ខេត្តកំពង់ចាម ៖ រថយន្តម៉ាកហ៊ីយ៉ាន់ដាយ១គ្រឿង និងម៉ូតូឌ្រីមC125 ឡើងតែម២០០០ ពណ៌ខ្មៅ១គ្រឿងដែលម្ចាស់ទុកនៅក្រោមផ្ទះត្រូវជនមិនស្គាល់មុខធ្វើសកម្មភាពយកដបប្រេងសាំងមកចាក់ស្រោច រួចដុតឆេះសន្ធោសន្ធៅប៉ុនប៉ងដុតផ្ទះសម្លាប់មនុស្សមួយគ្រួសារ តែសំណាងល្អម្ចាស់ផ្ទះដឹងខ្លួននាំគ្នាដងទឹកស្រោចពន្លត់ទាន់ពេល។
ហេតុការណ៍នេះកើតឡើងកាលពីវេលាម៉ោង១០យប់ ថ្ងៃទី១៦ កញ្ញា ២០១៤ នៅផ្ទះរបស់បុរសឈ្មោះ សុខ ចំរើន អាយុ៤៧ឆ្នាំ នៅភូមិបឹងសាងលិច ឃុំសូគង ស្រុកកងមាស ។
លោកវរសេនីយ៏ត្រី សូ សារិទ្ធ អធិការនគរបាលស្រុកកងមាសប្រាប់ឲ្យដឹងថា ក្រោយពីហេតុការណ៍នោះកើតឡើងកម្លាំងប៉ុស្តិ៍រដ្ឋបាលឃុំសូគងបានចុះទៅដល់ផ្ទះកើតហេតុទាំងយប់ និងតាមប្រមាញ់រកជនមិនស្គាល់អត្តសញ្ញាណរូបនោះ តែមិនឃើញ ។ រហូតមកដល់ព្រឹកថ្ងៃទី១៧ កញ្ញា ម្ចាស់ផ្ទះបានដាក់ពាក្យបណ្តឹងនៅប៉ុស្តិ៍រដ្ឋបាលឃុំសូគងឲ្យជួយអន្តរាគមន៍ស្រាវជ្រាវតាមចាប់ជនពុំស្គាល់អត្តសញ្ញាណរូបនោះមកផ្តនា្ទទោសតាមច្បាប់ ។
ផ្អែកតាមការស៊ើបអង្កេតបុរសម្ចាស់ផ្ទះខាងលើមានមុខរបរទិញបន្លែពីរាជធានីភ្នំពេញដឹកមកលក់នៅស្រុកកងមាស ដោយមានរ៉ឺម៉កម៉ូតូដឹកចែកចាយតាមភូមិឋាននានាផងដែរ ។ នៅពេលមុននេះជាង១ខែ គ្រួសារនេះធ្លាប់មានបញ្ហាទំនាស់ កន្លែងលក់ដូរនៅផ្សារត្លុកជ្រៅ តែមិនជាធំដុំនោះទេ ។ ចំពោះករណីប៉ងដុតរថយន្ត និងម៉ូតូព្រមទាំងផ្ទះនេះពិតជាកើតចេញពីរឿងគំនុំណាមួយនាពេលកន្លងមក ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ