រាជធានីភ្នំពេញ ៖ យុវជនម្នាក់បានធ្វើអត្តឃាតដោយយកខ្សែពួរចង.កសម្លាប់ខ្លួនភ្ជាប់នឹងធ្នឹមដំបូលកាណូតបូមខ្សាច់ បន្ទាប់ពីមានវិបត្តិក្នុងគ្រួសារផឹកស្រាស្រវឹង ហើយត្រូវគូដណ្តឹងស្តីបន្ទោសឱ្យថែមទៀត ។ ហេតុការណ៍នេះ បានធ្វើឱ្យមានការភ្ញាក់ផ្អើលកាលពីវេលាម៉ោង៧និង៣០នាទីព្រឹកថ្ងៃទី១៧ កញ្ញា នៅក្នុងកាណូតបូមខ្សាច់ ស្ថិតក្នុងភូមិបាក់ខែងលើ សង្កាត់បាក់ខែង ខណ្ឌជ្រោយចង្វា ។
យុវជនដែលគិតខ្លីឈ្មោះ ជន វ៉ា អាយុ២១ឆ្នាំ ជាកម្មករបូមខ្សាច់ មានលំនៅភូមិបឹងជន្លេន ឃុំឫស្សីជ្រោយ ស្រុកមុខកំពូល ខេត្តកណ្តាល មានគូដណ្តឹងឈ្មោះ ស៊ីវ ចាន់ធី អាយុ២៦ឆ្នាំ ជាកម្មការិនីរោងចក្រ ។ តាមមន្ត្រីនគរបាលមូលដ្ឋានបានឱ្យដឹងថា នៅមុនពេលភ្ញាក់ផ្អើលមានកម្មករម្នាក់បានឡើងទៅលើកាណូតបូមខ្សាច់ក៏ប្រទះឃើញកម្មករឈ្មោះ ជន វ៉ា ចង.កសម្លាប់ខ្លួននៅក្រោមដំបូលកាណូតផ្នែកខាងក្រោយបណ្តាលឱ្យស្លាប់បាត់បង់ជីវិត និងបានរាយការណ៍មកសមត្ថកិច្ច ទើបធ្វើឱ្យមានការភ្ញាក់ផ្អើលឡើង ។ ប្រភពដដែលបានឱ្យដឹងទៀតថា កម្មកររូបនេះ បានយកខ្សែពួរចង.កភ្ជាប់ទៅនឹងធ្នឹមដំបូលកាណូតតែពុំដឹងថា បណ្តាលមកពីមូលហេតុអ្វីឱ្យពិតប្រាកដទេ ។
តាមស្ត្រីជាគូដណ្តឹងឈ្មោះ ស៊ីវ ចាន់ធី បានឱ្យដឹងថា កាលពីវេលាក្បាលព្រលប់គូដណ្តឹងរបស់នាងបានផឹកស្រាស្រវឹង ហើយធ្វើដំណើរទៅផ្ទះជួលរបស់នាងដែលនៅក្បែរនោះ ។ ដោយសារតែកន្លងមកគូដណ្តឹងធ្នាប់សន្យាថា ឈប់ផឹកស្រា ហើយពេលនេះនៅតែផឹកស្រវឹងទៀត នាងបានស្តីបន្ទោសឱ្យបន្តិចបន្តួច រួមផ្សំមានរឿងក្នុងគ្រួសារផង ក៏បានខឹងធ្វើដំណើរត្រឡប់មកកន្លែងស្នាក់នៅលើកាណូតវិញ ក៏ចង.កសម្លាប់ខ្លួនតែម្តង ។ កន្លងមក ព្រោះតែមានរឿងរ៉ាវក្នុងគ្រួសារ ឪពុកមានស្រីថ្មីធ្វើបាបចិត្តម្តាយ ធ្វើឱ្យយុវជននេះ ព្យាយាមសម្លាប់ខ្លួន២លើករួចមកហើយតែពុំសម្រេច ពេលនេះចង.កសម្លាប់ខ្លួន ក៏ស្លាប់ដូចបំណង ។
បើតាមស្ត្រីឈ្មោះ ជា យន អាយុ៥២ឆ្នាំ ជាម្តាយរបស់យុវជនរងគ្រោះ បានឱ្យដឹងទាំងទឹកភ្នែកថា កន្លងមកកូនប្រុសរបស់គាត់បានខឹងនឹងឪពុកដែលបានវាយធ្វើបាបគាត់ជាប្រពន្ធ និងរករឿងទាស់ទែងក្នុងគ្រួសារ ព្រោះតែមានស្រីថ្មី និងមានកូនទៀត ។ នៅពេលដែលជួបគាត់ម្តងៗកូនប្រុសចេះតែបង្ខំឱ្យគាត់លែងប្តី ហើយគាត់ជាម្តាយបានសម្រេចចិត្តលែងប្តីដែរ តែលែងមិនដាច់ ។ ស្ត្រីជាម្តាយបានបន្តទៀតថា នៅវេលាល្ងាចថ្ងៃទី១៦ កញ្ញា កូនប្រុសបានមកផ្ទះយកធុងបាស់ ហើយប្រាប់គាត់ជាម្តាយថា ចាប់ពីពេលនេះតទៅលែងមកជាន់ផ្ទះទៀតហើយ បើម្តាយនៅតែទ្រាំរស់នៅជាមួយឪពុកចិត្តមិនស្មោះបែបនេះ រួចក៏ត្រឡប់ទៅបាត់ ស្រាប់តែព្រឹកឡើងទទួលដំណឹងដ៏រន្ធត់ចិត្តថា កូនប្រុសបានចង.កសម្លាប់ខ្លួន ៕
ចែករំលែកព័តមាននេះ