ខេត្តព្រះសីហនុ ៖ បើតាមសេចក្តីរាយការណ៍ព័ត៌មានពីអ្នកឆ្លើយឆ្លងព័ត៌មានកោះសន្តិភាពប្រចាំខេត្តព្រះសីហនុ បានឱ្យដឹងថា នៅវេលាម៉ោង៦និង៥០នាទីល្ងាច ថ្ងៃទី ១៦ កញ្ញា ២០១៤នេះទឹកបានលិចផ្លូវជាតិលេខ៤ ចំណុចស្ពានស្ទឹងច្រាល ស្ថិតនៅចន្លោះគីឡូម៉ែត្រលេខ១១៥ និង ១១៦ ក្នុងឃុំអូរបាក់រទេះ ស្រុកកំពង់សិលា ខេត្តព្រះសីហនុ ។
បើតាមលោក សៅ បុរីវឌ្ឍន អភិបាលស្រុកកំពង់សិលាដែលកំពុងមានវត្តមានដឹកនាំកម្លាំងសមត្ថកិច្ច ចុះជួយសម្រួលចរាចរណ៍នៅទីនោះបានឱ្យដឹងថា មកទល់នឹងវេលាម៉ោង៧យប់ ថ្ងៃដដែលនេះទឹកនៅតែបន្តលិចផ្លូវជាតិលេខ៤ ចន្លោះគីឡូម៉ែត្រលេខ១១៥ និង១១៦ នៅឡើយទេ ហើយកម្រិតទឹកដែលលិចនាពេលនេះគឺមានកំពស់ប្រហែល១តឹក និងមានបណ្តោយប្រហែល៨០ម៉ែត្រ ។ ទោះបីជាពេលនេះទឹកលិចផ្លូវយ៉ាងណាក៍ដោយ ក៏យានយន្តគ្រប់ប្រភេទអាចធ្វើចរាចរណ៍ទៅមកជាធម្មតា មិនមានអ្វីរាំងស្ទះនោះទេ ដោយមានសមត្ថកិច្ចចាំជួយសម្រួលចរាចរណ៍នៅទីនោះផងដែរ ។
លោកអភិបាលស្រុកកំពង់សិលាបានបន្តថា ប្រសិនជាអាកាសធាតុមិនអនុគ្រោះនៅតែបន្តធ្លាក់ភ្លៀងទៀតនោះផ្លូវនៅចំណុចស្ពានស្ទឹងច្រាលនឹងអាចលិចខ្លាំងហើយចរាចរណ៍អាចនិងបិទមួយរយៈក៏ប៉ុន្តែប្រសិនបើជាយប់នេះមេឃមិនមានធ្លាក់ភ្លៀងទៀតនោះ គឺមិនមានបញ្ហាសម្រាប់ការធ្វើចរាចរណ៍នោះទេ ។
គួរបញ្ជាក់ផងដែរថា កាលិចផ្លូវជាតិលេខ៤ ចំណុចស្ពានស្ទឹងច្រាល ស្ថិតនៅចន្លោះគីឡូម៉ែត្រលេខ១១៥ និង ១១៦នាពេលនេះគឺស្របពេលដែលក្រសួងធនធានទឹកនិងឧត្តុនិយមកម្ពុជាបានចេញសេចក្តីជូនដំណឹងនៅព្រឹកថ្ងៃទី ១៦ កញ្ញា ២០១៤ នេះថាមានព្យុះទី១៥ ឈ្មោះ កាល់ម៉េជី បាននឹងកំពុងស្ថិតនៅលើសមុទ្រប្រទេសចិនខាងត្បូង ហើយព្យុះនេះនឹងធ្វើដំណើរទៅដល់ឆ្នេរសមុទ្រវៀតណាមខាងជើងនៅយប់ថ្ងៃទី ១៧ កញ្ញា ២០១៤ ។ ស្ថានភាពបែននេះនឹងធ្វើឱ្យតំបន់មាត់សមុទ្រនៃព្រះរាជាណាចក្រកម្ពុជា មានភ្លៀងធ្លាក់ពីបង្គួរទៅច្រើន ព្រមទាំងមានខ្យល់បោកបក់ខ្លាំងជាពិសេសខេត្តកោះកុងនិងព្រះសីហនុ រលកសមុទ្រមានកំពស់ពី១ម៉ែត្រទៅ២.៥០ ម៉ែត្រ ដូច្នេះប្រជានេសាទសមុទ្រត្រូវមានការប្រុងប្រយ័ត្ន ។
ចែករំលែកព័តមាននេះ