រាជធានីភ្នំពេញ ៖ ម៉ូតូវីវ៉ាមួយគ្រឿងបើកដោយស្រ្តីម្នាក់បត់ឆ្លងផ្លូវកាត់ពីមុខរថយន្តកុងតឺន័រត្រូវរថយន្តកុងតឺន័រចាប់ហ្រ្វាំងមិនទាន់ជ្រុលបុកនិងកិនពីលើម៉ូតូខ្ទេចមួយកំណាត់តែសំណាងល្អអ្នកជិះម៉ូតូលោតចេញពីម៉ូតូទាន់បណ្តាលឱ្យរងរបួសស្រាល ។ ហេតុការណ៍នេះកើតឡើងកាលពីវេលាម៉ោង ៨និង១០ នាទី យប់ ថ្ងៃទី ១៦ កញ្ញា ២០១៤ នៅចំណុចស្តុប០៧ កែងនឹងផ្លូវណតប្រ៊ីត ស្ថិតក្នុងសង្កាត់ទឹកថ្លា ខណ្ឌសែនសុខ ។
ប្រភពព័ត៌មានបានឱ្យដឹងថា នៅមុនពេលកើតហេតុគេឃើញម៉ូតូវីវ៉ា ពណ៌ក្រហម មួយគ្រឿង ពាក់ស្លាកលេខកណ្តាល 1J-7890 បើកដោយស្រ្តីម្នាក់តាមផ្លូវណតប្រ៊ីត ក្នុងទិសដៅពីត្បូងទៅជើង ខណៈមកដល់ចំណុចកើតហេតុម៉ូតូក៏បានបត់ឡើងផ្លូវសហព័ន្ធរុស្ស៊ី កាត់ពីមុខរថយន្តកុងតឺន័រ ពណ៌ខៀវ ពាក់ស្លាកលេខភ្នំពេញ 3A-6153 បើកបរក្នុងទិសដៅស្របគ្នា ហើយរថយន្តកុងតឺន័រមកពីក្រោយខំប្រឹងចាប់ហ្រ្វាំងទាំងបង្ខំតែមិនជាប់ ក៏ជ្រុលចង្កូតទៅបុកនិងកិនពីលើម៉ូតូខាងលើខ្ទេចមួយកំណាត់មុខ សំណាងល្អអ្នកបើកបរលោតចេញទាន់ គ្រាន់តែរលាត់ដៃជើងតិចតួច ។
ក្រោយពេលកើតហេតុភាគីរថយន្តកុងតឺន័របានចុះមកសម្រួលគ្នាជាមួយភាគីខាងម៉ូតូដោយភាគីខាងតថយន្តកុងតឺន័រសុខចិត្តចេញថ្លៃការជួសជុលម៉ូតូដើម្បីបញ្ចប់រឿងនៅនឹងកន្លែងកើតហេតុ ។
ចែករំលែកព័តមាននេះ