រាជធានីភ្នំពេញ ៖ សមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញ កាលពីព្រឹកថ្ងៃទី១៦ កញ្ញា បានបង្ហាញមុខជនសង្ស័យម្នាក់ក្នុងចំណោម៣នាក់ ដែលត្រូវបានឃាត់ខ្លួនពាក់ព័ន្ធពីបទលួចខោរោងចក្រកាត់ដេររ៉ូស៊ីងហ្គាមេន ។ ជនសង្ស័យដែលសមត្ថកិច្ចបង្ហាញខ្លួននោះឈ្មោះ ផែ សុធី ភេទប្រុស អាយុ៤២ឆ្នាំ ស្នាក់នៅផ្ទះជួលម្តុំសំណង់១២ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ មានមុខរបរជាកម្មករច្រកខោអាវរោងចក្រ ។
ពិធីបង្ហាញមុខជនសង្ស័យខាងលើនេះ ត្រូវបានធ្វើឡើងដោយលោកវរសេនីយ៍ទោ អេង សោភា ប្រធានការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ ។ ក្នុងពិធីនោះ លោក អេង សោភា មិនបានធ្វើអត្ថាធិប្បាយអ្វីវែងឆ្ងាយ ក្រៅតែពីលទ្ធផលបង្ក្រាបឃាត់ខ្លួនជនសង្ស័យម្នាក់ពាក់ព័ន្ធលួចខោរោងចក្រ និងដកហូតមកវិញនូវខោខូវប៊យយឺតពណ៌ខ្មៅ មា៉ក DIVIDED & DENI ប្រមាណ៧.១៦៧ខោ ។ ជនសង្ស័យម្នាក់នេះ ត្រូវបានមន្ត្រីនគរបាលនិយាយថា មិនមែនជាចោរទេ គេគ្រាន់តែជាប់ពាក់ព័ន្ធទទួលផលចោរកម្ម រីឯចោរលួចពិតប្រាកដគឺអាចជាសន្តិសុខ៤នាក់ដែលគេចខ្លួនបាត់ ។ ចំណែក២នាក់ដែលឃាត់ខ្លួនមកជាមួយ ជាអ្នករត់ម៉ូតូឌុបស៊ីឈ្នួលច្រកខោអាវឱ្យគេ ពួកគេត្រូវបានអនុញ្ញាតឱ្យវិលទៅផ្ទះវិញអស់ហើយដែរ ។
បន្ទាប់ពីបង្ហាញមុខជនសង្ស័យ សមត្ថកិច្ចបានប្រគល់ខោខូវប៊យដកហូតចំនួន៧.១៦៧ឱ្យទៅដើមបណ្តឹងវិញ ហើយជនសង្ស័យត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ។ រហូតមកដល់ល្ងាចថ្ងៃដដែលនេះ មិនដឹងថាខោរោងចក្រដែលត្រូវលួចនោះត្រូវបានក្រុមចោរយកទៅលក់នៅទីណាខ្លះនោះទេ ។ ជនសង្ស័យមិនបានឆ្លើយនៅចំពោះមុខប៉ូលិសថា ខ្លួនទិញពីពួកចោរនោះប៉ុន្មានទេ ។ សម្រាប់តម្លៃខោខូវប៊យយឺតដែលចោរលួចនេះ បើលក់នៅក្រៅប្រទេសនោះបានតម្លៃជាង១៩ដុល្លារ និងជាខោច្រើនតែស្ត្រីជាអ្នកប្រើប្រាស់ និងពណ៌ខ្មៅទាំងអស់ ៕
ចែករំលែកព័តមាននេះ