រាជធានីភ្នំពេញ ៖ ព្រឹត្តិការណ៍ពិព័រណ៍ទេសចរណ៍អន្តរជាតិដែលកម្ពុជាធ្វើជាម្ចាស់ផ្ទះបានរៀបចំបើកដំណើរការ ជាផ្លូវការហើយ គ្រាដែលពិព័រណ៍នេះត្រូវបានរៀបចំនៅមជ្ឈមណ្ឌលពិព័រណ៍ពាណិជ្ជកម្មកោះពេជ្រ រាជធានីភ្នំពេញរយៈពេល៣ថ្ងៃគឺចាប់ពីថ្ងៃទី១៧ ដល់ថ្ងៃទី១៩ កញ្ញា ២០១៤។
គោលបំណងនៃការរៀបចំពិព័រណ៍នេះ គឺដើម្បីឲ្យមានជំនួបពិភាក្សា និងបង្ហាញផលិតផលទេសចរណ៍ រវាងក្រុមហ៊ុនជាអ្នកលក់ និងក្រុមហ៊ុនដែលជាអ្នកទិញមកពីបណ្តាប្រទេសនានាទូទាំងពិភពលោក និងក្រុមហ៊ុនជាអ្នកលក់នៅក្នុងប្រទេសកម្ពុជាផងដែរ។ ព្រឹត្តិការណ៍ពិព័រណ៍នេះ កម្ពុជា សហការជាមួយសមាគមទេសចរណ៍តំបន់អាស៊ីបាស៊ីហ្វិក ហៅកាត់ថា ប៉ាតាត្រាវែលម៉ាត (Pacific Asia Tourism Association, PATA Travel Mart 2014 ) ដែលបង្កើតឡើងតាំងពីឆ្នាំ១៩៥១ និងមានសមាជិកប្រមាណជាង៦០ប្រទេសក្នុងពិភពលោក សម្រាប់កម្ពុជាបានចូលជាសមាជិកសមាគមនេះនៅឆ្នាំ២០០៣។
ការដាក់បង្ហាញក្នុងពិព័រណ៍នេះ ប្រទេសជាសមាជិកទាំងអស់ នាំយកប្រភេទផលិតផល និងសេវាកម្មទេសចរ ដូចជា សណ្ឋាគារ ភោជនីយដ្ឋាន ក្រុមហ៊ុនអាកាសចរ សេវាកម្មភ្នាក់ងារទេសចរជាដើម សម្រាប់ទីភ្នាក់ងារក្នុងស្រុក និងក្រៅប្រទេសជាលក្ខណៈស្តង់ដារអន្តរជាតិ រវាងម្ចាស់ផលិតផល សេវាកម្ម និងទីភ្នាក់ងារ ដែលហៅកាត់ថា ប៊ីធូប៊ី (B2B, Business To Business) ឬ ពិព័រណ៍ទីផ្សារណាត់ជួប។
លោក ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា សម្រាប់កម្ពុជានេះគឺជាលើកដំបូងហើយដែលបានធ្វើជាម្ចាស់ផ្ទះក្នុងការរៀបចំនូវមហាព្រឹត្តិការណ៍ដ៏អស្ចារ្យមួយនេះ ហើយយើងមានមោទ នភាពនិងមានការប្តេជ្ញាខ្ពស់ដើម្បីធ្វើឲ្យដំណើរការនូវព្រឹត្តិការណ៍ដ៏ធំមួយនេះបានដោយរលូន និងប្រកបដោយជោគជ័យដោយមានការចូលរួមពីសំណាក់សមាគមទេសចរណ៍អាស៊ី ប៉ាស៊ីហ្វិកហៅកាត់ថា PATA និងផ្នែកពាក់ព័ន្ធដទៃទៀតផងដែរ ៕
ចែករំលែកព័តមាននេះ