នាយករបស់ភ្នាក់ងារ FBI អាមេរិកថ្លែងកាលពីថ្ងៃទី១៧ កញ្ញាថា ការគាំទ្រចំពោះក្រុមរដ្ឋអ៊ិស្លាម តាមរយៈអីុនធើរណេតមានការកើនឡើងចាប់តាំងពីសហរដ្ឋអាមេរិកវាយប្រហារតាមអាកាសលើទីតាំងទាំងឡាយរបស់ក្រុមនេះនៅអុីរ៉ាក់ ហើយពួកជីហាដនិយមអាចប៉ុនប៉ងចាប់ចំណាប់ខ្មាំងដទៃៗទៀតជាជនជាតិអាមេរិកក្នុងក្តីសង្ឃឹមជំរុញទាញយកសម្បទាននានាពីក្រុងវ៉ាស៊ីនតោន ។
នាយករបស់ភ្នាក់ងារ FBI អាមេរិកថ្លែងកាលពីថ្ងៃទី១៧ កញ្ញាថា ការគាំទ្រចំពោះក្រុមរដ្ឋអ៊ិស្លាម តាមរយៈអីុនធើរណេតមានការកើនឡើងចាប់តាំងពីសហរដ្ឋអាមេរិកវាយប្រហារតាមអាកាសលើទីតាំងទាំងឡាយរបស់ក្រុមនេះនៅអុីរ៉ាក់ ហើយពួកជីហាដនិយមអាចប៉ុនប៉ងចាប់ចំណាប់ខ្មាំងដទៃៗទៀតជាជនជាតិអាមេរិកក្នុងក្តីសង្ឃឹមជំរុញទាញយកសម្បទាននានាពីក្រុងវ៉ាស៊ីនតោន ។
នៅមុខគណៈកម្មការសភាមួយពីបញ្ហាគំរាមកំហែងចំពោះសន្តិសុខផ្ទៃក្នុងរបស់សហរដ្ឋអាមេរិក ប្រមុខ FBI លោក JAMES COMEY និយាយថា ពួករដ្ឋអ៊ិស្លាមដែលដណ្តើមកាន់កាប់ដែនដីយ៉ាងធំនៅអីុរ៉ាក់ និងនៅស៊ីរីបានប្តេជ្ញាបង្កការភ័យខ្លាច ហើយអូសទាញមនុស្សឱ្យចូលរួមជាមួយខ្លួនកាន់តែច្រើន ព្រមទាំងធ្វើសកម្មភាពទាក់ទាញការចាប់អារម្មណ៍ដូចដែលពួកគេចាក់ផ្សាយវីដេអូនាពេលថ្មីៗនេះតាមអីុនធើរណេតពីការកាត់ក្បាលអ្នកកាសែតអាមេរិក២នាក់ លោក JAMES FOLEY និងលោក STEVEN SOTLOFF ជាដើម ។
ប្រមុខប៉ូលិសសហព័ន្ធបន្តថា ការប្រើប្រាស់យ៉ាងខ្លាំងនូវបណ្តាញសង្គមដោយក្រុមរដ្ឋអ៊ិស្លាម និងការគាំទ្រក្រុមនេះកាន់តែច្រើនឡើងតាមអីុនធើរណេតកើតមានក្រោយការចាប់ផ្តើមវាយប្រហារតាមអាកាសរបស់អាមេរិកនៅអុីរ៉ាក់កាលពីខែសីហា ។ លោកបន្តថា ក្រុមរដ្ឋអ៊ិស្លាម និងអង្គការដទៃៗទៀតអាចប៉ុនប៉ងចាប់ចំណាប់ខ្មាំងជនជាតិអាមេរិកទាំងឡាយក្នុងគោលបំណងចាប់បង្ខំរដ្ឋាភិបាល និងប្រជាជនអាមេរិកឱ្យធ្វើសម្បទាននានាដែលនឹងរឹតតែធ្វើឱ្យក្រុមរដ្ឋអ៊ិស្លាមកាន់តែខ្លាំងថែមទៀត ហើយបន្តប្រតិបត្តិការភេរវកម្មនានា ។
ពេលគណៈកម្មការសភាទទួលបន្ទុកសន្តិសុខសួរ លោក MATT OLSEN នាយកមជ្ឈមណ្ឌលជាតិតស៊ូប្រឆាំងភេរវកម្ម ក៏វាយតម្លៃដែរថា ក្រុមរដ្ឋអ៊ិស្លាមប្រមូលប្រាក់បាន១លានដុល្លារក្នុង១ថ្ងៃពីការលក់ប្រេងកាតតាមផ្សារងងឹត ព្រមទាំងតាមរយៈការរត់ពន្ធផ្សេងៗ ការប្លន់ និងការបង់ប្រាក់លោះសម្រាប់ការដោះលែងចំណាប់ខ្មាំង ។ តាមផ្លូវការ សហរដ្ឋអាមេរិកពុំបង់ប្រាក់លោះដើម្បីការដោះលែងចំណាប់ខ្មាំងឡើយ ។
ចំពោះអ្នកទទួលខុសត្រូវខាងសន្តិសុខផ្ទៃក្នុងអាមេរិកទាំង២រូបនេះយល់ថា សមត្ថភាពរបស់ក្រុមរដ្ឋអ៊ិស្លាមវាយប្រហារលើដែនដីអាមេរិក ពឹងផ្អែកមួយផ្នែកលើការប្រើប្រាស់យ៉ាងខ្លាំង និងដោយទាន់សម័យនូវបណ្តាបណ្តាញសង្គមដើម្បីបំពាក់មនោគមន៍វិជ្ជារ៉ាឌីកាល់ចំពោះជនជាតិអាមេរិកទាំងឡាយ ។
លោក MATT OLSEN និយាយថា ក្រុមរដ្ឋអ៊ិស្លាមប្រើប្រាស់ជាពិសេសបច្ចេកវិទ្យាថ្មីទាំងនេះដើម្បីជ្រើសរើសយុទ្ធជនបរទេសជាង១៥.០០០នាក់នៅស៊ីរី ដែលពួកអ្នកទាំងនេះអាចវិលត្រឡប់ទៅកាន់ប្រទេសដើមពួកគេវិញ ពង្រឹងការប្រយុទ្ធបែបរ៉ាឌីកាល់ ហើយប្តេជ្ញាចិត្តវាយប្រហារយើង ។
ពេលអ្នកកាសែតមួយក្រុមសួរលោកនៅទីក្រុង WIESBADEN ប្រទេសអាល្លឺម៉ង់ ជាកន្លែងលោកចូលរួមក្នុងសន្និសីទរបស់កងទ័ពអឺរ៉ុប លោក RAY ODIERNO នាយសេនាធិការកងទ័ពអាមេរិកយល់ថា ការវាយប្រហារតាមអាកាសនឹងពុំអាកម្ទេចក្រុមរដ្ឋអ៊ិស្លាមបានឡើយ ។ លោកបន្តថា យើងត្រូវមានកងកម្លាំងជើងគោកដែលអាចវាយប្រហារពួកនេះ ហើយតាមរកពួកគេដើម្បីយកឈ្នះ ហើយកម្ទេចពួកគេ អាស្រ័យហេតុនេះហើយបានជាយើងត្រូវមានបណ្តាទីប្រឹក្សាយោធាជួយបណ្តុះបណ្តាលជនជាតិអីុរ៉ាក់ ឬស៊ីរីឱ្យប្រយុទ្ធ ហើយរឿងនេះពិតជាសំខាន់ខ្លាំងណាស់ ៕
ចែករំលែកព័តមាននេះ