ប្រទេសអ៊ុយក្រែននិងសហភាពអឺរ៉ុបកាលពីថ្ងៃទី១៦ កញ្ញា បានផ្ដល់សច្ចាប័នលើកិច្ចព្រមព្រៀងជាប្រវត្តិសាស្ត្រនៃការចូលជាសមាជិក ដែលបញ្ជាក់ពីការដកខ្លួនថយឆ្ងាយពីការស្ថិតក្រោមឥទ្ធិពលរបស់រុស្សុីនៃអតីតសាធារណរដ្ឋសូវៀតនោះដែលកំពុងកើតមានឧទ្ទាមកម្មបំបែកខ្លួននិយមស្និទ្ធរុស្ស៊ី ។
ប្រទេសរុស្សុីបានរិះគន់់យ៉ាងខ្លាំងចំពោះកិច្ចព្រមព្រៀងនេះដោយប្រកាសថាកម្លាំងយោធារបស់ខ្លួននឹងត្រូវពង្រឹងនៅតំបន់គ្រីមេ ជាឧបទ្វីបមួយនៅភាគខាងត្បូងអ៊ុយក្រែនបញ្ចូលក្នុងដែនដីរុស្សុីកាលពីខែមីនា ចំណែកសមយុទ្ធយោធាចូលរួមដោយប្រទេស១៥ ក្នុងនោះមាន សហរដ្ឋអាមេរិកដែរចាប់ផ្ដើមកាលពីថ្ងៃទី១៥ កញ្ញា នឹងបន្តនៅភាគខាងលិចអ៊ុយក្រែន ។ ចំពោះរឿងនេះក្រុងមូស្កូនិយាយថា វាពុំត្រឹមតែធ្វើឱ្យធ្ងន់ធ្ងរដល់វិបត្តិអ៊ុយក្រែនប៉ុណ្ណោះទេ តែវត្តមានកាន់តែច្រើនឡើងរបស់កងកម្លាំងបរទេសក្បែរព្រំដែនរុស្សុីក៏ជាការគំរាមកំហែងមួយដល់ខ្លួនផងដែរ ។
ថ្លែងនៅមុខបណ្ដាសមាជិកសភា ប្រធានាធិបតីអ៊ុយក្រែន លោកប៉េត្រូ ប៉ូរ៉ូឆេនកូ អះអាងថា ការផ្ដល់សច្ចាប័នជាឯកច្ច័ន្ទលើកិច្ចព្រមព្រៀងនេះកំណត់ពីជំហានដំបូងឆ្ពោះទៅរកការចូលក្នុងសហភាពអឺរ៉ុបរបស់ប្រទេសលោក ។ ទោះបីជាយ៉ាងណានាពេលបច្ចុប្បន្នកិច្ចព្រមព្រៀងនេះនៅគ្រាន់តែជានិមិត្តរូប ព្រោះសហភាពអឺរ៉ុប ប្រកាសកាលពីថ្ងៃទី១២ កញ្ញា កន្លងមកនេះ ថា កិច្ចព្រមព្រៀងផ្លាស់ប្ដូរសេរីជាមួយអ៊ុយក្រែនជាផ្នែកសំខាន់នៃកិច្ចព្រមព្រៀងចូលក្នុងសហភាពអឺរ៉ុបត្រូវពន្យារពេលរហូតដល់ដំណាច់ឆ្នាំ២០១៥ ដើម្បីអាចធ្វើការពិភាក្សាថ្មីៗជាមួយក្រុងមូស្គូដែលប្រឆាំងនឹងគម្រោងនេះ ។ ការពន្យារពេលនេះនាំឱ្យមនុស្សមួយចំនួននៅអ៊ុយក្រែនចោទលោកប៉ូរូ៉ឆេនកូ ថា ក្បត់ទៀតផង ៕
ចែករំលែកព័តមាននេះ