ខេត្តប៉ៃលិន ៖ ព្រះចៅអធិការព្រះនាម អ៊ា សុផុន នៃវត្តពោធិមារាម ហៅវត្តបា៉ហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន បានផ្តួចផ្តើមផលិតរូបសំណាកនំអន្សមយក្សមួយ មានបណ្តោយប្រវែង២,៧០ម៉ែត្រ ទទឹងជិតកន្លះម៉ែត្រ និងមានទម្ងន់ប្រមាណ៦០០គីឡូក្រាម។ រូបសំណាកនំអន្សមយក្សនេះផលិតនៅថ្ងៃទី៦ និងទី៧ ខែកញ្ញា ឆ្នាំ២០១៤ និងដាក់តាំងនៅវត្ត ប៉ាហ៊ី ក្នុងឱកាសបុណ្យភ្ជុំបិណ្ឌ ។នំអន្សមយក្សនោះប្រើប្រាស់ស្លឹកចេកវេចខ្ចប់ដូចនំអន្សមធម្មតា តែខាងក្នុងដាក់អាចម៍រណារ ។
លោកព្រហ្ម រដ្ឋា ប្រធានការិយាល័យសិល្បៈភាពយន្តនៃមន្ទីរវប្បធម៌ និងវិចិត្រសិល្បៈខេត្ត បានចូលរួមផលិតរូបសំណាកនំអន្សមយក្សជាមួយព្រះសង្ឃ និងគណៈកម្មការអាចារ្យវត្ត ។ លោកព្រហ្ម រដ្ឋា ឱ្យដឹងកាលពីព្រឹកថ្ងៃទី១៦ កញ្ញា ២០១៤ ថា ការផលិតរូបសំណាកនំអន្សមយក្សដាក់តាំងបង្ហាញនេះ មានសារសំខាន់ខ្លាំងណាស់ គឺទី១-ដើម្បីអភិរក្សនំអន្សមខ្មែរកុំឱ្យបាត់បង់សាបសូន្យទៅថ្ងៃខាងមុខ ។ ទី២-បង្ហាញឱ្យ ក្មេងៗជំនាន់ក្រោយស្គាល់ពីរបៀបធ្វើនំអន្សម និងឱ្យដឹងពីទំនៀមទម្លាប់ប្រពៃណីខ្មែរនៅរដូវភ្ជុំបិណ្ឌ ដែលគ្រួសារខ្មែរនីមួយៗត្រូវតែធ្វើនំអន្សមជារៀងរាល់ឆ្នាំ ។
លោកព្រហ្ម រដ្ឋា ថ្លែងថា ការវេចនំអន្សមមិនកំណត់ថា សម្រាប់តែគ្រួសារអ្នកមាន ឬអ្នកក្រទេ គឺត្រូវតែខិតខំស្វះស្វែង ប្រឹងប្រែងរកលុយកាក់ ដើម្បីទិញគ្រឿងផ្សំដូចជាអង្ករដំណើប សាច់ជ្រូក សណ្តែក ស្លឹកចេក យកមកវេចសម្រាប់កូនចៅហូប មិនឱ្យមើលមុខគេ និងសម្រាប់យកទៅប្រគេនព្រះសង្ឃ ។ ការវេចនំមិនកំណត់ចំនួនទេ ទៅតាមលទ្ធភាពដែលខ្លួនអាចធ្វើទៅបាន ។ គ្រួសារខ្លះមានលុយច្រើនអាចវេចនំអន្សមច្រើន ចំណែកឯគ្រួសារខ្លះទៀតជីវភាពមិនធូរធារអាចវេចតែបន្តិចបន្តួចប៉ុណ្ណោះ ដើម្បីហូបជួបជុំគ្នានៅក្នុងគ្រួសារ និងយកទៅវត្តប្រគេនព្រះសង្ឃខ្លះ ។
ការវេចនំអន្សមនៅរដូវភ្ជុំបិណ្ឌគឺជាទំនៀមទម្លាប់ជាយូរលង់ណាស់មកហើយដែលខ្មែរយើងបានថែរក្សា និងអភិរក្សទុកជារៀងរហូតមកដល់សព្វថ្ងៃនេះ ។ វាជាសិល្បៈមួយដ៏ល្អ ដែលគេអាចសម្គាល់បានថា កាលណាមានវេចនំអន្សមគ្រប់ៗផ្ទះនៅទូទាំងប្រទេស គឺរដូវភ្ជុំបិណ្ឌឈានចូលមកដល់ហើយ ។ ព្រះតេជគុណអា៊ សុផន ព្រះចៅអធិការវត្តពោធិមារាម ហៅវត្តបា៉ហ៊ី មានថិរដីកាថា នំអន្សមមានជាយូររាប់ពាន់ឆ្នាំកន្លងមកហើយ រហូតដល់ក្លាយទៅជានំប្រពៃណី ទំនៀមទម្លាប់ខ្មែរ និងប្រទេសដែលកាន់សាសនាព្រះពុទ្ធមួយចំនួនទៀតនាពេលបច្ចុប្បន្ន ។ កាលពីមុននំអន្សមគឺធ្វើឡើងសម្រាប់អ្នកកាន់សាសនាព្រហ្មញ្ញ គឺគេធ្វើនំអន្សមនេះតំណាងឱ្យលិង្គព្រះឥសូរដើម្បីថ្វាយដល់ព្រះឥសូរ ។ ខ្មែរយើងមុនកាន់ព្រះពុទ្ធសាសនា គឺកាន់ព្រហ្មញ្ញសាសនា ទើបពីមុនគេធ្វើនំអន្សមបូជាដល់ព្រះឥសូរ លុះក្រោយមកមានសាសនាព្រះពុទ្ធហូរចូលមកដល់ស្រុកខ្មែរ ព្រះមហាក្សត្រខ្មែរកាន់សាសនាព្រះពុទ្ធ ក៏ដឹកនាំប្រជារាស្ត្រឱ្យជឿ និងគោរពតាមដែរ ។
ខ្មែរយើងធ្វើនំអន្សមជារៀងរាល់រដូវភ្ជុំបិណ្ឌ ដើម្បីសែនព្រេនឧទ្ទិសដល់ជីដូនជីតាដែលបានចែកឋានទៅកាន់លោកខាងមុខ ។
ព្រះតេជគុណអ៊ា សុផុន បន្តថា បុណ្យភ្ជុំបិណ្ឌពីមុនគេហៅថា បុណ្យសែនដូនតា កាលពីខ្មែរយើងកាន់សាសនាព្រហ្មញ្ញ លុះក្រោយមកខ្មែរយើងកាន់ព្រះពុទ្ធសាសនាក៏ប្តូរមកហៅបុណ្យភ្ជុំបិណ្ឌវិញម្តង ។ ព្រះចៅអធិការវត្តមានថិរដីកាថា ជាលើកទី១ហើយដែលវត្តបា៉ហ៊ីផលិតរូបសំណាកនំអន្សមជ្រូកយក្សដាក់តាំងក្នុងរដូវភ្ជុំបិណ្ឌ ។ រូបសំណាកនំអន្សមយក្សនៅវត្តប៉ាហ៊ី កំពុងទាក់ទាញមហាជនទាំងពីទីជិត ទាំងពីទីឆ្ងាយទៅទស្សនា និងថតរូបភាពយកទៅចែកចាយគ្នាមើលបន្ត ៕
ចែករំលែកព័តមាននេះ