អ្នកវិទ្យាសាស្ត្រព្រមានថា ការអង្គុយច្រើនពេកអំឡុងពេលសម្រាកលំហែនឹងបង្កើនហានិភ័យកើតជំងឺទឹកនោមផ្អែម បើទោះជាបុគ្គលនោះហាត់ប្រាណទៀងទាត់រាល់ថ្ងៃក៏ដោយ ។ ការសិក្សាមួយបានរកឃើញថា បុគ្គលដែលអង្គុយតិច តែហាត់ប្រាណច្រើនកាត់បន្ថយហានិភ័យការធាត់លើសទម្ងន់(កត្តានាំឱ្យកើតមានជំងឺទឹកនោមផ្អែម)បានដល់៣/៤ ។
ក្រុមអ្នកស្រាវជ្រាវមកពីសាកលវិទ្យាល័យ University College London ចក្រភពអង់គ្លេសបាននិយាយថា រយៈពេលវែងនៃពេលសម្រាកលំហែកាយដោយមិនមានសកម្មភាពបានកាត់បន្ថយនូវអត្ថប្រយោជន៍បានមកពីការហាត់ប្រាណ ។ នេះមានន័យថា វិធីល្អបំផុតដើម្បីកាត់បន្ថយហានិភ័យធាត់លើសទម្ងន់ គឺអង្គុយឱ្យបានតិចបំផុត ហើយបន្ថែមការហាត់ប្រាណ ។
ការពិសោធលើមន្ត្រីរាជការស៊ីវីល៤ពាន់នាក់រយៈពេលពី៥ទៅ១០ឆ្នាំបានបង្ហាញថា អ្នកដែលចំណាយពេលអង្គុយមើលទូរទស្សន៍ ដេប៉ាក់…តិចជាង១២ម៉ោងគឺក្នុងមួយសប្តាហ៍ តែហាត់ប្រាណច្រើនជាង៤ម៉ោងគឺប្រឈមនឹងការធាត់លើសទម្ងន់ ១/៤ធៀបទៅនឹងអ្នកដែលអង្គុយច្រើនជាង២៥ម៉ោង ហើយហាត់ប្រាណតិចជាង៩០នាទីក្នុងមួយសប្តាហ៍ ។
ចុះផ្សាយក្នុងព្រឹត្តិបត្រ Diabetologia វេជ្ជបណ្ឌិតJoshua Bellអ្នកនិពន្ធលទ្ធផលការសិក្សាបានបញ្ជាក់ថា៖«ប្រសិទ្ធភាពនៃការធ្វើសកម្មភាពរាងកាយដើម្បីទប់ស្កាត់ភាពធាត់លើសទម្ងន់គឺអាស្រ័យលើចំនួនពេលដែលបុគ្គលម្នាក់ៗអង្គុយក្រោយទំនេរពីការងារ ។ ដូច្នេះ ការបូកបញ្ចូលគ្នារវាងការធ្វើសកម្មភាពរាងកាយកម្រិតខ្ពស់ និងពេលវេលាអង្គុយកម្រិតទាប អាចនឹងជួយកាត់បន្ថយហានិភ័យធាត់លើទម្ងន់» ៕
ចែករំលែកព័តមាននេះ