះស្បើយហើយមិនដែលប្រកាច់ទេ ទើបតែដួលលើកនេះ អាចប៉ះពាល់សរសៃខួរក្បាលទើបប្រកាច់បែកពពុះមាត់បែបនេះ ។
លោក ទូច ដាណារ៉ា ជាប្តីរបស់ពិធីការិនីសុខ សោម៉ាវត្ដី បានប្រាប់អ្នកយកព័ត៌មានថា សូមឲ្យអ្នកយកព័ត៌មានពិនិត្យមើលផង ករណីគ្រោះថ្នាក់ចរាចរណ៍ជារឿងផ្សេង ចំណែកជនរងគ្រោះដែលប្រកាច់ជាជំងឺចាស់របស់គាត់ទេ។ ក្រោយពេលកើតហេតុរថយន្តនិងម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌពោធិ៍សែនជ័យរង់ចាំដោះស្រាយនៅពេលក្រោយ ៕
ចែករំលែកព័តមាននេះ