រាជធានីភ្នំពេញ ៖ កម្មករសំណង់២នាក់ដែលគ្មានលុយសូម្បីតែមួយកាក់មួយសេននៅជាប់ខ្លួន លុះពេលមិត្តភក្ដិ២នាក់ទៀតដែលទើបស្គាល់គ្នាថ្មីៗបបួលចូលទៅផឹកស៊ីច្រៀងខារ៉ាអូខេ ហើយធានាថា ប៉ាវម៉ាសប្បាយ ក៏នាំគ្នាត្រេកអរយ៉ាងខ្លាំង ព្រោះចង់សប្បាយយូរហើយ ។ ដោយនឹកឃើញថា កម្រមានអ្នកប៉ាវបែបនេះណាស់ ក៏យល់ព្រមដោយមិនមានការសង្ស័យអ្វីទាំងអស់ ព្រោះមានការទុកចិត្តទុកថ្លើមទៅលើមិត្តភកិ្ដខាងលើនោះទាំងស្រុង ។
ប៉ុន្តែអ្វីដែលនឹកស្មានមិនដល់នោះ គឺការសប្បាយក្លាយជាទុក្ខ និងបានធ្វើឱ្យអ្នកទាំង២នាក់នោះខ្មាសគេពេញក្នុងហាងខារ៉ាអូខេ ព្រោះតែនៅពេលចូលច្រៀងសប្បាយអស់ចិត្តហើយ មិត្តភក្ដិកំហូចទាំង២នាក់នោះបានយកពួកគេធ្វើជាដើមទុន និងឈ្នាន់ទៅវិញ។ មិត្តភក្ដិចោលម្សៀតខាងលើបានប្រើល្បិចថា មានការរវល់ចេញទៅក្រៅមួយភ្លែត នឹងត្រឡប់មកវិញ ហើយចាំគិតគូរទូទាត់លុយ ថ្លៃច្រៀងខារ៉ាអូខេឱ្យ បន្ទាប់មកក៏ចេញទៅបាត់រហូតតែម្ដង ។ លុះពេលម្ចាស់ហាងគិតលុយអស់ចំនួនជាង៩០ដុល្លារ ពួកគេគ្មានលុយឱ្យ ក៏ត្រូវម្ចាស់ហាងប្ដឹងប៉ូលិសឱ្យចាប់ខ្លួន និងបង្កឱ្យមានការភ្ញាក់ផ្អើលពេញក្នុងហាង ។
ហេតុការណ៍នេះកើតឡើងកាលពីវេលាម៉ោង៩និង៥៥នាទីយប់ថ្ងៃទី១៤ កញ្ញា នៅក្នុងហាងខារ៉ាអូខេយីហោ អ៊ែរផត (KTV) ដែលមានទីតាំងស្ថិតនៅតាមបណ្ដោយផ្លូវវិមានសពកែងនឹងមហាវិថីសហព័ន្ធរុស្ស៊ី ក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។ បុរសទាំង២នាក់នោះម្នាក់ឈ្មោះ ឆន ពៅ អាយុ២៧ឆ្នាំ មានស្រុកកំណើតនៅភូមិឫស្សីស្រុក ឃុំឫស្សីស្រុក ស្រុកពាមជរ ខេត្តព្រៃវែង ចំណែកម្នាក់ទៀតឈ្មោះ សួង ខាន់ អាយុ២៨ឆ្នាំ មានស្រុកកំណើតនៅភូមិស្វាយរៀង សង្កាត់ស្វាយររៀង ក្រុងស្វាយរៀង ។ អ្នកទាំង២នាក់ជាកម្មករសំណង់ ស្នាក់នៅក្នុងការដ្ឋានសំណង់មួយកន្លែងនៅក្នុងភូមិតាង៉ូវ សង្កាត់និរោធ ខណ្ឌច្បារអំពៅជាមួយគ្នា ។ ដោយឡែកមិត្តភក្ដិទាំង២នាក់ដែលជាជនបោកប្រាស់នោះ មិនត្រូវបានស្គាល់ឈ្មោះឡើយ ។
ម្ចាស់ហាងបានប្រាប់ប៉ូលិសថា បុរសទាំង៤នាក់នោះបានចូលទៅផឹកស៊ី និងច្រៀងខារ៉ាអូខេ នៅក្នុងហាងរបស់គាត់ តាំងពីវេលាម៉ោង៣រសៀលថ្ងៃទី១៤ កញ្ញា ដែលខណៈនោះគាត់មិនទាន់បានបើកទ្វារហាងស្រួលបួលនៅឡើយទេ ។ ប៉ុន្តែដោយសារតែភ្ញៀវចូលទៅហើយនោះ គាត់ក៏ប្រញាប់ប្រញាល់រៀបចំទៅតាមការកុម្មង់របស់ភ្ញៀវ មិនឱ្យភ្ញៀវអន់ចិត្តឡើយ ។ បុរសទាំងនោះបានផឹកស៊ីរហូតដល់វេលាម៉ោងប្រមាណជិត៨យប់ ស្រាប់តែមានបុរស២នាក់ចាកចេញទៅ ហើយពេលនោះគាត់បានសួរនាំដែរ ប៉ុន្តែអ្នកទាំងនោះប្រាប់ថា ចេញទៅតែមួយភ្លែតទេ និងត្រឡប់មកវិញហើយ ទើបគាត់មិនបានឃាត់ ។ លុះក្រោយពេលចាំបាត់ៗ ទើបដឹងថា ជននោះបោកប្រាស់ ហើយដោយខ្លាចបុរស២នាក់ទៀតគេចខ្លួនបាត់ដែរ ទើបគាត់ទារលុយ ប៉ុន្តែអ្នកទាំង២នាក់នោះគ្មានលុយឱ្យ គាត់ក៏ប្ដឹងបូ៉លិសឱ្យចាប់ខ្លួនតែម្ដង ។
ប៉ូលិសឱ្យដឹងថា បន្ទាប់ពីទទួលបានព័ត៌មាននោះ កងកម្លាំងបានចុះទៅឃាត់ខ្លួនបុរសទាំង២នាក់ភ្លាមៗ ប៉ុន្តែក្រោយពេលសាកសួរសាច់រឿង ទើបដឹងថា អ្នកទាំង២នាក់នោះជាជនរងគ្រោះដែរ ព្រោះត្រូវបានមិត្តភក្ដិបោក នាំយកទៅធ្វើជាឈ្នាន់ ហើយក៏គ្មានការឃុំខ្លួននទេ គ្រាន់តែអប់រំ និងជូនទៅផ្ទះបងប្អូនដើម្បីយកលុយមកសងម្ចាស់ហាងខារ៉ាអូខេ ដើម្បីជាការបញ្ចប់រឿងតែប៉ុណ្ណោះ ៕
ចែករំលែកព័តមាននេះ