ខេត្តកំពង់ឆ្នាំង ៖ សមត្ថកិច្ចចម្រុះបានស្ទាក់ចាប់រថយន្តដឹកឈើប្រណីត ប្រភេទគ្រញូងមួយគ្រឿងនៅវេលាម៉ោង៣និង៣០នាទីរសៀលថ្ងៃទី១៧ កញ្ញា នៅលើផ្លូវលំមួយកន្លែង ស្ថិតក្នុងភូមិត្រពាំងចាន់ ឃុំត្រពាំងចាន់ ស្រុកបរិបូរណ៍ ខណៈដែលរថយន្តដឹកឈើនោះ ព្យាយាមបើករត់ចុះពីថ្នល់ជាតិចូលទៅតាមភូមិបំណងគេចពីសមត្ថកិច្ចប្រដេញតាមចាប់ ។
មន្ត្រីកងរាជអាវុធហត្ថស្នាក់ការ៥០១របស់ទីបញ្ជាការកងរាជអាវុធហត្ថខេត្ត ឱ្យដឹងថា រថយន្តដឹកឈើនោះម៉ាកកាមរីគូទប៉ោងសេរី៩៥ ពណ៌ខ្មៅ ពាក់ស្លាកលេខ ភ្នំពេញ2C-3887 ក្នុងរថយន្តមានឈើចំនួន២២ដុំ ។ ប្រភពដដែលបាននិយាយថា មុនពេលមានការចាប់រថយន្តល្មើសខាងលើនេះ មន្ត្រីនគរបាលសេដ្ឋកិច្ចក្រសួង បានប្រដេញចាប់រថយន្តខាងលើនេះពីខេត្តពោធិ៍សាត់ មកខេត្តកំពង់ឆ្នាំង ប៉ុន្តែដេញមិនទាន់ ទើបសុំសហការជាមួយមន្ត្រីកងរាជអាវុធហត្ថស្នាក់ការ៥០១ មានទីតាំងស្ថិតនៅភូមិត្រពាំងចាន់ ពេលនោះដែរក៏មានមន្ត្រីរដ្ឋបាលព្រៃឈើបរិបូរណ៏បានត្រៀមស្ទាក់ចាប់រថយន្តខាងលើ ។ នៅពេលរថយន្តដឹកឈើនោះមកដល់ឃើញកម្លាំងសមត្ថកិច្ចស្ទាក់ពីមុខបែបនេះ អ្នកបើករថយន្តល្មើស បានបើករថយន្តរត់ចុះពីថ្នល់ជាតិ ចូលតាមផ្លូវលំក្នុងភូមិត្រពាំងចាន់ ហើយត្រូវសមត្ថកិច្ចដេញតាមរហូត ប៉ុន្តែពេលដល់កន្លែងស្ងាត់អ្នកបើករថយន្តបានឈប់រថយន្តទុកចោលហើយរត់គេចខ្លួនបាត់តែម្តង ។ នៅពេលសមត្ថកិច្ចទៅដល់ឃើញតែរថយន្ត និងឈើគ្រញូង ត្រូវបាននាំមករក្សាទុកនៅស្នាក់ការរដ្ធបាលព្រៃឈើបរិបូរណ៏ជាបណ្តោះអាសន្ន ។
ក្រោយមកមន្ត្រីសាលាដំបូងខេត្ត និងលោកព្រះរាជអាជ្ញារងអមសាលាដំបូងមួយរូប បានចុះទៅពិនិត្យ និងរាប់ចំនួនឈើគ្រញូងនោះមានចំនួន២២ដុំ និងបានឱ្យរក្សាទុកនៅរដ្ឋបាលព្រៃឈើទីនោះតែម្តង តែបានឱ្យមន្ត្រីជំនាញកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ