រាជធានីភ្នំពេញ ៖ សន្តិសុខ E P S យាមនៅរោងចក្ររ៉ូស៊ីងហ្គាមេន៦នាក់ ត្រូវបានក្រុមសន្តិសុខដូចគ្នា៤នាក់ ដាក់ថ្នាំបំពុលតាមរយៈកាហ្វេទឹកដោះគោបណ្តាលឱ្យដេកសន្លប់ស្តូក ស្តឹង ហើយក្រុមសន្តិសុខជាចោរនោះបានយករថយន្តចូលដឹកខោចេញពីក្នុងរោងចក្រអស់២៥.០០០ខោ ដែលគិតជាទឹកប្រាក់អស់ប្រមាណជិត១លានដុល្លារ និងគេចខ្លួនដោយសុវត្ថិភាព ។
ហេតុការណ៍នេះបង្កឱ្យមានការភ្ញាក់ផ្អើល កាលពីវេលាម៉ោង២និង៤០នាទីរំលងអធ្រាត្រ ឈានចូលថ្ងៃទី១៣ កញ្ញា នៅក្នុងរោងចក្រ មានទីតាំងស្ថិតក្នុងភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ ហើយសន្តិសុខរងគ្រោះ៦នាក់ត្រូវបានបញ្ជូនទៅកាន់មន្ទីរពេទ្យឯកជន ។ ជនដៃដល់ដែលដាក់ថ្នាំបំពុលសន្តិសុខគ្នាឯងនោះត្រូវសមត្ថកិច្ចឱ្យដឹងថា ១-ឈ្មោះអ៊ុង រដ្ឋា ភេទប្រុស អាយុ២៦ឆ្នាំ ២-ឈ្មោះ មាស សាគុណ ភេទប្រុស អាយុ២៩ឆ្នាំ ៣-ឈ្មោះ សេង សុឃន ភេទប្រុស អាយុ២០ឆ្នាំ និង៤-ឈ្មោះ ប៉ែន ឡុង ភេទប្រុស អាយុ៣០ឆ្នាំ។ចំណែកសន្តិសុខរងគ្រោះ ១-ឈ្មោះខា ចាន់ភេទប្រុស អាយុ២៥ឆ្នាំ ២-ឈ្មោះ ដូង លឹម ភេទស្រី អាយុ៥៤ឆ្នាំ ៣-ឈ្មោះភិន រិទ្ធី ភេទប្រុស អាយុ១៨ឆ្នាំ ៤-ឈ្មោះ រុន រស្មី ភេទប្រុសអាយុ២០ឆ្នាំ ៥-ឈ្មោះ ងូយ សុភារៈ ភេទប្រុស អាយុ២១ឆ្នាំ និង៦-ឈ្មោះ តាយ ខេមរា ភេទប្រុស ។
បើតាមប្រធានរដ្ឋបាលឱ្យដឹងថា សន្តិសុខយាមរោងចក្ររ៉ូស៊ីងទាំង៦នាក់ ត្រូវសន្តិសុខដូចគ្នា៤នាក់ រៀបចំគម្រោងដាក់ថ្នាំបំពុលតាមរយៈការហូបកាហ្វេទឹកដោះគោ ហើយបានធ្វើសកម្មភាពយករថយន្ត២គ្រឿងមកដឹកខោដែលជាផលិតផលសម្រេចអស់ចំនួន២៥.០០០ខោ។ ហើយខោដែលក្រុមចោរលួចយកទៅនោះ លក់ចេញនៅទីផ្សារអឺរ៉ុប ក្នុងខោ១តម្លៃ៣០ដុល្លារ ដូច្នេះខោទាំងអស់នេះសរុបជាប្រាក់ជិត១លានដុល្លារ ។ តាមព័ត៌មានឱ្យដឹងថា នៅក្នុងរោងចក្រមានសន្តិសុខ១២នាក់យាម នៅវេលារំលងអធ្រាត្រឈានចូលថ្ងៃទី១៣ កញ្ញា សន្តិសុខ ឈ្មោះមាស សាគុណ បានឱ្យឈ្មោះសូ សុជាតិ ទៅសុំប្រធានតំបន់ឈ្មោះ ម៉ូច សំបូរ ដើម្បីចេញទៅទិញកាហ្វេទឹកដោះគោ តែប្រធានតំបន់មិនឱ្យទៅទេ ។
ក្រោយមកសន្តិសុខឈ្មោះ សូ សុជាតិ ក៏បានទៅដេក ហើយប្រធានតំបន់ក៏បានចេញពីរោងចក្រទៅបាត់ ។ លុះនៅវេលាម៉ោង២និង៤០នាទីរំលងអធ្រាត្រ សន្តិសុខឈ្មោះសូ សុជាតិ បានក្រោកពីដំណេក ស្រាប់តែឃើញសន្តិសុខដែលប្រចាំការនៅប៉ុស្តិ៍ដេកសន្លប់ស្តូកស្តឹង និងបានទៅមើលសន្តិសុខដែលយាមនៅគោលដៅខាងក្នុងផ្សេងៗទៀតក៏ឃើញត្រូវថ្នាំពុលដែរ ក៏ប្រញាប់រាយការណ៍ប្រាប់រដ្ឋបាល ទើបមានការភ្ញាក់ផ្អើល ។ ក្រុមចោរអាចមានបក្សពួកផ្សេងទៀត ដែលនៅខាងក្រៅជាអ្នកទិញកាហ្វេទឹកដោះគោឱ្យ និងដាក់ថ្នាំបំពុលពេលធ្វើសកម្មភាពលួចបានសម្រេចក៏នាំគ្នាគេចខ្លួនបាត់អស់ ។
នៅព្រឹកនោះសមត្ថកិច្ច និងខាងរោងចក្រក៏បានចុះទៅត្រួតពិនិត្យកន្លែងដាក់ខោ ដែលត្រៀមនឹងរៀបចំដាក់កុងតឺន័រត្រូវបានក្រុមចោរដែលគេអះអាងថា ជាសន្តិសុខដឹកចេញតាមរថយន្តចំនួន២គ្រឿងអស់ខោចំនួន២៥.០០០ខោ គេចបាត់ ។ គួរបញ្ជាក់ថា កន្លងមករោងចក្ររ៉ូស៊ីងនេះត្រូវចោរឡើងគាស់ដំបូលលួចយកខោអាវជាបន្តបន្ទាប់ធ្វើឱ្យថៅកែខាតបង់រាប់ម៉ឺនដុល្លារ ហើយលើកនេះសន្តិសុខដាក់ថ្នាំសណ្តំសន្តិសុខគ្នាឯងលួចយកខោដែលមានតម្លៃជិត១លានដុល្លារទៀត ៕
ចែករំលែកព័តមាននេះ