រាជធានីភ្នំពេញ ៖ ក្រុមអត្តពលិកជម្រើសជាតិកម្ពុជាចំនួន៨ប្រភេទកីឡាកាលពីយប់ថ្ងៃទី១៥ កញ្ញា បានចេញដំណើរទៅចូលរួមព្រឹត្តិការណ៍កីឡា Asian Games លើកទី១៧ នៅទីក្រុង Inchoen ប្រទេសកូរ៉េខាងត្បូង ដែលនឹងចាប់ផ្តើមពីថ្ងៃទី១៩ កញ្ញា ដល់៤ តុលា ឆ្នាំ២០១៤ ខាងមុខនេះ ។
រាជធានីភ្នំពេញ ៖ ក្រុមអត្តពលិកជម្រើសជាតិកម្ពុជាចំនួន៨ប្រភេទកីឡាកាលពីយប់ថ្ងៃទី១៥ កញ្ញា បានចេញដំណើរទៅចូលរួមព្រឹត្តិការណ៍កីឡា Asian Games លើកទី១៧ នៅទីក្រុង Inchoen ប្រទេសកូរ៉េខាងត្បូង ដែលនឹងចាប់ផ្តើមពីថ្ងៃទី១៩ កញ្ញា ដល់៤ តុលា ឆ្នាំ២០១៤ ខាងមុខនេះ ។ អត្តពលិកទាំង៨ប្រភេទកីឡានោះរួមមាន តេក្វាន់ដូ, ចំបាប់, យូដូ, អត្តពលកម្ម, ហែលទឹក, វាយកូនបាល់, Soft Tennis និងបាល់ទះលើឆ្នេរខ្សាច់ ។
មុនពេលចេញដំណើរនៅព្រឹកថ្ងៃទី១៥ កញ្ញា ប្រតិភូ និងក្រុមកីឡាករ-កីឡាការិនីជម្រើសជាតិ បានចូលជួបសម្តែងការគួរសមជាមួយលោកបណ្ឌិត្យសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់សម្តេចតេជោ ហ៊ុន សែន ប្រមុខរាជរដ្ឋាភិបាលនៃព្រះរាជាណាចក្រកម្ពុជា ។ មន្ត្រីរាជរដ្ឋាភិបាលដែលមានវត្តមានក្នុងឱកាសនោះរួមមាន លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា, លោកហង់ ជួនណារុ៉ន រដ្ឋមន្ត្រីក្រសួងអប់រំ យុវជន និងកីឡា និងមន្ត្រីជាន់ខ្ពស់ផ្នែកកីឡាជាច្រើនរូបទៀត ។
នៅក្នុងឱកាសជួបសំណេះសំណាលនាពេលនោះ លោកបណ្ឌិត្យសភាចារ្យ សុខ អាន បានផ្តាំផ្ញើ៣ចំណុចសំខាន់ៗដល់ប្រតិភូថ្នាក់ដឹកនាំ និងកីឡាករ-កីឡាការិនីទាំងអស់គឺ ៖ ទី១-ជំរុញឱ្យមានកិច្ចសហការល្អរវាងគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ដើម្បីធ្វើឱ្យវិស័យកីឡារបស់កម្ពុជា មានភាពរីកចម្រើន ។ ពិសេសសម្របសម្រួលពីលក្ខណៈបច្ចេកទេស និងយុទ្ធសាស្ត្រដើម្បីដណ្តើមបានជ័យលាភីជូនជាតិមាតុភូមិ ។ ទី២-ការរៀបចំចេញដំណើរត្រូវគោរពគោលការណ៍ និងវិន័យ សេចក្តីថ្លៃថ្នូរ ប្រកាន់ខ្ជាប់នូវអត្តសញ្ញាណនៃប្រទេសជាតិយើង ពិសេសបច្ចេកទេសមុនពេលប្រកួត ធ្វើយ៉ាងណាឱ្យអត្តពលិកមានសុខភាព និងការសម្រាកគ្រប់គ្រាន់ ។
ទី៣-ជំរុញលើកទឹកចិត្តឱ្យមានការប្រឹងប្រែងដណ្តើមមេដាយឱ្យបានក្នុងព្រឹត្តិការណ៍ថ្នាក់អាស៊ី ព្រោះគិតមកដល់ពេលនេះ ជាខួបទី៦០ឆ្នាំនៃការចូលរួមរបស់កម្ពុជា បន្ទាប់ពីខកខានទទួលមេដាយជាច្រើនឆ្នាំមកហើយ ។ ជាមួយគ្នានេះ លោកបណ្ឌិតសភាចារ្យ ក៏បានផ្តល់ប្រាក់លើកទឹកចិត្តដល់ក្រុមអត្តពលិកជម្រើសជាតិទាំងអស់ក្នុងម្នាក់២០០ដុល្លារផងដែរ ។ ដោយឡែកលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានឱ្យដឹងដែរថា ការប្រកួតកីឡា Asian Games ដែលធ្វើនៅទីក្រុង Inchoen ប្រទេសកូរ៉េខាងត្បូង នឹងចាប់ផ្តើមនៅថ្ងៃទី១៩ ខែកញ្ញា ដល់ថ្ងៃ៤ ខែតុលា ឆ្នាំ២០០៤ ។ ក្រុមអត្តពលិកយើងចេញដំណើរមុនព្រឹត្តិការណ៍ចាប់ផ្តើមដើម្បីឱ្យអត្តពលិកទាំងអស់ផ្សាំទៅនឹងអាកាសធាតុនៅទីនោះ ហើយអាចស្តារថាមពលឡើងវិញបន្ទាប់ពីធ្វើដំណើររួច ។
អ្វីដែលគួរឱ្យកត់សម្គាល់ នៅពេលចេញដំណើរអត្តពលិកម្នាក់ៗសុទ្ធតែមានទឹកមុខរីករាយ និងពោរពេញដោយការប្តេជ្ញាចិត្តដើម្បីយកជ័យជម្នះជូនជាតិ ខណៈអត្តពលិកមួយចំនួនក្នុងចំណោមអត្តពលិកទាំងអស់សុទ្ធតែដណ្តើមបានលទ្ធផលល្អនៅក្នុងព្រឹត្តិការណ៍ស៊ីហ្គេមកាលពីចុងឆ្នាំ២០១៣ កន្លងទៅ ។ សូមបញ្ជាក់ថា ចំពោះការចូលរួមព្រឹត្តិការណ៍កីឡាថ្នាក់អាស៊ីមួយនេះ ប្រាក់រង្វាន់របស់រាជរដ្ឋាភិបាលដែលផ្តល់ជូនតាមអនុក្រឹត្យថ្មីឆ្នាំ២០១៣ គឺមេដាយមាសទទួលបានប្រាក់រង្វាន់៨០លានរៀល, មេដាយប្រាក់៤០លានរៀល និងមេដាយសំរឹទ្ធ២៤លានរៀល ។ មិនត្រឹមតែបុ៉ណ្ណោះ សណ្ឋាគារណាហ្គាវើល និងក្រុមហ៊ុនស្រាបៀរអង្គរ សុទ្ធតែសន្យាផ្តល់រង្វាន់ជាទីគាប់ចិត្តដល់អ្នកដណ្តើមបានជ័យលាភីលើសពីប្រាក់រង្វាន់ដែលផ្តល់ជូនកាលពី SEA Games លើកទី២៧ នៅប្រទេសមីយ៉ាន់ម៉ាទៀតផង ៕
ចែករំលែកព័តមាននេះ