រាជធានីភ្នំពេញ ៖ បន្ទាប់ពីទទួលបានលិខិតអញ្ជើញជាផ្លូវការឱ្យចូលរួមប្រកួតដណ្តើមពានរង្វាន់ AFF Suzuki Cup នាចុងឆ្នាំ ២០១៤នេះ ធ្វើឱ្យក្រុមបាល់ទាត់ជម្រើសជាតិកម្ពុជាមានភាពមមាញឹកខ្លាំងក្នុងការប្រកួតលក្ខណៈមិត្តភាពអន្តរជាតិ ទាំងក្នុងនិងក្រៅស្រុកហើយទទួលបានលទ្ធផលល្អប្រសើរជាងឆ្នាំកន្លងមក ។
បើតាម លោក ឆាំង ពិសិដ្ឋ អ្នកចាត់ការទូទៅក្រុមជម្រើសជាតិកម្ពុជា បានឱ្យដឹងថា នៅថ្ងៃទី១៨ កញ្ញា ឆ្នាំ២០១៤ ក្រុមបាល់ទាត់ជម្រើសជាតិកម្ពុជា ដែលមានគ្រូបង្វឹក លោក Lee Tae Hoon នឹងដឹកនាំកីឡាករសរុបចំនួន ២០នាក់ និងមន្ត្រី៨នាក់ចេញទៅចូលរួមប្រកួត មិត្តភាពកម្ដៅសាច់ដុំជាមួយម្ចាស់ផ្ទះម៉ាឡេស៊ី តាមជើងហោះហើរភ្នំពេញ-កូឡាឡាំពួរ វេលាម៉ោង៥និង១០នាទីល្ងាចហើយ ។
អ្នកចាត់ការទូទៅដែលជួយឱ្យក្រុមកម្ពុជាឈ្នះ៣ប្រកួត ក្នុងពានរង្វាន់ព្រះមហាក្សត្រព្រុយណេ លោក ឆាំង ពិសិដ្ឋ បានបន្តទៀតថា ក្នុងថ្ងៃនោះដែរ ក្រុមកម្ពុជានឹងចាកចេញពីជំរំហ្វឹកហាត់ក្នុងមជ្ឈមណ្ឌល និងសាលាបាល់ទាត់ជាតិបាទី នៅវេលាម៉ោង២រសៀល ហើយធ្វើដំណើរឆ្ពោះទៅកាន់ព្រលានយន្តហោះអន្តរជាតិភ្នំពេញ ផ្ទាល់តែម្ដង ។ ក្រុមកម្ពុជានឹងប្រកួតមិត្តភាពជាមួយម្ចាស់ផ្ទះម៉ាឡេស៊ី នៅថ្ងៃទី២០ កញ្ញា វេលាម៉ោង៧និង៤៥នាទីយប់ (ត្រូវនឹងម៉ោង៦និង៤៥នាទីល្ងាចនៅកម្ពុជា) ក្នុងកីឡដ្ឋាន Stadium Shah Alam (Shah Alam) នៃទីក្រុង Selangor ។
ការប្រកួតដែលធ្វើឡើងក្រៅទឹកដីនេះ ទាំងកម្ពុជា និងម៉ាឡេស៊ី សុទ្ធតែប្រកួតកម្ដៅសាច់ដុំរៀងខ្លួនត្រៀមចូលរួមប្រកួតក្នុងពានរង្វាន់ AFF Suzuki Cup នាចុងឆ្នាំ២០១៤នេះ ខណៈដែលក្រុមកម្ពុជាត្រូវប្រកួតវគ្គជម្រុះនៅប្រទេសឡាវ តែក្រុមម៉ាឡេស៊ី ត្រូវប្រកួតនៅវគ្គចែកពូល ។ សូមរំលឹកផងដែរថា នេះមិនមែនជាជំនួបលើកទី១ឡើយ ដែលកម្ពុជាត្រូវជួបប្រកួតជាលក្ខណៈមិត្តភាពអន្តរជាតិនោះ គឺកាលពីថ្ងៃទី១៣ កញ្ញា ក្រុមកម្ពុជាបានប្រកួតស្មើ២-២ជាមួយក្រុមជម្រើសលីកស្ម័គ្រចិត្តអាជីពមកពីជប៉ុន ថែមទៀតផង ហើយកាលពីខែសីហាកន្លងទៅថ្មីៗនេះ កម្ពុជាទទួលបានលទ្ធផលយ៉ាងល្អប្រសើរចំនួន៣ប្រកួតមុននឹងចេញទៅប្រកួតជាផ្លូវការដណ្តើមពានព្រះមហាក្សត្រព្រុយណេនោះ ។
បើក្រឡេកទៅមើលក្រុមម្ចាស់ផ្ទះម៉ាឡេស៊ី ឯណេះវិញ ក្នុងជំនួបមិត្តភាពអន្តរជាតិថ្មីៗ បានចាញ់ក្រុមម្ចាស់ផ្ទះឥណ្ឌូណេស៊ី ក្នុងលទ្ធផល២ ទល់០ កាលពីថ្ងៃទី១៤ កញ្ញា ។ សូមបញ្ជាក់ផងដែរថា ព្រឹត្តិការណ៍ AFF Suzuki Cup មានប្រទេសក្នុងតំបន់អាស៊ានទាំង១១ចូលរួមប្រកួត ដោយក្នុងនោះវគ្គជម្រុះគឺមាន៥ប្រទេសចូលរួម គឺ ក្រុមម្ចាស់ផ្ទះឡាវ ព្រុយណេ កម្ពុជា ទីម័រខាងកើត និងមីយ៉ាន់ម៉ា។ សម្រាប់២ក្រុមដែលខ្លាំងក្នុងវគ្គនេះនឹងត្រូវឡើងទៅប្រកួតបន្តទៅវគ្គចែកពូល ដែលមាន៦ប្រទេស និងមានវៀតណាម និង សិង្ហបុរីជាម្ចាស់ផ្ទះ ។
វគ្គចែកពូលមាន៨ក្រុមក្នុងនោះ ពូលA មាន៤ក្រុមត្រូវប្រកួតនៅប្រទេសវៀតណាម និងពូលB មាន៤ក្រុម ត្រូវប្រកួតនៅប្រទេសសិង្ហបុរី ។ ការប្រកួតលក្ខណៈមិត្តភាពអន្តរជាតិកម្តៅសាច់ដុំលើកនេះ មិនទាន់ដឹងថា រវាងកម្ពុជា និងម៉ាឡេស៊ី តើក្រុមមួយណាជាអ្នកទទួលបានជ័យជម្នះនោះទេ ?
ចែករំលែកព័តមាននេះ