ខេត្តបន្ទាយមានជ័យ ៖ ស្របពេលដែលបុណ្យភ្ជុំបិណ្ឌកាន់តែខិតជិតចូលមកដល់ពលករដែលវិលត្រឡប់ពីប្រទេសថៃ និងពលករទើបចេញពីកម្ពុជាតាមច្រករបៀងនានា ត្រូវបានភាគីថៃចាប់បញ្ជូនមកឲ្យសមត្ថកិច្ចកម្ពុជាតាមច្រកទ្វារអន្តរជាតិប៉ោយប៉ែតកាន់តែមានចំនួនច្រើនជាងសព្វមួយដង ក្នុងរយៈពេលប៉ុន្មានថ្ងៃនេះ ។ ពលករខុសច្បាប់ដែលភាគីថៃបញ្ជូនត្រឡប់មកវិញតាមច្រកទ្វារអន្តរជាតិប៉ោយប៉ែតនេះមិនមែនមានតែខ្មែរទេ មួយចំនួនតូចក៏ជាខ្មែរអ៊ិស្លាមផងដែរ ។
ពលករមួយចំនួនធំបានប្រាប់ថា ពួកគេវិលត្រឡប់ពីប្រទេសថៃដើម្បីមកចូលរួមពិធីបុណ្យភ្ជុំបិណ្ឌ តែនៅពេលមកដល់ចំណុចបារ៉ាស់ត្រួតពិនិត្យរបស់សមត្ថកិច្ចតាមដងផ្លូវនៅក្នុងខេត្តស្រះកែវ ដោយពួកគេជាពលករខុសច្បាប់ក៏ត្រូវគេចាប់បញ្ជូន។ដោយឡែក ពលករមួយចំនួនតូចប្រាប់ថា ពួកគេទើបចេញពីកម្ពុជាតាមច្រករបៀងនានា ក្នុងខេត្តបន្ទាយមានជ័យ ដើម្បីទៅរកការងារធ្វើតែក្រោយពីឆ្លងព្រំដែនក៏ត្រូវសមត្ថកិច្ចថៃចាប់បញ្ជូនត្រឡប់វិញ ។ រីឯប្រភពពីអ្នករកស៊ីប្ដូរប្រាក់និងអ្នកចាប់ម៉ូយឲ្យរថយន្តតាក់ស៊ីបានប្រាប់ថា រយៈពេលប៉ុន្មានថ្ងៃថ្មីៗនេះ ពលករដែលភាគីថៃចាប់បញ្ជូនមកប្រគល់ឲ្យសមត្ថកិច្ចកម្ពុជា តាមច្រកទ្វារអន្តរជាតិប៉ោយប៉ែត មានចំនួនច្រើនជាងសព្វមួយដង ហើយគេឃើញមានកុមារច្រើន ។
ផ្ទុយទៅវិញជុំវិញករណីនេះ លោកសេម មករា ប្រធានសេនាធិការនគរបាលអន្តោប្រវេសន៍ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែតបានប្រាប់តាមទូរស័ព្ទថា ចំនួនពលករបញ្ជូនពីថៃគ្មានអ្វីជាការកត់សម្គាល់ទេ គឺមានចំនួនដូចពីមុនគ្មានអ្វីប្រែប្រួលឡើយ ។ លោកបន្តថា ក្នុងមួយថ្ងៃៗមានពី២០០នាក់ទៅ៣០០នាក់តែប៉ុណ្ណោះ ហើយពលករទាំងនេះមិនមែនភាគីថៃចាប់បញ្ជូនមកទេ គឺពួកគេវិលត្រឡប់មកចូលរួមពិធីបុណ្យភ្ជុំបិណ្ឌ តែពេលសមត្ថកិច្ចធ្វើការត្រួតពិនិត្យតាមដងផ្លូវគ្មានឯកសារស្របច្បាប់ក៏ត្រូវគេចាប់បញ្ជូនត្រឡប់មកវិញតែម្ដង។
គួររំលឹកថា ក្រោយពីអាជ្ញាធរយោធាថៃចាប់បញ្ជូនពលករខ្មែរមកស្រុកវិញដូចទឹកបាក់ទំនប់រហូតដល់ចំនួនជាង២៥ម៉ឺននាក់ តាមច្រកទ្វារអន្តរជាតិនានា ពលករដែលភាគីចាប់បញ្ជូនតាមច្រកទ្វារអន្តរជាតិប៉ោយប៉ែត ត្រូវបានគេដឹកមកប្រគល់ឱ្យអាជ្ញាធរកម្ពុជានៅចំណុចផ្សារមង្គលក្នុងភូមិប៉ោយប៉ែត ។ ប៉ុន្តែក្នុងរយៈពេលជាង០១សប្ដាហ៍មកនេះ ក្រុមពលករខុសច្បាប់ត្រូវគេបញ្ជូនមកឲ្យសមត្ថកិច្ចប៉ូលិសអន្តោប្រវេសន៍ដូចកាលពីមុនដដែល ព្រោះតែអាជ្ញាធរនៅទីនោះរវល់រៀបចំទីតាំងថ្មីដើម្បីទទួលពលករឲ្យបានសមរម្យ ៕
ចែករំលែកព័តមាននេះ