រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់របស់ក្រុមហ៊ុនស្រាបៀរលីអូក្នុងប្រភេទទម្ងន់៦០គីឡូក្រាមនៅលើសង្វៀនស៊ីធីអិន នាថ្ងៃសៅរ៍ ទី២០ កញ្ញាសប្តាហ៍នេះ ឈានចូលដល់សប្តាហ៍ទី១០ ហើយ ។ កីឡាករថុល មករា មកពីក្លិបឃ្លាំងមឿងកីឡា ត្រូវជួបប្រកួតជាមួយកីឡាករសេក រតនា មកពីក្លិបសឹករងខេត្តសៀមរាប ចំណែកកីឡាកររឿម វណ្ណៈ មកពីសមាគមកីឡាប្រដាល់ក្រសួងការពារជាតិ ត្រូវជួបប្រកួតជាមួយកីឡាករផៃ គឹមហឿត មកពីក្លិបខេមរិន្ទមានរឹទ្ធ ។
ការប្រកួតលើកនេះ ថុល មករា មានជំនឿចិត្តយ៉ាងមុតមាំក្នុងការរកឱ្យបាន៣ពិន្ទុបន្ថែមដើម្បីគេចឱ្យផុតពីវគ្គជម្រុះ ។ ម្យ៉ាងវិញទៀតនោះការប្រកួតទាំង៤លើកមកនេះ ថុល មករា ជួបការបរាជ័យតែមួយលើកគត់ ហើយប្រសិនបើយកឈ្នះលើកនេះទៀតនោះអាចមានសង្ឃឹមមិនតិចជាង៨០% ឡើយក្នុងការឡើងទៅប្រកួតវគ្គបន្តទៀតនោះ ។ ចំណែក សេក រតនា ឆ្លងកាត់ការប្រកួតបាន៤លើកដែរ បុ៉ន្តែមិនទាន់ស្គាល់ឈ្នះម្តងណាឡើយ ។ ដូច្នេះសម្រាប់ការមកជួប ថុល មករា លើកនេះអាចចាត់ទុកថា ជាការធ្វើឡើងដើម្បីបង្គ្រប់កិច្ចបុ៉ណ្ណោះ ។
រឿម វណ្ណៈ ជួប ផៃ គឹមហឿត លើកនេះ ទោះបីសង្ឃឹមឈ្នះ ក៏ទំនងជាគ្មានឱកាសបានឡើងទៅប្រកួតនៅវគ្គបន្តទៀតដែរ ដោយសារប្រកួត៤លើកស្គាល់ឈ្នះតែ១លើកគត់ គឺដូចនឹងផៃ គឹមហឿត ដែរ ។ ដូច្នេះសម្រាប់ការប្រកួតលើកនេះទាំងសងខាងគ្រាន់តែធ្វើឡើងដើម្បីបង្គ្រប់កិច្ចតែបុ៉ណ្ណោះ ទោះឈ្នះឬចាញ់ គឺគ្មានន័យអ្វីទាំងអស់ ៕
ចែករំលែកព័តមាននេះ