រាជធានីភ្នំពេញ ៖ យុវជន៤នាក់បានរងរបួសធ្ងន់ ចំណែកម៉ូតូបានរងការខូចខាតក្នុងហេតុការណ៍គ្រោះថ្នាក់ចរាចរណ៍មួយដែលបង្កឡើងដោយរថយន្តម៉ាកឡិចស៊ីសRX 300 ពណ៌ខ្មៅ ពាក់ស្លាកលេខ២P២៣២២ បើកបរដោយបុរសជនជាតិចិនម្នាក់បើកបុកពេញទំហឹងកាលពីវេលាម៉ោង៤រសៀល ថ្ងៃទី១៧ កញ្ញា ២០១៤ នៅតាមផ្លូវជាតិលេខ៣ ចំណុចឃុំកាំងដូនទៃ សង្កាត់ចោមចៅ ខណ្ឌពោធិ៍សែនជ័យ។
តាមប្រភពព័ត៌មានបានឱ្យដឹងថា មុនពេលកើតហេតុគេឃើញរថយន្តខាងលើធ្វើដំណើរក្នុងទិសដៅពីជើងទៅត្បូង ចំណែកម៉ូតូម៉ាកហុងដាឌ្រីម ពាក់ស្លាកលេខកំពង់ស្ពឺ ១B៤៦៦៨ ធ្វើដំណើរក្នុងទិសដៅបញ្ច្រាសគ្នា លុះដល់ចំណុចកើតហេតុរថយន្តម៉ាកឡិចស៊ីសបានបត់ឆ្លងផ្លូវក៏ជ្រុលល្បឿនទៅបុកម៉ូតូយុវជនរងគ្រោះពេញទំហឹងបណ្តាលឱ្យដួលរងរបួសធ្ងន់ទាំង៤នាក់ ចំណែករថយន្តរងការខូចខាតយ៉ាងដំណំដែរ។
យុវជនរងគ្រោះត្រូវគេស្គាល់ឈ្មោះពាច ឡាទី អាយុ១៨ឆ្នាំ ជាអ្នកបើកម៉ូតូ និងអ្នករួមដំណើរ៣នាក់ទៀត ១-ឈ្មោះវ៉ន វ៉ិត ភេទប្រុស អាយុ១៨ឆ្នាំ បាក់ជើងស្តាំ ២-ឈ្មោះហេង ខ្លឹង ភេទប្រុស អាយុ១៣ឆ្នាំ និងម្នាក់ទៀតមិនស្គាល់ឈ្មោះ ។ ជនរងគ្រោះទាំង៤នាក់មានស្រុកកំណើតស្រុកត្រាំកក់ ខេត្តតាកែវ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ