រាជធានីភ្នំពេញ ៖ រឿងរ៉ាវអំពើហិង្សារបស់បុរសជាប្តីមកលើប្រពន្ធ ដែលនឹងពណ៌នាខាងក្រោមនេះ ថ្វីបើកើតឡើងយូរបន្តិចមែនក្តី តែវាបានដិតជាប់ក្នុងអារម្មណ៍អ្នកដែលបានឃើញតាមរយៈវីឌីអូឃ្លីបមួយ ។ ពិសេសអ្នកដែលបានឃើញក្នុងហេតុការណ៍នេះដោយផ្ទាល់ ដែលមកដល់ពេលនេះ សមត្ថកិច្ចនិងស្ថាប័នច្បាប់មិនទាន់មានវិធានការណ៍ណាមួយនៅឡើយចំពោះជនដៃដល់នេះ ធ្វើឱ្យការទន្ទឹងរង់ចាំ របស់ស្ត្រីរងគ្រោះក្លាយជាក្តីអស់សង្ឃឹមទៅលើអ្នកកាន់ច្បាប់ហើយ ។
ក្នុងរូបភាពវីឌីអូឃ្លីបមួយដែលថតដោយទូរស័ព្ទដៃមានរយៈពេល២២នាទីនិង៤៧វិនាទីបានបង្ហាញនូវសកម្មភាពអំពើហិង្សាយ៉ាងព្រៃផ្សៃមួយ ដែលបង្កឡើងដោយបុរសជាប្តី បានជិះសង្កត់ពីលើប្រពន្ធ ដោយបានប្រើកណ្តៀវ ត្រកងកប្រពន្ធ និងសង្កត់ក្បាលជាប់ ផ្ទប់ទៅដីប្រៀបបាននឹងកូនម្រឹក ស្ថិតក្នុងចង្កូមខ្លា ។ ឬអាចនិយាយបានថា មច្ចុរាជកំពុងតថ្លៃអាយុជីវិតស្ត្រីជាប្រពន្ធរួចទៅហើយ បើសិនជាប្តីកន្ត្រាក់កណ្តៀវតែមួយខ្វាច់ កប្រពន្ធពិតជានឹងដាច់ដូចដើមស្រូវជាពុំខាន ។
ក្នុងរូបភាពនេះ ថ្វីបើមិនសូវច្បាស់ណាស់ពេកក៏ពិតមែន ព្រោះថតសកម្មភាពនេះ នៅពេលយប់ ។ ប៉ុន្តែវាបានបង្ហាញឱ្យឃើញនូវសកម្មភាពយ៉ាងព្រៃផ្សៃ របស់បុរសជាប្តី ប្រើអំពើយ៉ាងអមនុស្សធម៌មកលើប្រពន្ធ ។ រូបភាពនេះ ថ្វីបើមិនទាន់បានបង្ហាញឱ្យឃើញក្នុងបណ្តាញសង្គមហ្វេសបុកក៏ពិតមែន ប៉ុន្តែរូបភាព នៃវីឌីអូនេះបានបង្ហាញថា ពិតជាឃោរឃៅ ជាងរូបភាពទារុណកម្មរបស់ក្មេងប្រុសដែលត្រូវគេធ្វើបាប ដោយសង្កត់ក្បាលច្រមុជចូលពាងទឹកស្អុយ គ្រាន់តែលួចផ្លែដូង៤ផ្លែ ហើយត្រូវផុសវីដេអូក្នុងហ្វេសបុកនោះទៅទៀត។
រយៈពេលជាង២២នាទី នៃការរើបម្រាស់របស់ស្ត្រីរងគ្រោះ ពិតជាសែនតក់ស្លុត ព្រោះកបានភ្ជង់ជាប់ដោយផ្លែកណ្តៀវ និងដៃម្ខាងរបស់ប្តីបានសង្កត់ក្បាលជាប់ ព្រមជាមួយសម្តីគំរាម «នៅឱ្យស្ងៀម បើហ៊ានរើដាច់ក អញសុខចិត្តចូលគុក» តើរន្ឋត់យ៉ាងណា ? ពេលខ្លះដែលនាងនៅពីក្រោមបានប្រឹងរើបម្រាស់បានរួចម្តងៗដែរ ដោយប្រឹងយកដៃចាប់ផ្លែកណ្តៀវទាញចេញ និងរើធ្វើឱ្យដៃទាំង២មុតដាច់ឈាមហូររហាម ប្រឡាក់ពេញខ្លួនប្រាណ ។ ទោះយ៉ាងនេះក្តី កម្លាំងរបស់ស្ត្រីមិនអាចទៅរួចឡើយ ។
ក្នុងរូបភាព ដែលមានដោយសម្រែកស្រែកដោយក្តីរន្ធត់ និងការសំពះអង្វរ ពីសំណាក់ក្រុមគ្រួសារ ដែលមានគ្នាពី៥ទៅ៦នាក់ នៅតែមិនអាចជួយស្រី្តរងគ្រោះពីកណ្តាប់ដៃរបស់ប្តីកំណាចនោះបាន ។ ហើយរយៈពេលជាង២២នាទីនេះ ប្រហែលជាប្តីអស់កម្លាំងហើយ ទើបប្រពន្ធឆក់ឱកាសរត់គេចខ្លួនចេញបាន ។ ដោយចង់ដឹងការពិតនៃអំពើព្រៃផ្សៃនេះ ចេញពីប្រភពណា ភ្នាក់ងារកោះសន្តិភាព ខេត្តកំពង់ឆ្នាំង បានស្រាវជ្រាវរក ហើយក៏បានព័ត៌មានពិតថា បានកើតឡើងកាលពីយប់ថ្ងៃទី៥សីហា នៅក្នុងភូមិទួលទ្រា ឃុំស្វាយជ្រុំ ស្រុករលាប្អៀរ ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ