ទីភ្នាក់ងារអវកាសអាមេរិក NASA ប្រកាសកាលពីថ្ងៃទី១៦ កញ្ញាថា ជ្រើសរើសក្រុមហ៊ុនបូ៊អុីង និងក្រុមហ៊ុន SPACEX សម្រាប់ផលិតយានអវកាសឯកជនដំបូង២ ដែលអាចដឹកអវកាសយានិកទាំងឡាយទៅកាន់ស្ថានីយអវកាសអន្តរជាតិ ISS ។ លោក CHARLES BOLDEN ប្រមុខ NASA និយាយថា នេះជាកុងត្រាធំមួយមានទឹកប្រាក់ដល់ទៅ៦,៨ពាន់លានដុល្លារដោយប៊ូអុីងទទួលចំណែកធំបំផុតជាមួយទឹកប្រាក់៤,២ពាន់លានដុល្លារ ចំណែក២,៦ពាន់លានដុល្លារសម្រាប់ក្រុមហ៊ុន SPACEX ។
តាក់ស៊ីអវកាសទាំងនេះជាពិសេសនឹងអាចបញ្ចប់ការចំណុះរបស់សហរដ្ឋអាមេរិកលើរុស្ស៊ី។ខណៈដែលទំនាក់ទំនងរវាងក្រុងវ៉ាស៊ីនតោន និងក្រុមមូស្គូធ្លាក់ចុះដុនដាប ពិសេសដោយសារវិបត្តិនៅអ៊ុយក្រែន អង្គការ NASA ចាប់តាំងពីខែកក្កដា ឆ្នាំ២០១១ មកពឹងលើយានអវកាស SOYOUZ របស់រុស្ស៊ីដើម្បីដឹកអវកាសយានិករបស់ខ្លួនទៅកាន់ស្ថានីយ ISS ។ ប្រតិបត្តិការនេះ NASA ត្រូវចំណាយប្រាក់៧០លានដុល្លារសម្រាប់កៅអីមួយ ។
លោក BODEN វាយតម្លៃថា ពេលនេះយើងបានបោះជំហានទៅមុខយ៉ាងវែងមួយដែលនាំឱ្យយើងជិតមានលទ្ធភាពបញ្ជូនបណ្តាអវកាសយានិករបស់យើងចេញពីសហរដ្ឋអាមេរិកក្នុងយានអវកាសអាមេរិក ។ ដៃគូបូ៊អុីង និង SPACAX ក៏សន្យាផងដែរជួយផ្តល់ឱកាសដល់មនុស្សកាន់តែច្រើនអាចធ្វើដំណើរតាមយានអវកាសឯកជនទាំងនេះ ។
ប្រមុខអង្គការ NASA ដែលលោកក៏ជាអតីតអវកាសយានិក១រូបដែរនោះបន្តថា ការផ្តល់ភារៈខាងដឹកជញ្ជូនទៅកាន់តារាវិថីទាបដល់ឧស្សាហកម្មឯកជនអាចឱ្យ NASA មានពេលផ្តោតកាន់តែខ្លាំងថែមទៀតលើមហិច្ឆតានៃការធ្វើដំណើរទៅកាន់ភពព្រះអង្គារ ។ ការហោះហើរដំបូងៗរបស់យានអវកាសឯកជនទាំងនេះអាចចាប់ផ្តើមក្នុងឆ្នាំ២០១៧ ៕
ចែករំលែកព័តមាននេះ