ក្រុងគៀវ កាលពីថ្ងៃទី១៤ កញ្ញា បានចោទប្រកាន់ពួកឧទ្ទាមស្និទ្ធរុស្ស៊ីថា គំរាមកំហែងដល់ដំណើរការសន្តិភាព ដោយរំលោភបំពានលើបទឈប់បាញ់គ្នានៅភាគខាងកើតអ៊ុយក្រែន ចំណែកការបាញ់តគ្នាយ៉ាងខ្លាំងក្លាដោយកាំភ្លើងធំនៅទីក្រុងដូណេតស្ក៍ បើតាមអាជ្ញាធរថា បណ្តាលឱ្យជនស៊ីវិលស្លាប់ជាច្រើននាក់ ។
ការចោទប្រកាន់ទាំងនេះបន្ទាប់ពីបទឈប់បាញ់គ្នាមួយរវាងកងទ័ពរដ្ឋាភិបាល និងពួកបះបោរ ដែលចុះហត្ថលេខាកាលពីថ្ងៃទី៥ កញ្ញា ដើម្បីបញ្ចប់ការប្រយុទ្ធគ្នារយៈពេល៥ខែមកហើយបណ្តាលឱ្យមនុស្សស្លាប់ជាង២.៧០០នាក់ ធ្វើឡើងបន្ទាប់ពីការរិះគន់ដាក់គ្នារវាងក្រុងគៀវ និងក្រុងមូស្គូអំពីចេតនាពិតប្រាកដរបស់ភាគីទាំងពីរ ។
អ្នកនាំពាក្យយោធាអ៊ុយក្រែន លោកវ៉ូឡូឌីមៀរ ប៉ូលីយ៉ូវី ថ្លែងថា អំពើរបស់ពួកភេរវករគំរាមកំហែងដល់ការអនុវត្តផែនការសន្តិភាពរបស់ប្រធានាធិបតីលោកប៉េត្រូប៉ូរ៉ូឆេនកូ ។ លោកអះអាងថា ពួកឧទ្ទាមបានវាយប្រហារបណ្តាប៉ុស្តិ៍ត្រួតពិនិត្យរបស់កងទ័ព ។
កាលពីថ្ងៃទី១៤ កញ្ញា បណ្តាអ្នកកាសែតរបស់ AFP ជាសាក្សីនៃការបាញ់តគ្នាយ៉ាងខ្លាំងដោយកាំភ្លើងធំធុនធ្ងន់រហូតដល់ទៅប្រមាណជា២០គ្រាប់ក្នុងមួយនាទីនៅក្បែរព្រលានយន្តហោះក្រុងដូណេតស្ក៍ ដែលស្ថិតក្រោមការត្រួតត្រារបស់កងទ័ពអ៊ុយក្រែន ។ មានផ្សែងខ្មៅយ៉ាងក្រាស់ហុយទៅលើអាកាសក្បែរព្រលានយន្តហោះនេះ ។
ពួកឧទ្ទាមបានបាញ់ចេញពីបណ្តាតំបន់មានប្រជាជនរស់នៅ ចំណែកកងទ័ពអ៊ុយក្រែនបានបាញ់តបតវិញចេញពីព្រលានយន្តហោះ ។
សាលាក្រុងដូណេតស្ក៍ ដែលចាត់ទុកសភាពការណ៍ថាធ្ងន់ធ្ងរ គូសបញ្ជាក់នាយប់ថ្ងៃទី១៤ កញ្ញាថា ការបាញ់កាំភ្លើងធំបណ្តាលឱ្យជនស៊ីវិលជាច្រើននាក់ត្រូវស្លាប់ ។
ខណៈដែលលោកប៉ូរ៉ូឆេនកូ នាសប្តាហ៍កន្លងទៅបានសម្តែងការសាទរចំពោះការផ្លាស់ប្តូរទាំងស្រុងមួយនៃសភាពការណ៍ បន្ទាប់ពីថ្ងៃទី៥ កញ្ញា ប្រជាជនក្នុងមូលដ្ឋានជាច្រើនជិតក្រុងដូណេតស្ក៍ដូចជាមូលដ្ឋានម៉ាគីអុីវកាជាដើម នៅតែរស់នៅជាមួយការបាញ់ផ្លោងជាប់ ។
បន្ទាប់ពីការដាក់ទណ្ឌកម្មថ្មីៗសំដៅលើសេដ្ឋកិច្ចរុស្ស៊ីរបស់សហភាពអឺរ៉ុប និងសហរដ្ឋអាមេរិក ក្រុងមូស្គូ និងក្រុងគៀវ កាលពីថ្ងៃទី១៣ កញ្ញា បានធ្វើសង្គ្រាមពាក្យសម្តីដាក់គ្នាយ៉ាងខ្លាំង ។
សល់ពេលប៉ុន្មានថ្ងៃទៀតដល់ទស្សនកិច្ចរបស់ប្រធានាធិបតីអ៊ុយក្រែននៅក្រុងវ៉ាស៊ីនតោន រុស្ស៊ីបានចោទប្រកាន់សហរដ្ឋអាមេរិកថា បានបង្កើនជម្លោះនៅភាគខាងកើតអ៊ុយក្រែន ក្នុងគោលដៅយុទ្ធសាស្ត្រសុទ្ធសាធ ។ ចំណែកក្រុងគៀវវិញបានបរិហារពីការបុ៉នប៉ងរបស់រុស្ស៊ីលុបបំបាត់ចោលអ៊ុយក្រែន ។
រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូួវ ថ្លែងថា ក្រុងវ៉ាស៊ីនតោនបង្ហាញជាច្រើនលើកថា ទិសដៅរបស់ខ្លួន គឺធ្វើយ៉ាងណាឱ្យវិបត្តិអ៊ុយក្រែនកាន់តែធ្ងន់ធ្ងរដើម្បីប្រើប្រាស់អ៊ុយក្រែនជារូបិយវត្ថុផ្លាស់ប្តូរក្នុងការប៉ុនប៉ងថ្មីរបស់ខ្លួន ធ្វើឱ្យរុស្ស៊ីនៅឯកោ និងចុះខ្សោយ ។
ចំណែកនាយករដ្ឋមន្ត្រីអ៊ុយក្រែន លោកអាសឺនី អីូយ៉ាតសឺនីអ៊ុក វិញនិយាយថា គោលដៅចុងក្រោយរបស់លោកពូទីន គឺដណ្តើមយកអ៊ុយក្រែនទាំងមូល ពុំមែនត្រឹមតំបន់ដូណេតស្ក៍ និងលូហ្គានស្ក៍ឡើយ ហើយស្តារសហភាពសូវៀតឡើងវិញ ។
ខណៈពេលដែលកិច្ចព្រមព្រៀងឈប់បាញ់គ្នានៅភាគខាងកើតអ៊ុយក្រែនមានការរំលោភបំពាន សមយុទ្ធយោធាអន្តរជាតិមួយចូលរួមដោយប្រទេស១៥ ក្នុងនោះមានសហរដ្ឋអាមេរិកដែរ ចាប់ផ្តើមនាថ្ងៃទី១៥ កញ្ញា នៅភាគខាងលិចអ៊ុយក្រែន ៕
ចែករំលែកព័តមាននេះ