រាជធានីភ្នំពេញ ៖ យោងតាមចៅក្រមសាលាដំបូងរាជធានីភ្នំពេញបានឲ្យដឹងនៅថ្ងៃទី១៧ កញ្ញា ២០១៤ ថា តុលាការនឹងបើកសវនាការកាត់ទោសលោក សួន សេរីរដ្ឋា មេដឹកនាំចលនាអំណាចពលរដ្ឋខ្មែរ និងបុរស៣នាក់ទៀតដែលកំពុងជាប់ឃុំឃាំងនៅពន្ធនាគារព្រៃស បន្ទាប់ពីត្រូវបានចាប់ខ្លួនកាលពីខែកក្កដា ឆ្នាំ២០១៣។ ប៉ុន្តែលោកសួន សេរីរដ្ឋា បានចេញសេចក្តីថ្លែងការណ៍ថា លោកនឹងមិនចូលរួមសវនាការនេះទេ ព្រោះលោកមិនទទួលស្គាល់ការចោទប្រកាន់នេះទេ។
ក្នុងសេចក្តីថ្លែងរបស់លោកសួន សេរីរដ្ឋា ចេញផ្សាយកាលពីថ្ងៃទី១៦ កញ្ញា ឆ្នាំ២០១៤ ក្នុងគេហទំព័រហ្វេសប៊ុក បានឲ្យដឹងថា នៅថ្ងៃទី១៨ កញ្ញា ២០១៤ សាលាដំបូងរាជធានីភ្នំពេញនឹងបើកការជម្រះក្តីរូបលោកជាលើកទី២ និងសកម្មជនរបស់ចលនាអំណាចពលរដ្ឋខ្មែរចំនួន៣នាក់ទៀតដែលរដ្ឋាភិបាលបានចាប់ខ្លួនកាលពីថ្ងៃទី៤ ខែកក្កដា ២០១៣ ពីខេត្តបន្ទាយមានជ័យ។
ការចោទប្រកាន់នេះជាការប្រមូលការដាក់បន្ទុកមកលើករូបលោក និងសកម្មជនរបស់ចលនាអំណាចពលរដ្ឋខ្នែរដែលកំពុងជាប់ឃុំឃាំង វាជាការរំលោភសិទ្ធិនយោបាយរបស់លោក ហើយជាការរំលោភសិទ្ធិសេរីភាពចូលរួមក្នុងជីវភាពនយោបាយរបស់សកម្មជនចលនាអំណាចពលរដ្ឋខ្មែរ និងពលរដ្ឋដែលគាំទ្រចលនាអំណាចពលរដ្ឋខ្មែរ។
ក្នុងសំណុំរឿងនេះដែរ តុលាការបានកោះហៅព្រះសង្ឃលួន សាវ៉ាត គង់នៅវត្តឧណ្ណាលោម និងព្រះសង្ឃ សៀង សុវណ្ណា ចៅអធិការវត្តសាមគ្គីរង្សីនិមន្តចូលរួមសវនាការនៅថ្ងៃទី១៨ កញ្ញា ២០១៤ ដែរ។ មន្ត្រីតុលាការបានអះអាងថា ដីកាកោះព្រះសង្ឃទាំងពីរអង្គបានផ្ញើរួចហើយ តែមិនច្បាស់ទេថា ព្រះសង្ឃទាំងពីរអង្គនឹងនិមន្តចូលរួមសវនាការ ឬក៏មិនចូល។
ទោះបីយ៉ាងណាព្រះសង្ឃលួន សាវ៉ាត បានចាកចេញពីប្រទេសកម្ពុជា ខណៈព្រះសង្ឃសៀង សុវណ្ណា បដិសេធមិនព្រមទទួលដីកាកោះចូលជាសាក្សីទេ។ គួររំលឹកថាសាលាដំបូងរាជធានីភ្នំពេញ ធ្លាប់បានចេញដីកាកោះលោក សួន សេរីរដ្ឋា ដែលជាមេដឹកនាំចលនាមួយប្រឆាំងរដ្ឋាភិបាលដែលកំពុងនិរទេសនៅក្រៅប្រទេស កាលពីដើម ខែកក្កដា ក្រោមការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ