រាជធានីភ្នំពេញ ៖ ក្រុមហ៊ុនប្រមាណជាង១០០នឹងចូលរួមតាំងពិព័រណ៌បច្ចេកវិទ្យាព័ត៌មានវិទ្យាក្នុងខែវិច្ឆិកា ២០១៤ នេះ ស្តីអំពីបច្ចេកវិទ្យាព័ត៌មានវិទ្យា អេឡិចត្រូនិច និងទូរគមនាគមន៍អន្តរជាតិ(ITET)លើកទី១ នៅកម្ពុជា ឆ្នាំ២០១៤ ដែលពិធីនេះនឹងរៀបចំឡើងរយៈពេល៣ថ្ងៃ គិតចាប់ពីថ្ងៃទី១៤ដល់១៦ វិច្ឆិកា ២០១៤ នៅមជ្ឈមណ្ឌលពិព័រណ៌កោះពេជ្រ ក្រោមកិច្ចសហការពីក្រសួងប្រៃសណីយ៍ និងទូរគមនាគមន៍ និងមានកិច្ចគាំទ្រយ៉ាងពេញទំហឹងពីក្រសួងពាណិជ្ជកម្ម ព្រមទាំងមានការចូលសហការឧបត្ថម្ភពីបណ្តាក្រុមហ៊ុន ICT នៅកម្ពុជាជាច្រើនទៀត។
តាមគំរោង ពិព័រណ៌បច្ចេកវិទ្យាព័ត៌មានវិទ្យា អេឡិចត្រូនិច និងទូរគមនាគមន៍ អន្តរជាតិ(ITET)លើកទី១ ឆ្នាំ២០១៤នេះ នឹងមានវិស័យឯកជន ចួលរួមប្រមាណ១២០ក្រុមហ៊ុនជាមួយស្តង់ដាក់តាំងបង្ហាញផលិតផល និងសេវាកម្ម ICT ប្រមាណ៥០០ស្តង់ និងមានអ្នកចូលរួមទស្សនា ទាំងអ្នកធ្វើសេវាកម្ម និងសាធារណជន ពិសេស សិស្ស និស្សិត ជាច្រើនពាន់នាក់។
នៅក្នុងកិច្ចប្រជុំផ្សព្វផ្សាយជាមួយបណ្តាក្រុមហ៊ុនឯកជន ដែលបំរើសេវាកម្មពាក់ពន្ធ័ នឹងវិស័យអាយស៊ីធី នៅក្នុងប្រទេសកម្ពុជានៅសាលប្រជុំ នៃទីស្តីការក្រសួងប្រៃសណីយ៍ និងទូរគមនាគមន៍ កាលពីថ្ងៃទី១៥ ខែកញ្ញា សហព័ន្ធបច្ចេកវិទ្យា ព័ត៌មានវិទ្យា កម្ពុជា ( ICT Federation) បានប្រកាសពីការរៀបចំពិព័រណ៌បច្ចេកវិទ្យា ព័ត៌មានវិទ្យាអេឡិចត្រូនិច និងទូរគមនាគមន៍អន្តរជាតិ(ITET)លើកទី១នៅកម្ពុជា ឆ្នាំ២០១៤នេះ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ