ខេត្តបន្ទាយមានជ័យ ៖ អ្នកនាំភ្ញៀវជនជាតិខ្មែរឲ្យក្រុមហ៊ុនខ្មែរថៃជិត១០នាក់ ត្រូវសមត្ថកិច្ចថៃចាប់ញាត់ចូលរថយន្តទ្រុងដោយពុំដឹងមូលហេតុនៅវេលាម៉ោងជាង១រសៀល ថ្ងៃទី១៦ កញ្ញា នៅច្រកទ្វារអន្តរជាតិខ្លងលឹកទឹកដីថៃឈមនឹងទឹកដីកម្ពុជាច្រកទ្វារអន្តរជាតិប៉ោយប៉ែត។ គេឃើញរថយន្តទ្រុងរបស់ថៃពណ៌ខ្មៅមួយគ្រឿងបានដឹកក្រុមអ្នកនាំភ្ញៀវទាំងអស់ខាងលើ បន្ទាប់ពីពួកគេត្រូវសមត្ថកិច្ចថៃចាប់។
ប្រភពពីអ្នកនាំភ្ញៀវម្នាក់នៅច្រកទ្វារអន្តរជាតិប៉ោយប៉ែតនិយាយថា អ្នកដែលត្រូវសមត្ថកិច្ចថៃចាប់ទាំងនេះមាន៦នាក់ជាអ្នកនាំភ្ញៀវ និងម្នាក់ជាពលរដ្ឋធម្មតាដែលចេញចូលចាំចាប់ម៉ូយឲ្យរថយន្តនៅចំណុចរង្វង់មូល។ ក្រុមអ្នកនាំភ្ញៀវជាច្រើនបានសម្តែងការខឹងសម្បាទៅនឹងទង្វើររបស់ភាគីថៃដែលចាប់អ្នកនាំភ្ញៀវទាំងនេះដោយពួកគេនិយាយថាភាគីថៃមិនគួរចាប់នោះទេ ព្រោះអ្នកនាំភ្ញៀវសុទ្ធតែមានកាតសម្គាល់ខ្លួនសម្រាប់នាំភ្ញៀវ(Pass)ចេញចូលច្រកទ្វារអន្តរជាតិនៃប្រទេសទាំង២តាំងពីដើមរៀងមក។ ប្រភពដដែលបានលើកឡើងថា អ្នកនាំភ្ញៀវមិនមែនមានតែខាងភាគីកម្ពុជាទេ ខាងភាគីថៃក៍មានចូលមកទឹកដីខ្មែរដូចគ្នាតែខាងកម្ពុជាមិនដែលប៉ះពាល់ឡើយ ក្នុងនោះមានទាំងអ្នករត់ការកាន់ស្រាបារីឲ្យភ្ញៀវជាជនជាតិថៃ ពេលចេញពីតាមកាស៊ីណូទៀតផង។
ជុំវិញព័ត៌មានខាងលើលោកជង់ឡឹម ប្រធានមន្ទីរទេសចរណ៍ខេត្តបន្ទាយមានជ័យ និងជាអនុប្រធានក្រុមការងារច្រកទ្វារមិនអាចទំនាក់ទំនងសុំការបំភ្លឺបានទេ ដោយទូរស័ព្ទរបស់លោកចុចចូលជាច្រើនដងគ្មានអ្នកទទួល។
ចំណែកលោកនេត សារី អគ្គកុងស៊ុលខ្មែរប្រចាំខេត្តស្រះកែវ ប្រទេសថៃ មានប្រសាសន៍តាមទូរស័ព្ទថា បញ្ហាហ្នឹងតាមលោកដឹងគឺពួកអ្នកនាំភ្ញៀវឡើងចាប់ភ្ញៀវរញ៉េរញ៉ៃលើទឹកដីថៃហើយខាងភាគីថៃគេហាមឃាត់នៅតែមិនព្រមស្ដាប់ទៀតរហូតភ្ញៀវខ្លះភ័យខ្លាចថែមទាំងស្រែកទៀតផង ទើបសមត្ថកិច្ចថៃមានវិធានការតែម្ដង។ លោកបន្តថា ក្រុមអ្នកត្រូវសមត្ថកិច្ចថៃចាប់នេះមានចំនួន៧នាក់ហើយលោកថានឹងរកមធ្យោបាយជួយដោះស្រាយជាមួយភាគីថៃ ដើម្បីឲ្យបានវិលត្រឡប់វិញក្នុងពេលឆាប់ៗនេះ៕
ចែករំលែកព័តមាននេះ