ក្រុមអ្នកស្រាវជ្រាវអាមេរិកនិងចិនបានរកឃើញថា ការជំនួសអាហារផ្អែមដោយស្ករនិងអាហារសម្បូរខ្លាញ់ដោយសណ្តែកដី គ្រាប់ស្វាយចន្ទី និងសណ្តែកប្រេស៊ីលអាចជួយកាត់បន្ថយហានិភ័យកើតមានជំងឺបេះដូងបានជិត១/៣ ឬប្រហែលជា២០ភាគរយ ។ ដោយឡែក ចំពោះហានិភ័យស្លាប់ជំងឺផ្សេងៗគឺអាចកាត់បន្ថយបានប្រហែលជា ១៧ភាគរយ ។
សណ្តែកដី គ្រាប់ស្វាយចន្ទី និងសណ្តែកប្រេស៊ីលត្រូវគេរកឃើញថាសម្បូរទៅដោយវីតាមីន សារធាតុរ៉ែ អាស៊ីតខ្លាញ់និងបណ្តាសារធាតុចិញ្ចឹមផ្សេងៗទៀត ។ នៅពេលសារធាតុទាំងអស់នេះរួមផ្សំគ្នា វាបង្កើតបានជាកម្លាំងដ៏មានប្រសិទ្ធភាពក្នុងការបញ្ចុះខ្លាញ់កូឡេស្តេរ៉ូលនិងកាត់បន្ថយការរលាកក្នុងរាងកាយ ។
ការពិនិត្យមើលទិន្នន័យនៃការសិក្សាចំនួន១៨ លើអ្នកជំងឺទឹកនោមផ្អែមប្រភេទ-២ ១ម៉ឺន២ពាន់នាក់និងអ្នកជំងឺបេះដូង១ម៉ឺន៥ពាន់នាក់ពីសំណាក់អ្នកស្រាវជ្រាវសាកលវិទ្យាល័យវិទ្យាសាស្ត្រនិងបច្ចេកវិទ្យាក្រុងវូហាន ប្រទេសចិននិងសាកលវិទ្យាល័យហាវើដ សហរដ្ឋអាមេរិកបានរកឃើញថា អ្នកដែលទទួលទានសណ្តែកដី គ្រាប់ស្វាយចន្ទីឬសណ្តែកប្រេស៊ីលម្តងក្នុងមួយថ្ងៃឃើញថា ហានិភ័យពីជំងឺបេះដូងធ្លាក់ចុះចន្លោះពី២៨ទៅ២៩ភាគរយខណៈហានិភ័យស្លាប់ពីជំងឺផ្សេងៗធ្លាក់ចុះប្រហែលជា ១៧ភាគរយ ។
ទោះជាយ៉ាងនេះក្តី គេពុំឃើញមានភាពខុសប្លែកគ្នាទៅលើជំងឺទឹកនោមផ្អែមរវាងអ្នកទទួលទានសណ្តែកនិងអ្នកមិនទទួលទាននោះទេ ។ មានការកាត់បន្ថយបន្តិចបន្តួចដែរលើហានិភ័យជំងឺដាច់សរសៃឈាមខួរក្បាល ។
បញ្ជាក់នៅក្នុងរបាយការណ៍ពីការរកឃើញរបស់ខ្លួន ក្រុមអ្នកស្រាវជ្រាវបាននិយាយថា ៖«ការរកឃើញលើកនេះបានបង្ហាញនូវការគាំទ្រលើការពិតដែលថា ការដាក់បញ្ចូលសណ្តែកដីគ្រាប់វាយចន្ទី ឬសណ្តែកប្រេស៊ីលជាដើមទៅក្នុងរបបអាហារប្រចាំថ្ងៃគឺផ្តល់ការការពារប្រឆាំងនឹងជំងឺរ៉ាំរ៉ៃមួយចំនួន»៕
ចែករំលែកព័តមាននេះ