យន្តហោះប្រយុទ្ធ១គ្រឿងកាលពីថ្ងៃទី១៥ កញ្ញា បានវាយប្រហារលើមូលដ្ឋានយោធាមួយកន្លែងដែលត្រួតត្រាដោយពួកជីវពលប្រឆាំងរដ្ឋាភិបាលនៅភាគខាងលិចលីប៊ី ដែលការវាយប្រហារនោះប្រកាសទទួលខុសត្រូវដោយឧត្តមសេនីយ៍ ខាលីហ្វា ហាហ្វតា ដែលប្រទូស្តរ៉ាយជាមួយពួកអ៊ិស្លាមនិយម ។
យោងតាមទីភ្នាក់ងារព័ត៌មានលីប៊ី LANA ថា ការវាយឆ្មក់នោះសំដៅលើឃ្លាំងស្តុកគ្រាប់រំសេវមួយកន្លែងគ្រប់គ្រងដោយក្រុមប្រដាប់អាវុធមួយនៅទីក្រុង GHARYAN ចម្ងាយ១២០គីឡូម៉ែត្រភាគនិរតីក្រុងទ្រីប៉ូលី បណ្តាលឱ្យមនុស្ស១៥នាក់ត្រូវរបួស ។ ពួកជីវពលនៅក្រុង GHARYAN ស្ថិតក្នុងក្រុម FAJR LIBYA ជាក្រុមសម្ព័ន្ធមិត្តរបស់ពួកជីវពលដែលដណ្តើមត្រួតត្រាក្រុងទ្រីប៉ូលីកាលពីដំណាច់ខែសីហា ក្រោយការប្រយុទ្ធគ្នារយៈពេល១ខែកន្លះ និងក្រោយពីវាយបណ្តេញពួកជីវពលប្រឆាំងគ្នាចេញពីព្រលានយន្តហោះអន្តរជាតិក្រុងទ្រីប៉ូលីមក ។
ក្រុម FAJR LIBYA កាលពីខែមុន នៅក្រុងទ្រីប៉ូលី ធ្លាប់រងការវាយប្រហារតាមអាកាសពីសំណាក់យន្តហោះចម្បាំងរបស់អេមីរ៉ាត អារ៉ាប់រួម និងអេហ្ស៊ីប ។ ក្រុម FAJR LIBYA បានចោទប្រកាន់សភាលីប៊ីកើតចេញពីការបោះឆ្នោតថ្ងៃទី២៥ មិថុនា គ្របដណ្តប់ដោយពួកពុំមែនអ៊ិស្លាមនិយម ហើយទទួលស្គាល់ដោយសហគមន៍អន្តរជាតិថា រួមគំនិតគ្នាជាមួយអារ៉ាប់រួម និងអេហ្ស៊ីប ។ ចំណែករដ្ឋាភិបាលលីប៊ី ដែលរើចេញពីទីក្រុងទ្រីប៉ូលី បានចោទប្រកាន់ប្រទេសកាតា និងស៊ូដង់ថា ជួយផ្តល់អាវុធដល់ពួកប្រឆាំងអ៊ិស្លាមនិយម ៕
ចែករំលែកព័តមាននេះ