របៀបងូតទឹកឱ្យទារក ឬផ្ងូតទឹកឱ្យកូនដែលទើបនឹងសម្រាល មិនមែនជារឿងងាយស្រួលប៉ុន្មានទេសម្រាប់ស្ត្រីជាម្តាយដែលទើបមានកូនដំបូង ព្រោះថាបើធ្វេសប្រហែសតែបន្តិចអាចធ្វើឱ្យទារកមានបញ្ហា ដូចជាទឹកចូលច្រមុះ ឬចូលត្រចៀក ។
ការថែទាំកូននៅពេលងូតទឹក គឺជាភារកិច្ចមួយដែលស្ត្រីជាម្តាយគួរតែយល់ ជាពិសេសនៅមុនពេលងូតទឹកឱ្យទារក ត្រូវត្រៀមឱ្យរួចជាស្រេចនូវសម្ភារមួយចំនួនដូចជា ចានដែកដាក់ទឹក សម្លៀកបំពាក់ ឬក៏ខោទឹកនោម កន្សែងជូនខ្លួន និងម្សៅលាបទារក ដើម្បីការពារការរលាកជាដើម ។ ដំបូងស្ត្រីជាម្តាយត្រូវលុបលាងមុខទារកជាមុនសិន ដោយប្រើកន្សែងស្តើងមួយយកមកជូតមុខ បន្ទាប់មកកក់សក់ ត្រូវចាប់អារម្មណ៍លាងគុម្ពត្រចៀក ផ្នត់ក និងបរិវេណ.ក ។ បន្ទាប់ពីសម្អាតមុខ និងផ្នែកក្បាលរួចទើបលាងដុសសម្អាតខ្លួន ទ្រូង ខ្នងក្លៀក ពិសេសគឺប្រដាប់បន្តពូជ គូទ ជើង និងម្រាមជើង ។
របៀបបីកូនងូតទឹក ៖ ដៃឆ្វេងរបស់ម្តាយកាន់ទ្រទារក និងកាន់ដៃស្តាំរបស់កូន ដោយប្រើដៃស្តាំជូតសម្អាតមុខ ពេលកក់សក់ត្រូវប្រើម្រាមដៃឆ្វេងពីរខ្ចប់ស្លឹកត្រចៀករបស់កូន ដើម្បីកុំឱ្យទឹកចូលត្រចៀក ។ ក្រោយពេលងូតទឹកស្អាតផ្នែកខាងលើ អាចដាក់គូទនិងជើងកូនចូលក្នុងចានដែកងូតទឹក និងងូតបន្តដូចដែលបានរៀបរាប់ខាងលើ ។ រយៈពេលនៃការងូតមិនត្រូវឱ្យលើសពី១០នាទីឡើយ ។
ពេលងូតត្រូវយកកន្សែងមកជូតឱ្យស្អាត រួចលាបម្សៅតិចៗនៅផ្នែកគុម្ពត្រចៀក ក្លៀក ផ្នត់ដៃ និងក្រលៀនទាំងពីរ រួចស្លៀកពាក់ជាការស្រេច ។ ពេលវេលាងូតទឹកដ៏សមស្របបំផុត គឺធ្វើនៅមុនពេលទទួលទានអាហារថ្ងៃត្រង់កន្លះម៉ោង គួរចៀសវាងងូតទឹកនៅពេលកូនទើបនឹងបៅឆ្អែត ៕
ចែករំលែកព័តមាននេះ