ខេត្តកំពង់ឆ្នាំង ៖ តុលាការខេត្តកំពង់ឆ្នាំងកាលពីព្រឹកថ្ងៃទី១៦ កញ្ញា ២០១៤ បានប្រកាសសាលក្រមលើកលែងការចោទប្រកាន់លើអ្នកកាសែតចំនួន៦នាក់ បន្ទាប់ពីបានបើកសវនាការជំនុំជំរះទោសជាសាធារណៈ កាលពីព្រឹកថ្ងៃទី០៩ កញ្ញា ២០១៤ កន្លងមក ដែលបានជាប់ចោទពីបទកំហែងយកប្រាក់ពីអ្នកបររទេះក្របីដឹកឈើគ្រញូង២គ្រឿង ដែលបានប្រព្រឹត្តឡើងកាលពីយប់ថ្ងៃទី៣០ វិច្ឆិកា ២០១០ នៅចំណុចទំនប់តានៃ ក្នុងភូមិតានៃ ឃុំជៀប ស្រុកទឹផុស។
លោកមេធាវីការពារក្រុមអ្នកកាសែតទាំង៦នាក់បាននិយាយកាលពីព្រឹកថ្ងៃទី១៦ កញ្ញា ២០១៤ ក្រោយពីបានស្តាប់ការប្រកាសសាលក្រមរបស់ចៅក្រមជំនុំជំរះក្តីចោទប្រកាន់ខាងលើនេះថា ក្រោយពីតុលាការខេត្តកំពង់ឆ្នាំងបានបើកសវនាការជំនុំជំរះក្តីនេះនៅព្រឹកថ្ងៃទី០៩ កញ្ញា និងដោយមានការសាកសួរដេញដោលទៅលើជនជាប់ចោទឈ្មោះចាន់ ធី ភ្នាក់ងារកាសែតដើមអំពិល និងសាកសួរដេញដោលលើសាក្សី៣នាក់របស់ដើមបណ្តឹងរួចមក ការឆ្លើយបំភ្លឺរបស់ជនជាប់ចោទ និងការឆ្លើយបំភ្លឺរបស់សាក្សីដើមបណ្តឹង គឺពុំមានស៊ីសង្វាក់គ្នា ខុសម៉ោងពេល និងថ្ងៃខែក្នុងពេលកើតហេតុ។
លោក ចាន់ធី បាននិយាយថា បានជួបរទេះក្របី ដឹកឈើគ្រញូងម៉ោង១១យប់ថ្ងៃទី២៩ វិច្ឆិកា ២០១០ និងមិនបានកំហែងយកប្រាក់ឡើយ ។ ឯសាក្សីដើមបណ្តឹងឆ្លើយថា ពួកអ្នកកាសែតទាំង៦នាក់បានកំហែងយកប្រាក់ចំនួន៦០០ដុល្លារ នៅម៉ោង៤ទៀបភ្លឺ ថ្ងៃទី៣០ វិច្ឆិកា ២០១០ តែមិនបានស្គាល់មុខ និងឈ្មោះអ្នកកាសែតទាំង៦នាក់ នោះទេ ព្រោះយប់ងងឹតមើលមិនឃើញ។
ដោយសារតែហេតុនេះហើយទើបលោកមេធាវីការពារអ្នកកាសែតទាំង៦នាក់ជាជនជាប់ចោទយល់ឃើញថា ពាក្យបណ្តឹងរបស់តំណាងអយ្យការ និងសាក្សីដាក់បន្ទុកធ្វើឡើងគ្រាន់តែចង់ទម្លាក់កំហុសមកលើក្រុមអ្នកកាសែតតែប៉ុណ្ណោះ គឺគ្រាន់តែមានការសង្ស័យគ្មានភស្តុ័តាងបញ្ជាក់ច្បាស់លាស់នោះឡើយ ដូច្នេះលោកបានសំណូមពរដល់លោកចៅក្រមជំនុំជំរះលើកលែងការចោទប្រកាន់លើអ្នកកាសែតទាំង៦នាក់នេះ។
ជាក់ស្តែងនៅព្រឹកថ្ងៃទី១៦ កញ្ញា ២០១៤ លោកចៅក្រមជំនុំជំរះរឿងក្តីនេះបានប្រកាសសាលក្រមលើកលែងការចោទប្រកាន់ជាស្ថាពរលើរូបអ្នកកាសែតទាំង៦នាក់ពីបទកំហែងយកប្រាក់ឱ្យមានសេរីភាពឡើងវិញ។ លោក ចាន់ ធី ភ្នាក់ងារកាសែតដើមអំពិលបាននិយាយថា លោកតំណាងឱ្យអ្នកកាសែតជាជនជាប់ចោទទាំង៦នាក់មានឈ្មោះយ៉ុង សុខា, កែវ ហួរ, ពិន ពីន, ជា ខេន,និងមាស សុខា ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ