រាជធានីភ្នំពេញ ៖ ឃាតករម្នាក់ដែលជាផ្កាយ២យោធា លោក គឹម ម៉ាវិន្ថា អគ្គនាយកក្រុមហ៊ុនជីអេសធី ដឹកអ្នកដំណើរ ត្រូវបានបញ្ជូនទៅឃុំខ្លួននៅពន្ធនាគារព្រៃសរួចហើយ កាលពីថ្ងៃទី១៤ កញ្ញា ខណៈមានសុខភាពខ្សោយខ្លាំងនិងមានវិប្បដិសារី រហូតចង់សម្លាប់ខ្លួន គ្រាន់តែបានដឹងពីការចោទប្រកាន់របស់តំណាងអយ្យការ ដាក់ក្រោមបទឃាតកម្មគិតទុកជាមុន តាមមាត្រា២០០ នៃក្រមព្រហ្មទណ្ឌ ដែលមានទោសត្រូវជាប់ពន្ធនាគារអស់មួយជីវិត ។
ក្រុមការងារនៃនាយកដ្ឋានកណ្តាលនគរបាលយុត្តិធម៌ក្រសួងមហាផ្ទៃ បានប្រាប់អ្នកសារព័ត៌មាន នៅថ្ងៃទី១៥ កញ្ញា ថា ពិតណាស់លោក គឹម ម៉ាវិន្ថា បានស្រទ្បាញ់គ្នាជាមួយលោកស្រីអនុសេនីយ៍ទោ វ៉ា ដារី ដោយមិនបានរៀបការតាមប្រពៃណីទេ តែបានចុះលិខិតអាពាហ៍ពិពាហ៍ស្របច្បាប់ និងមានចំណងដៃកូនស្រីម្នាក់ ។ ទោះបីជាបែបណា ២នាក់ប្តីប្រពន្ធនេះ រស់នៅជាមួយគ្នាមិនសូវមានសេចក្តីសុខទ្បើយ ព្រោះលោក ម៉ាវិន្ថា ជាមនុស្សកោងកាចណាស់ វាយទាត់ធាក់មិនបានគិតប្រពន្ធកូនទេ ។ មុនចាប់ដៃគ្នាជាប្តីប្រពន្ធ លោក គឹម ម៉ាវិន្ថា បានសន្យាសង់លំនៅឋានមួយកន្លែង សម្រាប់លោកស្រី វ៉ា ដារី និងប្រគល់ទ្រព្យសម្បត្តិមួយចំនួនសម្រាប់ធ្វើទុនរកស៊ី តែទីបំផុតលោកស្រី វ៉ា ដារី ត្រូវរស់នៅជ្រកក្រោមដំបូលក្រុមហ៊ុន រហូតបានកូនស្រីមួយ ហើយត្រូវលោក គឹម ម៉ាវិន្ថា សម្លាប់ចោលទាំងម្តាយនិងកូនទៀត ។
ប្រភពដដែលបន្តថា ប្តីប្រពន្ធ២នាក់នេះ ឈ្លោះគ្នាមិនទំនេរ ហើយចុងក្រោយ នៅថ្ងៃទី១២ កុម្ភៈ ឆ្នាំ២០១៤ លោកស្រី វ៉ា ដារី និងកូន ព្រមទាំងសាច់ញាតិ បានទៅជួបឈ្មោះ ហាក់ ម៉ៅ ជាមន្ត្រីបម្រើការងារនៅក្រសួងបរិស្ថាន ដែលកំពុងសិក្សានៅប្រទេសជប៉ុន ។ ការជួបគ្នានេះ គឺនៅផ្សារសុវណ្ណា ដែលពេលនោះ លោកគឹម ម៉ាវិន្ថា បានកើតក្តីប្រចណ្ឌប្រពន្ធជាមួយឈ្មោះ ហាក់ ម៉ៅ ទើបពេលត្រទ្បប់មកផ្ទះវិញ ក៏មានជម្លោះបែកផ្សែង ។ នៅថ្ងៃទី១៤ កុម្ភៈ ប្តីប្រពន្ធ២នាក់នេះ បានចេញដំណើរទៅស្រុកកំណើតខាងនាង វ៉ា ដារី ឯស្រុកចំការលើ ខេត្តកំពង់ចាម និងបានទៅឈ្លោះគ្នានៅទីនោះទៀត ហើយនៅព្រឹកថ្ងៃទី១៥ កុម្ភៈ ទើបត្រទ្បប់មកភ្នំពេញវិញ ។
តាមបុគ្គលិកក្រុមហ៊ុនបញ្ជាក់ថា នៅម៉ោងប្រមាណ១២យប់ ថ្ងៃទី១៥ កុម្ភៈ លោកគឹម ម៉ាវិន្ថា បានឈ្លោះជាមួយប្រពន្ធ ដែលជម្លោះនេះហើយបានឈានទៅដល់ការសម្លាប់ទាំងកូនស្រីអាយុ៦ឆ្នាំ ។ លុះក្រោយពីចុះទៅបាត់មួយសន្ទុះ គេឃើញនាំកូនប្រុសបង្កើតឈ្មោះ ស ធី ហៅ សែម គឹមរិទ្ធី ដែលបានឱ្យធុងទឹកកកនិងថង់ប្លាស្ទិក យកទៅច្រកសពម្តាយនិងកូន ដោយមានវត្តមានឈ្មោះ ជា សំណាង កូនប្រសា និងសន្តិសុខ២នាក់ ជួយលើកដាក់សពយកទៅទម្លាក់ចោលនៅជ្រោះជើងភ្នំពេជ្រនិល ។
ពេលសម្លាប់ប្រពន្ធនិងកូនហើយ ឃាតករឈ្មោះ គឹម ម៉ាវិន្ថា បានទៅដាក់ពាក្យបណ្តឹងនៅសមត្ថកិច្ចមូលដ្ឋានថា ប្រពន្ធបាត់ពីផ្ទះអាចរត់តាមសហាយសុំជួយរកផង ។
ក្រុមការងារជំនាញរបស់នាយកដ្ឋានកណ្តាលនគរបាលយុត្តិធម៌ក្រសួងមហាផ្ទៃបន្តថា ពេលសម្លាប់ប្រពន្ធនិងកូនហើយ នៅថ្ងៃទី២៩ កក្កដា ឆ្នាំ២០១៤ បន្ទាប់ពីបែកការណ៍នៅពេលសពម្តាយនិងកូន ត្រូវបានគេប្រទះឃើញនៅជ្រោះជើងភ្នំពេជ្រនិល ឃាតកររូបនេះបាននាំស្រីស្នេហ៍ដ៏ស្រស់ស្អាតម្នាក់យ៉ាងប្រញាប់ប្រញាល់ទ្បើងយន្តហោះជើងភ្នំពេញ-ក្រុងបាងកក ទៅកាន់ប្រទេសថៃ ដោយបានទាក់ទងអ្នកបកប្រែខ្មែរម្នាក់ ធ្វើជាអ្នកនាំផ្លូវ (Guide) ជួលទីកន្លែងស្នាក់នៅក្នុងក្រុងប៉ាតាយ៉ា ។
ពេលស្នាក់នៅក្នុងក្រុងប៉ាតាយ៉ា ប្រទេសថៃ ប៉ុន្មានខែនោះ លោកគឹម ម៉ាវិន្ថា ពិតជាមានសេចក្តីសុខណាស់ជាមួយស្រីស្នេហ៍ ព្រោះគិតថាអត់មានអ្នកណាដឹងថាខ្លួនរស់នៅទីណា ។
ប៉ុន្តែនៅថ្ងៃទី១១ កញ្ញា ពេលបានដឹងអំពីសកម្មភាពរបស់សមត្ថកិច្ចកម្ពុជា-ថៃ សហការតាមរកចាប់ខ្លួន ក៏បានបណ្តេញស្រីស្នេហ៍ឱ្យវិលមកប្រទេសវិញតែម្នាក់ឯង ហើយរូបគេមានបំណងចាកចេញពីប្រទេសថៃ ទៅកាន់ប្រទេសផ្សេងទៀត ដោយឆ្លងកាត់ប្រទេសទ្បាវ តែត្រូវសមត្ថកិច្ចថៃចាប់ខ្លួនពេលរង់ចាំធ្វើបែបបទឆ្លងដែន និងបញ្ជូនមកឱ្យកម្ពុជាវិញ ។ តាមក្រុមការងារជំនាញបានបន្តទៀតថា ពេលនេះសមត្ថកិច្ចកំពុងស្វែងរកជួបនាងជាស្រីស្នេហ៍ចុងក្រោយរបស់លោកផ្កាយ២ជាឃាតករ ដើម្បីឱ្យជួយបំភ្លឹ និងធ្វើជាសាក្សីផងដែរ ។ ប៉ុន្តែមិនទាន់ដឹងថា នារីរូបនោះ បានវិលមកកម្ពុជាវិញឬបែបណានោះទេ ព្រោះតាមច្រកព្រំដែនពុំទាន់ឃើញឈ្មោះរបស់នាងឆ្លងកាត់ចូលមកប្រទេសវិញនៅទ្បើយ ឬមួយឆ្លងតាមច្រករបៀងក៏មិនដឹង ៕
ចែករំលែកព័តមាននេះ