ពន្លឺថ្ងៃជួយកាត់បន្ថយឱកាសកើតជំងឺមហារីកមួយចំនួន50ភាគរយ
យោងតាមអ្នកជំនាញរបស់អូស្ត្រាលីឱ្យដឹងថា ការផ្តល់ឱ្យស្បែកប៉ះពន្លឺថ្ងៃបានគ្រប់គ្រាន់អាចកាត់បន្ថយហានិភ័យកើតជំងឺមហារីកមួយចំនួនបានប្រហែលជា៥០ភាគរយ ។
យោងតាមអ្នកជំនាញរបស់អូស្ត្រាលីឱ្យដឹងថា ការផ្តល់ឱ្យស្បែកប៉ះពន្លឺថ្ងៃបានគ្រប់គ្រាន់អាចកាត់បន្ថយហានិភ័យកើតជំងឺមហារីកមួយចំនួនបានប្រហែលជា៥០ភាគរយ ។
នៅក្នុងការពិសោធលើជនជាតិអូស្ត្រាលីជាង២ម៉ឺននាក់ លោកស្រីសាស្ត្រាចារ្យRachel Nealeបានរកឃើញថា អ្នកដែលរស់នៅក្នុងតំបន់ទទួលកាំរស្មីយូវីកម្រិតខ្ពស់ អាចកាត់បន្ថយឱកាសកើតមហារីកលំពែងបានរវាងពី៣០ទៅ៤០ភាគរយ ធៀបនឹងអ្នកដែលរស់នៅក្នុងតំបន់មានពន្លឺថ្ងៃតិចតួច ។ សាស្ត្រាចារ្យមកពីវិទ្យាស្ថានស្រាវជ្រាវវេជ្ជសាស្ត្រQIMRនៅក្រុងប្រ៊ីសបេនរូបនេះ បច្ចុប្បន្នកំពុងធ្វើការពិសោធបន្តដើម្បីមើលឱ្យច្បាស់ថា តើវីតាមីន Dពិតជាអាចបន្ថយហានិភ័យមហារីកអូវែនិងបំពង់រំលាយអាហារបានមែនទេ ។
លោកស្រីសាស្ត្រាចារ្យបានថ្លែងថា៖
«វាពិតជាសំខាន់ដែលត្រូវទទួលបានពន្លឺថ្ងៃគ្រប់គ្រាន់ ជាពិសេសសម្រាប់បណ្តាជនដែលគ្មានពេលចេញទៅក្រៅ» ។
សម្រាប់ក្មេងៗ ការមិនទទួលបានពន្លឺថ្ងៃគ្រប់គ្រាន់អាចនាំឱ្យពួកគេកើតមានរោគក្រិស-គឺជាប្រភេទជំងឺឆ្អឹងដែលធ្វើឱ្យឆ្អឹងទន់ គ្មានរូបរាងត្រឹមត្រូវឬជំងឺ Osteomalacia ។
លោកស្រីសាស្ត្រាចារ្យ Nealeបានបន្តថា៖«សូម្បីតែការត្រូវត្រឹម២-៣នាទីក្នុងមួយថ្ងៃគឺគ្រប់គ្រាន់នឹងទទួលបានវីតាមីនD ។ គេគួរដឹងថា ការត្រូវពន្លឺថ្ងៃសព្វរាងកាយរយៈពេលខ្លីគឺប្រសើរជាងត្រូវតែមួយកន្លែងណាមួយលើរាងកាយ តែរយៈពេលវែង ។ ចូរចេញក្រៅផ្ទះដោយលែងខ្លួនទទេ និងស្លៀកខោខ្លី »។
ទោះជាយ៉ាងណា ជាការសន្និដ្ឋានចុងក្រោយ លោកស្រីសាស្ត្រាចារ្យ Nealeបានគូសបញ្ជាក់ថា ពុំទាន់មានភស្តុតាងរឹងមាំគ្រប់គ្រាន់ដែលអះអាងថា វាពិតជាអាចទៅរួចដែលថា ថ្នាំគ្រាប់វីតាមីនDផ្តល់អត្ថប្រយោជន៍ប្រឆាំងនឹងមហារីកពេញលេញឬអត្ថប្រយោជន៍សុខភាពជាក់ស្តែងរបស់ពន្លឺថ្ងៃនោះទេ ។ លោកស្រីបន្ថែមថា ៖«យើងពិតជាពុំទាន់មានលទ្ធភាពគ្រប់គ្រាន់ដែលនិយាយថា នេះជាការពិត១០០ភាគរយ ដ្បិតយើងបានពិនិត្យតែលើការជាប់ពាក់ព័ន្ធគ្នារវាងការប៉ះត្រូវពន្លឺថ្ងៃនិងមហារីកតែប៉ុណ្ណោះពោលគឺមិនមែនហេតុបង្កនោះទេ »៕
ចែករំលែកព័តមាននេះ