រាជធានីភ្នំពេញ ៖ កាលបើរាងកាយមនុស្សយើងកង្វះជីវជាតិ A ធ្វើឱ្យការរស់នៅពីមួយថ្ងៃទៅមួយថ្ងៃ ប្រឈមនឹងហានិភ័យជាច្រើន ពោលគឺជីវិតរស់នៅជាមួយនឹងជំងឺ ។ ទាក់ទិននឹងបញ្ហានេះ លោកវេជ្ជបណ្ឌិត ចាន់ ពង្សវឌ្ឍនា ប្រធានក្រុមការងារបច្ចេកទេសត្រួតពិនិត្យគុណភាព នៃអនុកម្មការបញ្ចូលមីក្រូសារជាតិក្នុងចំណីអាហារ បានថ្លែងនៅក្នុងសិក្ខាសាលាថ្នាក់ជាតិមួយថា មូលហេតុនៃបញ្ហាកង្វះជីវជាតិ A បង្កទ្បើងដោយ៖
-កង្វះអាហារដែលសម្បូរជីវជាតិ A នៅក្នុងរបបអាហារប្រចាំថ្ងៃ
-កង្វះអាហារចម្រុះ
-មិនបានបំបៅកូនដោយទឹកដោះម្តាយ
-មិនបានផ្តល់អាហារគ្រប់គ្រាន់ដល់កុមារ
-ការចម្អិនអាហារមិនបានបន្ថែមខ្លាញ់ ឬប្រេងឆា ដែលជាហេតុធ្វើឱ្យការបឺតស្រូបយកជីវជាតិ A នៅក្នុងរាងកាយមិនបានល្អ ។
-មានលក្ខខណ្ឌដទៃទៀត ដែលរារាំងដល់ការបឺតស្រូបជីវជាតិ A ដូចជា ព្រូន កញ្ជ្រឹល រាក់ជាប់បន្ត កង្វះអាហារូបត្ថម្ភធ្ងន់ធ្ងរ ។
-មិនបានទទួលថ្នាំគ្រាប់ជីវជាតិ A និងថ្នាំទម្លាក់ព្រូន ។
ចំពោះរោគសញ្ញានៃបញ្ហាកង្វះជីវជាតិ A មានដូចជា៖
-ខ្វាក់មាន់
-ស្ងូតភ្នាសសនៃកែវភ្នែក
-ស្ងួតកញ្ចក់ភ្នែក
-ដំបៅអ៊ុលស៊ែកញ្ចក់ភ្នែក
-ដំបៅគ្រាប់ភ្នែកទាំងមូលនិងពិការភ្នែកជាដើម ។
ដើម្បីការពារកុំឱ្យមានបញ្ហាកង្វះជីវជាតិ A លោកអ្នកត្រូវអនុវត្តតាមវិធីដូចខាងក្រោម៖
-បំបៅកូនដោយទឹកដោះដំបូង និងទឹកដោះម្តាយតែមួយមុខគត់តាំងពីកើតមករហូតដល់ទារកអាយុ៦ខែ
-ចាប់ពីទារកអាយុ៦ខែទ្បើងទៅ ត្រូវផ្តល់អាហារបន្ថែមដល់កុមាររួមជាមួយការបំបៅដោះកូនរហូតដល់អាយុ២ឆ្នាំឬលើសនេះក៏បាន
-កុមារអាយុពី៦ទៅ៥៩ខែ ត្រូវផ្តល់គ្រាប់ថ្នាំជីវជាតិ A បន្ថែម២ដងក្នុង១ឆ្នាំ
-ផ្តល់ថ្នាំបង្ការដល់កុមារឱ្យបានគ្រប់មុខ ។
*ចំណាំ ប្រភេទអាហារសម្បូរជីវជាតិ A មានដូចជា៖
-ទឹកដោះម្តាយដំបូង
-ប្រភេទសាច់មាន៖ សាច់សត្វ ថ្លើម ត្រី មាន់ ផ្នែកក្រហមនៃស៊ុត ត្រីរ៉ស់ ត្រីឆ្លាំង ត្រីប្រា…
-បន្លែ-ផ្លែឈើដែលមានពណ៌លឿងទុំ ដូចជាការ៉ុត ដំទ្បូងជ្វាពណ៌លឿង ល្ពៅ ប៉េងបោ៉ះ ស្វាយទុំ ល្ហុងទុំ សេដាទុំ…។
-បន្លែដូចជា៖ ស្ពៃ ស្លឹកបាស ម្រុម ត្រកួន ស្លឹកងប់ ផ្ទី ត្រួយល្ពៅ…
អាហារទាំងនេះ សុទ្ធតែសម្បូរជីវជាតិ A ដែលមានសារប្រយោជន៍យ៉ាងពិសេសជួយទ្រទ្រង់រាងកាយមនុស្សឱ្យមានសុខភាពល្អ បញ្ញាឆ្លាតវៃ និងមានថាមពលខ្លាំងក្លា ៕
ចែករំលែកព័តមាននេះ