ក្រោយការធ្វើឃាតដោយកាត់ក្បាលចំណាប់ខ្មាំង៣នាក់ ដែល២នាក់ជាអ្នកកាសែតជនជាតិអាមេរិក និងម្នាក់ជាពលករមនុស្សធម៌ជនជាតិអង់គ្លេស ដោយក្រុមរដ្ឋអ៊ិស្លាម មានការចោទប្រកាន់បារាំងពីរឿងចេញប្រាក់លោះ ឱ្យដល់ពួកភេរវករ ។ ប្រធានាធិបតីអាមេរិក លោកបារ៉ាក់ អូបាម៉ា ក្នុងបទសម្ភាសន៍យ៉ាងវែងមួយ ជាមួយកាសែតញូវយ៉កថែម ពន្យល់ពីយុទ្ធសាស្ត្ររបស់លោកប្រឆាំងក្រុមរដ្ឋអ៊ិស្លាម បានរិះគន់បារាំងដែលបានបង់ប្រាក់លោះដល់ពួកភេរវករ ។
បទសម្ភាសន៍នោះត្រូវបានចេញផ្សាយកាលពីថ្ងៃទី១៣ កញ្ញា មុនពេលចាក់ផ្សាយវីដេអូអំពីការធ្វើឃាតលោក David Haine ពលករមនុស្សធម៌នៃអង្គការក្រៅរដ្ឋាភិបាលបារាំងមួយនៅសុីរី ។កាសែតអាមេរិកនោះបានរៀបរាប់ពីការរិះគន់របស់លោក អូបាម៉ា ពេលលោកលើកឡើងពីបញ្ហាបង់ប្រាក់លោះ ។ លោកថាប្រធានាធិបតីបារាំងលោកហ្វ្រង់ស្វ័រ ហូឡង់ និយាយថា ប្រទេសរបស់លោកពុំបានបង់ប្រាក់លោះឱ្យពួកភេរវករឡើយ ប៉ុន្តែតាមការពិតវិញលោកបានបង់ប្រាក់លោះនោះ ។ ផ្ទុយទៅវិញ សហរដ្ឋអាមេរិកពុំដែលបង់ប្រាក់លោះឡើយ ដែលបែបនោះប្រហែលជាជនជាតិអាមេរិក ពុំសូវមានជាប់ចំណាប់ខ្មាំងច្រើនដូចបារាំង ។
សហរដ្ឋអាមេរិកពុំលាក់បាំងពីការរឹងរូសរបស់ខ្លួនពុំព្រមបង់ប្រាក់លោះឡើយ ។ គ្រួសារលោក James Foley ជាចំណាប់ខ្មាំងលោកខាងលិចដំបូងគេ កាត់ក្បាលដោយក្រុមរដ្ឋអ៊ិស្លាម នាពេលថ្មីៗនេះចោទប្រកាន់រដ្ឋាភិបាលអាមេរិកថា ពុំព្រមបញ្ចុះបញ្ចូលពួកអ៊ិស្លាមនិយម ដោយបង់ប្រាក់លោះ ។ ទាហានម្នាក់នៃក្រុមប្រឹក្សាសន្តិសុខជាតិអាមេរិក បានព្រមានជាច្រើនលើកថា ឪពុកម្តាយរបស់លោក Foley អាចមានទោសឧក្រិដ្ឋក្នុងករណីបង់ប្រាក់លោះឱ្យមានការដោះលែងកូនប្រុសរបស់ពួកគេ ៕
ចែករំលែកព័តមាននេះ