រាជធានីភ្នំពេញ ៖ នេះជាលើកទី៣ហើយ ដែលអតីតតារាចម្រៀងផលិតកម្មក្លាស៊ីកលោកឡុង សុខហៀង បានផលិតCDស្មូត្រដើម្បីចែកជូនជាធម្មទានដល់ពុទ្ធបរិស័ទក្នុងន័យលើកស្ទួយវិស័យព្រះពុទ្ធសាសនាផង និងអំពាវឲ្យប្រជាពលរដ្ឋចូលរួមធ្វើបុណ្យទានឲ្យបានច្រើនផងនៅក្នុងឱកាសបុណ្យភ្ជុំបិណ្ឌនេះ ។
CDវ៉ុលទី៣ ដែលលោកឡុង សុខហៀង បានផលិតនេះមានចំនួន១០បទភាគច្រើនជាបទស្មូត្រទាក់ទងទៅនឹងពិធីបុណ្យបែបពុទ្ធសាសនាហើយសមស្របក្នុងពេលដែលប្រជាជនខ្មែរកំពុងប្រារព្ធពិធីបុណ្យភ្ជុំបិណ្ឌនាពេលនេះ ។ លោកឡុង សុខហៀង អះអាងប្រាប់កោះសន្តិភាពកាលពីពេល ថ្មីៗនេះថា នេះជាឆ្នាំទី៣ហើយដែលលោកបានធ្វើជាCD បែបស្មូត្រដើម្បីចែកជូនជាធម្មទានដល់ពុទ្ធបរិស័ទខ្មែរ ដែលតែងតែប្រារព្ធប្រតិបត្តិក្នុងផ្លូវពុទ្ធសាសនាតាំងពីយូរលង់ណាស់មកហើយ ។ គោលបំណងដែលលោកបានធ្វើសកម្មភាពនេះឡើងគឺចង់ផ្សព្វពីព្រះធម៌ផង និងតាមសមត្ថភាពក្នុងនាមជាអ្នកសិល្បៈម្នាក់ដែលបានប្រមូលអារម្មណ៍ពីការងារជួយទ្រទ្រង់ដល់សាសនាផង។
តាមការបញ្ជាក់ពីអតីតអ្នកធ្លាប់រៀននៅវត្តរូបនេះឲ្យដឹងថា ការធ្វើបែបនេះមិនមែនធ្វើឡើងតែក្នុងឱកាសបុណ្យភ្ជុំបិណ្ឌឡើយ ពោលបច្ចុប្បន្នលោកកំពុងតែខិតខំស្រាវជ្រាវបន្ថែមទៀតដើម្បីផលិតជាCD ទាក់ទងទៅនឹងពិធីបុណ្យបែបសាសនាទាំងអស់។ លោកឡុង សុខហៀង និយាយថា បច្ចុប្បន្នលោកកំពុងតែត្រៀមធ្វើCDវ៉ុលទី៤ បន្ថែមទៀតទាក់ទងទៅនឹងបុណ្យមាឃបូជា និងពិសាខបូជា ដើម្បីឲ្យប្រិយមិត្តអ្នកស្តាប់បានដឹងពីពិធីបុណ្យនេះគេធ្វើឡើងដើម្បីអ្វី ហើយដំណើរការធ្វើអ្វីមុនគេ ។ បើទោះបីជាលោកមិនបានធ្វើបែបនេះក៏ដោយក៏ពិធីនេះជាប្រពៃណីដែលប្រជាជនខ្មែរយើងប្រារព្ធជាធម្មតា ប៉ុន្តែការធ្វើបែបនេះគឺលោកចង់បញ្ជាក់ពីសមត្ថភាពរបស់លោក ក្នុងការជួយមួយចំណែកតូចក្នុងផ្លូវព្រះពុទ្ធសាសនា។
តាមការឲ្យដឹងពីលោកឡុង សុខហៀង កន្លងមកការផលិតCDចែកជាធម្មទាននេះគឺលោកបានចំណាយប្រាក់ផ្ទាល់ខ្លួន ប៉ុន្តែនៅក្នុងវ៉ុលថ្មីនេះបានការជួយឧបត្ថម្ភពីពុទ្ធបរិស័ទមួយផ្នែកធំ ដោយសារតែពួកគាត់គាំទ្រគោលបំណងដ៏ល្អរបស់លោក ។ លោកឡុង សុខហៀង ថ្លែងអំណរគុណដល់ពុទ្ធបរិស័ទដែលបានជួយឧបត្ថម្ភលោកសម្រាប់ផលិតCDស្មត ្រមានដូចជាលោកឡុង គឹមឈាន និងអ្នកស្រីហាន ចាន់ថា ម្ចាស់មណ្ឌលកំសាន្តឌីយ៉ាម៉ង់គ្រុប លោកយ៉េន សារិទ្ធ និងអ្នកស្រី ឈុន ណារិន ជាម្ចាស់មហោស្រពខេត្តកំពង់ឆ្នាំង និងលោកសោម ម៉ាធន និងអ្នកស្រីមួយ លេង ព្រមទាំងបុត្រ ៕
ចែករំលែកព័តមាននេះ