រាជធានីភ្នំពេញ ៖ ជន៣នាក់ពាក់ព័ន្ធនឹងករណីក្លែងត្រា និងក្លែងលិខិតសាធារណៈរបស់រដ្ឋ និងឯកជន ត្រូវបាននគរបាលព្រហ្មទណ្ឌក្រសួងមហាផ្ទៃ បញ្ជូនទៅកាន់សាលាដំបូងរាជធានីភ្នំពេញ នៅថ្ងៃទី១៤ កញ្ញា ដើម្បីប្រគល់ជូនតំណាងអយ្យការធ្វើការចោទប្រកាន់ជាផ្លូវការ ។ ជនទាំង៣នាក់នេះមាន ១-ឈ្មោះ ស៊ុំ ឧត្តមរស្មី ភេទប្រុស អាយុ២៤ឆ្នាំ ស្នាក់នៅផ្ទះជួលលេខ៧៧ ផ្លូវលំ ភូមិត្រពាំងឈូក សង្កាត់ទឹកថ្លា ខណ្ឌឫស្សីកែវ ២-ឈ្មោះ នៅ សាខន ភេទប្រុស អាយុ៥២ឆ្នាំ ស្នាក់នៅផ្ទះលេខ១២៦E4 ផ្លូវលេខ៥៣ សង្កាត់ផ្សារថ្មីទី៣ ខណ្ឌដូនពេញ និង៣-ឈ្មោះ ញ៉េប សុវណ្ណា ភេទប្រុស អាយុ៥១ឆ្នាំ ស្នាក់នៅក្នុងសង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង ។
ពួកគេត្រូវបាននគរបាលព្រហ្មទណ្ឌស្រាវជ្រាវនិងចាប់ខ្លួន កាលពីថ្ងៃទី១០ កញ្ញា ដោយដកហូតបានត្រាក្លែងក្លាយជាង១ពាន់ និងឯកសារក្លែងជាច្រើនទៀត ។ ទាក់ទិននឹងការឃាត់ខ្លួនជនទាំង៣នាក់ខាងលើនេះ នៅសាលាដំបូងរាជធានីភ្នំពេញ ត្រូវបានគេដឹងថា ក្នុងអំទ្បុងខែមករា និងខែមីនា ឆ្នាំ២០១៤ ក្រសួងពាណិជ្ជកម្មបានដាក់សំណើទៅក្រសួងមហាផ្ទៃ ឱ្យបើកការស៊ើបអង្កេត ព្រមទាំងចាត់វិធានការតាមផ្លូវច្បាប់ លើបុគ្គល ឬក្រុមហ៊ុន ដែលបានលួចបន្លំធ្វើលិខិតផ្លូវការរបស់ក្រសួងពាណិជ្ជកម្ម នាំឈើចេញទៅប្រទេសវៀតណាម ដោយមិនមានអាជ្ញាប័ណ្ណនាំចេញជាផ្លូវការពីក្រសួង ។ ជាលទ្ធផលនៃកិច្ចប្រតិបត្តិការរបស់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ក្រោមការចង្អុលបង្ហាញពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ នៅថ្ងៃទី១០ កញ្ញា ក៏មានការឃាត់ខ្លួនជនសង្ស័យ៣នាក់នេះ ដែលដឹកនាំកម្លាំងចុះអនុវត្តដោយលោកឧត្តមសេនីយ៍ត្រី ទ្បឹក វណ្ណៈ អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ និងមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ ។
នៅថ្ងៃទី១១ កញ្ញា លោកឧត្តមសេនីយ៍ត្រី ទ្បឹក វណ្ណៈ បាននាំជនសង្ស័យ២នាក់ទៅឆែកឆេរលំនៅឋាន២កន្លែង រកឃើញនិងដកហូតវត្ថុតាងរួមមាន លំនៅឋានរបស់ជនសង្ស័យឈ្មោះ ស៊ុំ ឧត្តមរស្មី កុំព្យូទ័រ១ឈុត ម៉ាស៊ីនព្រីនចំនួន៥គ្រឿង ម៉ាស៊ីនអ៊ុតកាត២គ្រឿង ឧបករណ៍ជះពន្លឺដើម្បីក្លែងហត្ថលេខ១សម្រាប់ បន្ទះត្រាចំនួន៦៥០ ត្រាស្ងួតដែកចំនួន៣៧ ត្រាឈ្មោះចំនួន៨៩៧ ប្រដាប់កាត់កាត១ និងឧបករណ៍សម្រាប់ផលិតឯកសារក្លែងផ្សេងៗមួយចំនួនទៀត ។ រីឯលិខិតក្លែងមាន លិខិតឆ្លងដែន អត្តសញ្ញាណប័ណ្ណសញ្ជាតិខ្មែរ សំបុត្រកំណើត ប័ណ្ណប៉ាតង់ ក្លែងឯកសារក្រសួងពាណិជ្ជកម្ម ក្រសួងសេដ្ឋកិច្ចនិងហិរញ្ញវត្ថុ ក្រសួងការបរទេស និងសហប្រតិបត្តិការអន្តរជាតិ ក្រសួងយុត្តិធម៌ ក្រសួងអប់រំ យុវជន និងកីទ្បា ក្រសួងកសិកម្ម និងក្រសួងធនធានទឹក ។
ជាមួយនេះ បានរកឃើញត្រាក្លែងរបស់អគ្គស្នងការដ្ឋាននគរបាលជាតិ ត្រាក្លែងរបស់ស្នងការដ្ឋាននគរបាលខេត្តស្វាយរៀង ខេត្តបន្ទាយមានជ័យ ខេត្តបាត់ដំបង ខេត្តកំពត ខេត្តស្ទឹងត្រែង ។ ត្រាក្លែងរបស់សាលាដំបូងខេត្តបាត់ដំបង និងរាជធានីភ្នំពេញ ត្រាក្លែងរបស់សាលារាជធានីភ្នំពេញ សាលាខេត្តស្ទឹងត្រែង សាលាខេត្តក្រចេះ អធិការដ្ឋានខណ្ឌមួយចំនួន និងសាលាឯកជនមួយចំនួនទៀត ។ ចំណែកនៅផ្ទះរបស់ឈ្មោះ នៅ សាខន រកឃើញនិងដកហូតកុំព្យូទ័រ១ឈុត ម៉ាស៊ីនស្គែន១គ្រឿង ម៉ាស៊ីនព្រីន៤គ្រឿង ពុម្ពត្រា១ ក្បាលវីស៊ីឌី១គ្រឿង ពុម្ពអូសស្បៃ១៥គ្រឿង ពុម្ពត្រាក្រដាស៤១សន្លឹក និងសម្ភារសម្រាប់បម្រើការផលិតឯកសារក្លែងមួយចំនួនធំ ដែលពួកគេសារភាពថា បានប្រកបរបរនេះ តាំងតែពីឆ្នាំ២០០៧មកម្ល៉េះ ។
វត្ថុតាងដែលសមត្ថកិច្ចដកហូតខាងលើ ជាបន្ទុកសម្រាប់សមត្ថកិច្ចដាក់ជូនតំណាងអយ្យការអមសាលាដំបូង ដើម្បីធ្វើការចោទប្រកាន់លើជនត្រូវចោទទាំង៣នាក់នេះ ៕
ចែករំលែកព័តមាននេះ